1, 2. Thungetna pen a thupi diak letsong hi ci-in ba’hang um na hiam? Tua thu tawh kisai Lai Siangtho hilhna i theih ding ba’hang kisam a hiam?

KHUAVANNUAI tawh genteh le’ng leitung pen nak neu mahmah hi. Jehovah in leitung a et ciang, gam khempeuha mihing khempeuh pen phelkhai khat panin tuimal themkhat a taakkhia tawh kibangin mu hi. (Late 115:15; Isaiah 40:15) Khuavannuai tawh ki-etkaak le’ng ei mihingte i neu luat hang, Late 145:18, 19 in: “Amah a sam mi khempeuh kiangah TOPA nai om a, lungsim takpi tawh a sam mi khempeuh kiangah amah nai om hi. Amah a zahtakte deihna a kicingin tungsak a, amaute kikona zong za-in amaute a honkhia hi,” hong ci hi. I neih khempeuh lakpan a manpha pen hilo a hiam! A vanglian pen Piangsakpa, Jehovah in ei tawh hong kinai nuamin i thungette hong ngaihsak nuam hi. Man lua hi, thungetna pen hamphatna khat hi a, ei mimal khat ciat ading Jehovah hong piak a thupi diak letsong khat ahi hi.

² Ahih hang Jehovah in ama deihna tawh a kituak lampi tawnin a mah i hopih leh bek thu hong ngaihsak ding hi. Tua hileh ama deihna koi bangin sem thei ding ihi hiam? Tu’n, thungetna tawh kisai Lai Siangtho in bang gen hiam cih en ni.

3. Jehovah kiang thu na nget ding ba’hang kisam a hiam?

³ Jehovah in ama kiang thu na nget ding ahih kei leh na hopih ding deih hi. Tua pen en’ koi bangin theithei  ding ihi hiam? Hehpihna tawh Filippi 4:6, 7 na sim in. Hih, itna tawh hong kisapna thu na ngaihsun in. Khuavannuai a Ukpa in nang hong lungluut mahmah a, nang ii ngaihsutnate le na haksatnate ama kiang na gen ding a deih hi.

4. Jehovah kiang manman a, thungetna in amah tawh lawmta ki-itna koi bangin hong kipsak ding a hiam?

⁴ Thungetna in Jehovah tawh kilawmtakna hong neisak ding hi. Mi a kilawmtate a kiho sialun amau ngaihsutna, a lunghihmawhnate le a lungsim a om thute khatlekhat a kigen uh ciang, amau lawmta ki-itna hong khangin kipsak semsem hi. Jehovah kiang thungetna zong tua bangmah ahi hi. Lai Siangtho tungtawnin Pasian in ama lungsim le a ngaihsutnate nang hong theisak a, mailamah ama hong bawlsak ding thute zong hong gen hi. Amah manman a, na hopih kawmin na lungsim tawnga om thute nangawn zong gen thei hi teh. Tua bangin na sep leh Jehovah tawh lawmta ki-itna hong khangin hong kip semsem ding hi.—James 4:8.

5. Thungetna khempeuh Jehovah in ngai lo hi cih en’ koici theih ihi hiam?

⁵ Thungetna khempeuh Jehovah in a ngai hiam? Ngai lo hi. Kamsang Isaiah hun lai-in Jehovah in Israel minamte kiang: “Thu tampi na nget uh hangin ke’n ka ngai tuan kei ding hi. Bang hang hiam cih leh sisan tawh note’ khut kidim hi,” na ci hi. (Isaiah 1:15) Tua ahih manin i kidop kei leh Jehovah tawh i kigamlat khak nading i sem khathei a, i thungetnate hong ngaihsak loh nading ahang zong na hi khathei hi.

6. Upna pen ba’hang thupi mahmah a hiam? Upna na neih lam koici lah ding na hiam?

⁶ I thunget Jehovah in hong ngaih ding i deih leh amah i up loh phamawh hi. (Marka 11:24) Sawltak Paul in: “Upna lo tawh kuamah in Pasian lungkimsak zo lo hi. Pasian kiang a zuan mi peuhmah in Pasian a om takpi ahihna thu le amah a zongte Pasian in thaman pia hi, ci-in a up ding kisam hi,” cih hong hilh hi. (Hebru 11:6) Ahih hang upna nei ing, ci-a gen bek tawh kicing lo hi. Ni sim nuntakna-ah Jehovah thu i manna tawh i upna kician taka i lah ding kisam hi.—James 2:26 Sim in.

7. (a) Jehovah kiang kiniamkhiatna le zahtakna lianpi tawh thu i nget ding ba’hang kisam a hiam? (b) Thu i nget ciang lungsim takpi tawh i nget lam koici lak ding ihi hiam?

⁷ Jehovah kiang thu i nget ciang kiniamkhiatna le zaktakna lianpi kisam hi. Ba’hang hiam? Kumpi ahih kei leh President tawh a kiho ding hile’ng, zahtakna lianpi tawh hopih ding hi hang. Jehovah pen Vanglian Pasian ahi hi. Tua ahih manin amah tawh i kiho ciang zahtakna lianpi le kiniamkhiatna takpi i lah ding kisamzaw kan hi lo a hiam? (Piancilna 17:1; Late 138:6) Tua khit teh lungsim takpi le lungsim tawng pan Jehovah kiang thu i nget ding zong kisam hi. A kibang kammal pen lawh kikkik ding hi lo hi.—Matthai 6:7, 8.

8. Thungetna-ah na khat peuhpeuh i nget ciang bang i sep ding kisam a hiam?

 ⁸ A tawpna-ah, na khat peuhpeuh i nget ciang i nget thu tawh kisai-in ihih theih zah a, i sep ding kul hi. Gentehna, Jehovah tungah ni sima i kisapnate ngen ihih leh sem thei napi sem loin thadah takin om lehang, i nget khempeuh Jehovah in hong pia ding hi cih kilamen thei lo hi. Hanciam taka na i sep ding, i sep theih nasep ahih nak leh i san ding kisam hi. (Matthai 6:11; 2 Thesalonika 3:10) Na hoih lo sepna pan i khawl nading Jehovah kiang thu ngen ihih leh ei hong khialsak thei ding thu khempeuh i pelh ding kisam hi. (Kolose 3:5) Tu’n thungetna tawh kisai mikim ii dot theih zel thu pawlkhat kikum ni.

9. Kua kiangah thu ngen ding ihi hiam? Thungetna tawh kisai Johan 14:6 in bang hong hilh a hiam?

⁹ Kua kiangah thu ngen ding ihi hiam? Jesuh in a nungzuite kiang, “Vantunga om kote’ Pa aw,” ci-in thu a nget ding uh na hilh hi. (Matthai 6:9) Tua banah ama’n: “Keimah in Lampi ka hi a, Thuman, le Nuntakna zong ka hi hi. Kei hong suang loin Pa kiangah kuamah tung thei lo ding hi,” na ci hi. (Johan 14:6) Tua ahih manin Jesuh tungtawnin Jehovah kiang bek thu i nget ding ahi hi. Jesuh tungtawnin thu ngen cih pen bang a cihnopna hiam? I thungetna Jehovah in hong san ding i ut leh, Jesuh kiang Jehovah in a tuama a piak nasep i thupi muh ding kisam a cihna ahi hi. I sin khitsa mah bangin mawhna le sihna pan ei hong honkhia dingin leitungah Jesuh hong pai hi. (Johan 3:16; Rom 5:12) Tua banah Jehovah in Jesuh pen Siampi Lianpen le Thukhenpipa-in zong na seh hi.—Johan 5:22; Hebru 6:20.

10. Thu i nget ciang om dan a thupi hiam? Nong genkik thei diam?

¹⁰ Thu i nget ciang om dan a thupi hiam? Jehovah in thu i nget ciang khukdin ding, tut ding ahih  kei leh din kul hi ci-in hong ngen lo hi. Lai Siangtho in zahtakna a lak, om dan a tuamtuam tawh Jehovah i hopih thei hi ci-in hong hilh hi. (1 Khang Tangthu 17:16; Nehemiah 8:6; Daniel 6:10; Marka 11:25) Jehovah kiang thu i nget ciang ama ading a thupi pen in, i om dan hi loin lungsim takpi tawh i hopihna ahi hi. Koi munah i om zongin awgingin ahih kei leh aw suak loin zong thu i ngen thei a, a sun a zanin thu i ngen thei hi. Jehovah kiang thu i nget ciang mi kuamah in a zak loh hang, Jehovah in i thungetna hong ngai hi cih i muang thei hi.—Nehemiah 2:1-6.

11. Jehovah kiang bang thuteng gen thei ihi hiam?

¹¹ Bang thuteng ngen thei ihi hiam? Jehovah deihna tawh a kituak na khempeuh i ngen thei hi. Lai Siangtho in: “Eite in ama deihna tawh kituakin i nget nakleh i nget khempeuh Pasian in hong pia ding hi,” ci hi. (1 Johan 5:14) Ei aituam ading thu i ngen thei hiam? Kingen thei mah hi. Jehovah kiang thu i ngetna pen a ki-it mahmah lawmta kiho tawh kibang hi. I ngaihsutnate le i lungsim sunga om thu khempeuh Jehovah kiang i gen thei hi. (Late 62:8) Thu man taka i sep theih nading a vanglian ama kha siangtho hong piak nading i ngen thei hi. (Luka 11:13) Tua banah thu a manin i khensat theih nading pilna le haksatnate i phul zawh nading thahatna a hong piak nading zong Jehovah kiang i ngen thei hi. (James 1:5) I mawhnate hong maisak nading Jehovah kiang i nget loh phamawh hi. (Efesa 1:3, 7) Mi dangte ading zong thu i ngetsak ding kisam a, i innkuanpihte, pawlpi sunga unaute ading zong thu i nget ding kisam hi.—Sawltak 12:5; Kolose 4:12.

12. Thu i nget ciang a thupi pen a i nget ding bang ahi hiam?

¹² Thu i nget ciang a thupi pen a i nget ding bang ahi hiam? Jehovah le ama deihna ahi hi. Ei ading hong bawlsak na khempeuh tung lungsim takpi tawh i lungdam ding kisam hi. (1 Khang Tangthu 29:10-13) Jesuh leitungah a om lai-in a nungzuite kiang thunget dan ding hilh  ahih manin en’ zong tua thu i thei hi. (Matthai 6:9-13 Sim in.) Pasian min siangtho nading a masa pen a, a nget ding uh Jesuh in na hilh hi, Pasian min thupi muh ding le a siangtho-in a muh ding uh a cihna ahi hi. Tua khit teh Pasian Gam hong tun nading le Jehovah deihna leitung bupah hong kicin nading thu i nget ding zong a hong hilh hi. Tua a thupi mahmah thute i nget khit ciang bekin ei’ kisapnate i ngen thei hi ci-in Jesuh in gen hi. I thungetna-ah Jehovah le ama deihna a masa penin i koih leh i nuntakna-ah a thupi pen bang hiam cih a lak i suak hi.

13. I thungetna a tom ding le a sau ding a kiciangtan hiam?

 ¹³ I thungetna a tom ding le a sau ding a kiciangtan hiam? Lai Siangtho in na gen lo hi. I thungetna pen a hun le a mun tawh kizui-in tom thei a, zong sau thei hi. Gentehna, an nek ma i thungetna pen tom thei a, ahih hang Jehovah kiang i lungdamna i gen ciang ahih kei leh i lunghihmawhnate i gen ciang i thungetna sau thei ding hi. (1 Samuel 1:12, 15) Jesuh hun lai-a mi pawlkhat bangin mi dangte mai-ah kihihsakna-in thu a saupi-in i ngen nuam kei hi. (Luka 20:46, 47) Tua banga thungetnate Jehovah in deih lo hi. Jehovah ading a thupi pen in i lungsim sung pan thungetna ahi hi.

14. Thu bangzah vei ngen thei ihi hiam? Tua in Jehovah thu bang hong theisak a hiam?

¹⁴ Thu bangzah vei ngen thei ihi hiam? Jehovah in amah tawh manmanin i kiho ding hong zawn hi. Lai Siangtho in “thu ngen un,” “thu na ngen tawntung un,” ahih kei leh “thu ngen ni loh un,” hong ci hi. (Matthai  26:41; Rom 12:12; 1 Thesalonika 5:17) I thungetna hong ngaihsak dingin Jehovah Pasian kigingsa-in om den hi. Ama piakkhiat nopna lungsim le hong itna tung ni simin ama kiang lungdamna i ko thei hi. Tua banah hong hehnep nading, tha hong piak nading le hong lamlah nading zong i ngen thei hi. Jehovah kiang thunget theihna pen a manpha takpi-in mu ihih leh hunpha i ngah simin amah hopih ding hi hang.

15. Thunget a man ciang ba’hang “amen” ci ihi hiam?

¹⁵ Thunget a man ciang ba’hang “amen” ci ihi hiam? “Amen” a cih kammal in “hi takpi hen” ahih kei leh “tua bangin piang takpi hen” ci-in khiatna nei hi. Tua pen thu i nget ciang i gen thute man takpi hi cih i lahna hi a, i lungsim takpi zong i lahna ahi hi. (Late 41:13) Mipi laka thu a kinget ciang, tua a kingen thu pen i thukimna i lahna-in awgingin ahih kei leh a kiza loin “amen,” ci a, i gen pen hoih hi ci-in Lai Siangtho in hong hilh hi.—1 Khang Tangthu 16:36; 1 Korin 14:16.

16. Jehovah in i thungetna hong dawng takpi a hiam? Na gen thei diam?

¹⁶ Jehovah Pasian in i thungetna hong dawng takpi a hiam? Hong dawng mah hi. Lai Siangtho in a mah pen “Thungetna a zapa,” na ci hi. (Late 65:2) Jehovah in mi awn tampite ii lungsim takpi tawh a thungetna uh za-in a tuam tekin na dawng hi.

17. Jehovah in i thungetnate hong dawn nading vantung mite le leitunga ama nasemte koi bangin na zang hiam?

¹⁷ Jehovah in vantung mite le leitunga om ama nasemte zangin i thungetnate hong dawng hi. (Hebru 1:13, 14) Lai Siangtho tel nading thu ngetna tawh huhna a nget zawh a sawt loin Jehovah Tecite khat a hawhna thu, thupiang tampi om hi. Leitung bupah “Lungdam nading Thu” tangkona-ah vantung mite zong kihel hi ci-in Lai Siangtho in gen hi. (Maangmuhna 14:6 Sim in.) Tua banah i haksat deuh ahih kei leh i kisap deuh thute Jehovah  kiang i ngen tek a, tua khit zawh ciang Khristian unaunu unaupate kiang pan i kisap huhnate i ngah hi.—Paunak 12:25; James 2:16.

18. Jehovah Pasian in ama kha siangtho le Lai Siangtho zangin i thungetna koi bangin hong dawng a hiam?

¹⁸ I thungetnate hong dawn nading Jehovah in ama kha siangtho zang hi. I haksatnate i phul zawh nading huhna i nget ciang, lamlahna le tha hong piak theih nading a kha siangtho zang thei hi. (2 Korin 4:7) Jehovah Pasian in Lai Siangtho zangin i thungetna hong dawng a, pilvang taka thu i khensat theih nading zong hong huh hi. Lai Siangtho i sim ciang hong huh thei ding Lai Siangtho munte i mu ding hi. Jehovah in kikhopna-ah i theihnop thu khat a genkhia dingin mi khat peuhpeuh na hanthawn thei a, ahih kei leh pawlpi sunga upa khat in Lai Siangtho mun khat hong genpih dingin na hanthawn thei hi.—Galati 6:1.

19. I thungetna Jehovah in hong dawng lo tawh ba’hang kibang thei a hiam?

¹⁹ Khat veivei, ‘Ka thungetna Jehovah in ba’hang hong dawng nai lo a hiam?’ ci-in i ngaihsun khathei hi. I phawk dingah Pasian in i thungetna koi bang danin ahih kei leh bang hunin hong dawng ding cih pen ama’n thei hi. Ama’n i kisapnate thei hi. Thu i nget denna in Pasian kiang i gen thute man takpi hi, cih leh ama tung upna i neih takpina a lak i suak hi. (Luka 11:5-10) Khat veivei Jehovah Pasian in i lamet loh dan tawh i thungetna hong dawng hi. Gentehna, haksatna i tuah laitak thu i ngen thei a, tua i haksatna pen hong hepkhiat sak loin, i thuakzawh nading tha hong pia ding hi.—Filippi 4:13 Sim in.

20. Jehovah kiang manmanin thu i nget ding ba’hang kisam a hiam?

²⁰ Jehovah kiang a manpha thunget theihna i neih pen bangzah takin thupha hi a hiam! Ama’n i thungetna hong ngaihsak ding hi cih i muang thei hi. (Late 145:18) Tua banah i lungsim takpi tawh Jehovah tung manmanin thu ngen lehang, amah tawh i kilawmtakna hong kip semsem ding hi.