1, 2. Mi te’n bang thute dong thei zel uh a hiam?

NAUPANG te’n thu tampi dong uh hi. Hilhcianna pawlkhat na gen hang, “Bang hang?” ci-in hong dong kikkik ding hi. Tua khit ciang hanciama na dawnkik hang, ‘Ba’hang maw?’ cikik veve ding hi.

² Khangno khangham ihi zongin thu i dong tek hi. Bang ne ding, bang silh ding, bang lei ding cih tawh kisai thute i dong thei hi. Ahih kei leh nuntakna le mailam thu tawh kisai a thupi i theih nop thute i dong thei hi. Ahih hang tua a thupi i theihnop thute i lungkim donga dawnna i ngah loh ciang thu i dong nuam nawn kei hi.

3. Mi a tamzaw in thei nuama a dot a thupi thute kitheizo ke’n teh ci-in ba’hang ngaihsun uh a hiam?

³ Tua a thupi i theih nop thute Lai Siangtho sungah a om tam? Mi pawlkhat in a om dingin um napi Lai Siangtho pen tel haksa salua uh hi. Biakna makaite le Siate bek in a thei dingin ngaihsun uh hi. Pawlkhatin thei lo ahih teh thei ke’ng a cih ding maizum uh hi. Nang e le bangci ngaihsut na hia?

4, 5. Na theihnop a thupi bang thute dong nuam na hiam? Na theihnop thute na kan suak ding ba’hang kisam hiam?

⁴ Hih thute nangh thei nuam kha ding hi teh: Ba’hang hih leitungah om ka hiam? Ka sih ciang bang piang ding ka hiam? Pasian pen koi bang a hiam? A minthang Sia ahi Jesuh in: “Ngen un; na nget uhleh hong kipia ding hi. Zong un; na zon uh leh na mu ding uh hi. Kongkhak na kiu un; na kiuh uhleh hong kihon ding hi” ci-in gen hi. (Matthai 7:7) Na lungmuan donga a thu na theih mateng na nungkik kei in.

 ⁵ “Na zon” leh na theihnop thute Lai Siangtho sungah na mu ding hi. (Paunak 2:1-5) Tua thute tel ding haksa lualo hi. Na sin thute pan tu hunin zong na nuntakna-ah lungnopna na ngah ding a, lametna hoih zong hong pia ding hi. Tu’n mi tampite’ lungsim a buaisak thu khat kikum ni.

6. Mi pawlkhat in amau thuak gimnate Pasian in hong kinpih kei hi ci-in ba’hang ngaihsun uh a hiam?

⁶ Pasian in ei hong don lo hi ci-in mi tampi in ngaihsun uh hi. Pasian in hong don takpi hileh leitung pen kilamdang mahmah in teh ci uh hi. Gal kidona, kimuhdahna le lunggimnate mun khempeuhah kimu hi. Mite cina-in gimna thuakin si uh hi. Mi pawlkhat in ‘Pasian in hong don ahih leh hih gimnate ba’hang maimang sak lo ahi hiam?’ ci-in lamdangsa uh hi.

7. (a) Biakna makaite’n Pasian pen gilo hi ci-in koi bangin mite hilh uh a hiam? (b) A piang siatnate tawh kisai-in Pasian i mawhsak theih lohna ahang ba’hang lungmuang thei ihi hiam?

⁷ Biakna makaite’n Pasian pen a gilopa-a mite’n a up theih nading khat veivei bawl uh hi. Thusia lasia a pian ciang tua pen Pasian deihna hi ci-in gen uh hi. Tua banga a pian ding Pasian in deih hi ci-in zong gen lai uh hi. Tua banga a gen uh pen Pasian a mawhsak taktak ahi uh hi. Ahih hang Pasian in siatna piangsak ngei lo hi ci-in Lai Siangtho in hong hilh hi. James 1:13 ah Pasian in mi kuamah siatna tawh ze-et lo cih hong gen a, “Mi khat peuhpeuh in tua bang ze-etna a thuak ciangin, ‘Pasian in kei hong ze-et hi, ci-in ngaihsun kei hen.’ Siatna in Pasian ze-et ngei lo a, mite a siat nadingin Pasian in zong ze-et ngei lo hi” ci hi. A cihnopna-ah siatnate a pian ding Pasian in a kham loh hang tua banga thu a pian ding cikmah hunin bawl ngei lo hi. (Job 34:10-12 Sim in.) Thukhat tawh genteh ni.

8, 9. I thuak thusia lasiate hangin Pasian mawhsak le’ng ba’hang thuman lo hiam? Gentehna pia in.

 ⁸ Khangno khat nu le pa tawh a tengkhawmin ngaihsun dih ni. A pa’n amah it mahmah a, thu khensat siam nading zong na hilh hi. Tua hi napi khangnopa in a pa langdo-in inn pan paikhia hi. Khangnopa in na hoih lo hong semin haksatna hong thuak hi. Innpan a paikhiat ding a pa’n khamlo ahih teh, tua haksatnate hangin a pa a kimawhsak thei diam? Kimawhsak thei lo ding hi. (Luka 15:11-13) Tua a pa mah bangin mihing te’n na hoih lo sep ding, langpan ding a teel uh ciang Pasian in na kham lo hi. Tua ahih manin thusia lasia a pian ciang Pasian piansak hilo hi cih i phawk ding kul hi. Pasian mawhsak le’ng thuman hetlo ding hi.

⁹ Pasian in thusia lasiate a tawpsak nai lohna ahang thuhoih khat na om hi. Hih thu tawh kisai Lai Siangtho in a genna Khenpi 11 ah sin ding hi teh. Ahih hang Pasian in a hong itna kimuang thei a, i haksatnate tawh kisai-in ama’n tavuan a neih lohlam i lungmuang thei hi. Man takin gen le’ng, tua haksatna sung pan hong honkhia zo Pasian longal kuamah om lo hi.—Isaiah 33:2.

10. Mi gilote hanga a piang siatnate khempeuh Pasian in a hoihkik dongin hong bawlphat sakkik ding hi cih ba’hang um zo ihi hiam?

¹⁰ Pasian pen siangtho hi. (Isaiah 6:3) A sep khempeuh siangin ninbang loin hoih hi. Tua ahih manin amah i muang thei hi. Mihingte pen Pasian tawh kibang lo a, khat veivei na hoih lo sem uh hi. A dik uliante nangawn in zong migilote hanga a piang siatnate a hoihkik dongin bawl zo lo uh hi. Pasian’ neih vangliatna bang kuamah in nei lo hi. Mi gilote hanga a piang siatnate khempeuh a hoihkik dongin hong bawlphat sakkik thei a, zong hong bawlsak ding hi. Pasian in thu hoihlo khempeuh maimangsak ding hi.—Late 37:9-11 Sim in.

11. Na thuak gimna tawh kisai-in Pasian a lung a nuam hiam?

¹¹ Leitunga thupiangte le nang ii thuak thute Pasian in a muh ciang a lung a nuam tam? Pasian in “thutang deih” hi ci-in Lai Siangtho in hong hilh hi. (Late 37:28) Tua ahih manin Pasian in thumanna le thumanlohna pen thupi ngaihsut mahmah hi. Mihing te’n gimna a thuak uh ciang tua pen Pasian in na muhdah hi. Nidang lai-in leitungah siatna le gitlohna tawh kidim a, tuate Pasian in a muh ciang a “lungsim dahsak hi” ci-in Lai Siangtho in hong gen hi. (Piancilna 6:5, 6) Pasian pen kikheel lo hi. (Malakhi 3:6) Pasian in nang hong don takpi hi ci-in Lai Siangtho in gen hi.—1 Peter 5:7 Sim in.

12, 13. (a) Ba’hang mite itin don ihi hiam? Leitunga gentheihnate i muh ciang i lung a nuam hiam? (b) Gentheihnate le thuman lohnate khempeuh Pasian in hong hepkhiatsak ding cih ba’hang muang thei ihi hiam?

¹² Pasian in ama lim bangin ei hong bawl hi ci-in zong Lai Siangtho in gen hi. (Piancilna 1:26) Cihnopna-ah Pasian in ama hoihnate tawh a kibangin hong bawl cihna hi. Tua ahih manin mawhna neilo mite gimna a thuak uh na muh ciang na lung nuam lo ahih leh Pasian in tua bang thu a muh ciang a lung nuamlozaw kan ding hi. Tua pen koi ci theithei ding ihi hiam?

¹³ Pasian pen “itna” hi ci-in Lai Siangtho in hong hilh hi. (1 Johan 4:8) Pasian in itna bulphuhin na khempeuh bawl hi. Pasian in hong it ahih manin en’ zong i it thei hi. Hih thu ngaihsun in: Nangh vang a nei hi lecin hih leitunga gentheihnate le thuman lohnate khempeuh hemkhia ding hi lo na hi hiam? Hemkhia ding hi teh. Ba’hang hiam cih leh mite it na hih man hi. Pasian in e le? Ama’n vang nei-in ei hong it ahih manin gentheihnate le thuman lohnate khempeuh hong hepkhiatsak  ding hi. Hih laibu a kipatna-a Pasian kamciamte khempeuh hong tangtung takpi ding hi! Tua pen lungmuang thei hi teh. Ahih hang tua kamciamte na muan theih nading Pasian thu na theih semsem ding kisam hi.

14. Pasian’ min in bang a hiam? A min zanga i lawh ding a thupina koici theih ihi hiam?

¹⁴ Mi khat peuhpeuh ii lawm na suah nop leh a thu-in bang gen masa na hiam? Na min hi. Pasian in min a nei mah hiam? Biakna a tamzaw in a min pen “Pasian” ahih kei leh “Topa” ci uh hi. Ahih hang tua pen min hi lo hi. Tuate pen za tawh kisai a kipia “kumpi” ahih kei leh “president” cih tawh kibang hi. Pasian in ama min pen Jehovah hi ci-in hong gen hi. Late 83:18 (NW) ah: “Jehovah a kici min nei nangmah bek leitung khempeuhah a Sangpenpa na hihna amaute theisak in” ci-in gen hi. Lai Siangtho atte in Pasian’ min tul tampi na zang uh hi. Jehovah in ama min hong theisak nuam a, a min zanga i lawh ding zong deih hi. Pasian in a min hong gen ahih teh ama lawm na suak thei hi.

15. Jehovah cih Pasian min ii a khiatna in bang hiam?

¹⁵ Jehovah cih Pasian’ min pen a khiatna thuk mahmah hi. A khiatna pen Pasian in  kamciam a piak khempeuh tangtungsak zo a, a ngimna khempeuh a lawhcing dingin sem zo cihna hi. Ama ngimna kuamah in khaktan zo lo hi. Hih min pen Jehovah bekin nei thei hi. *

16, 17. (a) “Vanglian” (b) “Khang tawntung a Kumpipa” (c) “Piangsakpa” cihte ii a khiatna bang a hiam?

¹⁶ Tu-a i simsa mah bangin Late 83:18 ah Jehovah pen: “Nangmah bek leitung khempeuhah a Sangpenpa na  hi” hi ci hi. Tua mah bangin Maangmuhna 15:3 ah zong: “A Vanglian Topa Pasian aw, na nasepnate lamdangin lian mahmah hi. Khang tawntung a Kumpipa aw, na nasepnate-ah thumanin na thutang hi” ci hi. “Vanglian” a cih ii a khiatna in bang a hiam? A khiatna pen khuavannuai-ah kuamahpeuh sangin Jehovah vanglianzaw cihna hi. Tua khit teh “Khang tawntung a Kumpipa” cih in a tawntungin nungta cihna hi. Late 90:2 ah a tawntung a kipan a tawntung dongin Pasian na hi hi ci hi. Tua pen lamdang mahmah hilo ahi hiam!

¹⁷ Jehovah bek Piangsakpa ahi hi. Maangmuhna 4:11 ah: “Kote’ Topa Pasian aw, nangmah in na khempeuh piangsakin, nangma deihna bangin na khempeuh omin, na khempeuh kipiangsak ahih manin, minthanna, pahtawina, le vangliatna na ngah tawntung dingin a kilawm hi” ci hi. Vantunga om vantung mite a kipan vana aksite, singgah singkungte le tuipi sunga om ngasate dongin—na ngaihsut theih khempeuh Jehovah bawl vive ahi hi!

18. Mi pawlkhat in Pasian lawm kisuak thei ngei ke’n teh ci-in ba’hang ngaihsun uh a hiam? Tua thu Lai Siangtho in bangci gen hiam?

¹⁸ Mi pawlkhat in Jehovah ii hoihnate a simkhak uh ciang kineu muhin ‘Pasian pen vanglian lua, thupi lua-in ei tawh kigamla lua ahih manin kei ba’hang hong don ding ahi hiam?’ ci-in ngaihsun uh hi. Hi banga i ngaihsut ding Pasian in deih ding maw? Deih lo e. Jehovah in ei tawh hong kinai nuam hi. Lai Siangtho in “eite kiang panin Pasian gamla om het lo hi” ci-in gen hi. (Sawltak 17:27) Pasian in amah tawh na kinai ding deih a, “Amah in zong hong nai ding hi” ci-in hong kamciam hi.—James 4:8.

19. (a) Pasian lawm koici suak thei ding na hiam? (b) Jehovah ii hoihnate lakpan bang deihpen na hiam?

¹⁹ Pasian lawm koici suak thei ding na hiam? Jesuh in: “Nang bek a man Pasian na hihna thu le nangmah in na hong sawl Jesuh Khrih hong theihna pen amaute adingin nuntak tawntung ngah nading lampi ahi hi” ci hi. (Johan 17:3) Thu na sin suak leh Jehovah le Jesuh thu na thei ding hi. Tua ciang tawntung nuntakna na ngah thei ding hi. Gentehna-in, Pasian pen “itna” hi cih i sin khin hi. (1 Johan 4:16) Tua tham loh adang hoihna tampi zong nei hi. Jehovah pen “hehpihna nei-in a dik Pasian; lungduai-in itna kip le thutakna tawh a dim” ci-in Lai Siangtho in hong gen hi. (Paikhiatna 34:6; 2 Peter 3:9) Jehovah “hoihin mawhna na maisak” nuam hi. (Late 86:5) Zong a citak Pasian ahi hi. (1 Korin 1:9) Lai Siangtho sungah ama thu na sim ciangin ama hoihna tampi na thei semsem ding hi.

20-22. (a) Pasian pen muthei lo ihih leh amah tawh i kinaih lam koici theithei ding ihi hiam? (b) Mi pawlkhat in Lai Siangtho na sin pen hong khawlsak nuam leh nangh bang cih ding na hiam?

²⁰ Pasian pen muthei lo na hih leh amah tawh kinai hi cih koi bangin theithei ding na  hiam? (Johan 1:18; 4:24; 1 Timoti 1:17) Lai Siangtho sungah Jehovah thu na sim teh mi khat bangin Pasian na mu ding hi. (Late 27:4; Rom 1:20) Jehovah thu na sin semsem leh amah na itna hong khang semsem ding a, na kinaih semsem lam thei ding hi teh.

²¹ Jehovah pen eite’ Pa ahihlam na theitel ding hi. (Matthai 6:9) Ama’n nuntakna hong pia-a a hoihpen a i nuntak ding hong deihsak hi. Hih pen itna nei Pa in a tate ading a deihsakna ahi hi. (Late 36:9) Jehovah’ lawm suak thei hi teh ci-in Lai Siangtho in hong hilh hi. (James 2:23) Van le lei a Piangsakpa Jehovah in a lawm dingin hong deih cih ngaihsun in!

²² Mi pawlkhat in Lai Siangtho na sin pen hong khawlsak nuam ding hi. Biakna na khel khak ding lau-uh hikha thei ding hi. Ahih hang Jehovah’ lawm na suah ding pen khat peuhpeuh hangin khawl sawm kei in. Amah pen na lawm neih khempeuh lakpan Lawm hoihpen ahi hi.

23, 24. (a) Ba’hang thu i dot suak ding kul hiam? (b) A zoma khenpi-ah bang thu kikum ding ihi hiam?

²³ Lai Siangtho na sin laitakin na tel loh thute omkha thei ding hi. Thu dot ding ahih kei leh huhna na nget ding maizum kei in. Jesuh in naupang bangin i kiniamkhiat ding hong gen hi. (Matthai 18:2-4) Naupangte in thu tampi thei nuama dong uh hi. Pasian in a dawnnate hong theisak nuam hi. Tua ahih manin Lai Siangtho limtaka na sin ciang na sin thute thuman hi cih kician sak in.—Sawltak 17:11 Sim in.

²⁴ Jehovah thu sin theih nading a hoihpenin Lai Siangtho sinna ahi hi. A zoma khenpi-ah Lai Siangtho pen laibu dang khempeuh tawh a kilamdanna i mu ding hi.