1, 2. Jehovah’ lawm pawlkhat kuate ahi uh hiam?

NA lawm dingin kua deih na hiam? Dik na sak, na lungsim kituakpih khat peuhpeuh hi ding hi. A lungsim zong hoihin, na etteh nop hoihnate zong a nei khat hi ding hi.

² Jehovah Pasian in ama lawm dingin mi pawlkhat na teel hi. Gentehna, Abraham pen Jehovah ii lawmte lakpan khat ahi hi. (Isaiah 41:8; James 2:23) Jehovah in David zong na it hi. David pen ‘Ka lungsim tawh a kituak mi,’ na ci hi. (Sawltak 13:22, NW) Tua banah kamsang Daniel pen Jehovah ading ‘manpha mahmah’ hi.—Daniel 9:23, NW.

3. Abraham, David le Daniel-te Jehovah’ lawm a suahna uh ahang bang a hiam?

³ Abraham, David le Daniel te koi bangin Jehovah’ lawm hong suak uh a hiam? Jehovah in Abraham kiang: “Nang in ka thu na mang hi,” a ci hi. (Piancilna 22:18) Jehovah in ama thu kiniamkhiat takin a mangte ii lawm hong suak hi. Minam khat zong ama lawm hong suak hi. Jehovah in Israel minamte kiang: “Ka thu hong mang un; tua hileh note’ Pasian ka hi ding a, note pen ka mite na hi ding uh hi,” ci-in thu na hilh hi. (Jeremiah 7:23) Tua ahih manin ama’ lawm suak nuam na hih takpi leh nangh zong Jehovah thu na mang ding kisam hi.

4, 5. Jehovah in ama lawmte koi bangin kem a hiam?

⁴ Jehovah in “ama lamah a lungsim a paubaang lo mite’ tangin ama vangliatna a lak dingin” lampi zong hi ci-in Lai Siangtho in gen hi. (2 Khang Tangthu 16:9) Late  32:8 ah Jehovah in ama lawmte kiang: “Na pai nading lampi lakin ka hong hilh ding a, ka mit tawh hong enin thu kong hilh ding hi,” ci-in kamciam hi.

⁵ A vanglian gal khatin Pasian’ lawm ihihna pan a hong khawlsak nuam hi. Ahih hang Jehovah in ei hong kem nuam hi. (Late 55:22 Sim in.) Jehovah’ lawm ihih mah bangin i lungsim khempeuh tawh ama na i sem hi. Haksatna nuai-ah i om zongin ama tung i citak hi. Late a at pa mah bangin lungmuanna i nei hi. Ama’n Jehovah tawh kisai-in: “Ka taklamah amah om ahih manin ka kiling kei ding hi,” ci-in na at hi. (Late 16:8; 63:8) Pasian lawm ihihna pan i khawl nading Satan in koi bangin hanciam a hiam?

6. Satan in mihingte tawh kisai-in hang takin bang gen a hiam?

⁶ Khenpi 11 ah Satan in Jehovah a tona, zuaukhempa in a ngawhna, Adam le Eve in a man le a man lo amau thu-in a khensat ding a phal loh pen Pasian a thuman lo hi ci-a a ngawhna thute i sin khin hi. Lai Siangtho sunga Job laibu sungah Pasian lawm a suak nuam mihingte zong Satan in na ngawh hi ci-in hong hilh hi. Mihing te’n Pasian na a sep uh pen Pasian kiang pan na a ngah man uh hi, a it man uh hi lo hi ci-in Satan in hang takin na gen hi. Satan in Pasian a langpang dingin kuamapeuh ka bawl thei hi, ci-in zong na gen lai hi. Tu’n Job kiang pan i sin theih ding thute le Jehovah in amah bangci kep hiam cih i sin ding hi.

7, 8. (a) Jehovah in Job ii gamtatna bangci muh a hiam? (b) Job tawh kisai Satan in bang gen a hiam?

⁷ Job pen kua a hiam? Amah pen a beisa kum 3,600 lai-in a nungta mihoih khat ahi hi. Tua hun laitakin Jehovah in leitungah Job tawh a kibang mi kuamah om lo hi, na ci hi. Job in Pasian zahtak mahmahin gamtatna hoih lote mudah hi. (Job 1:8) Hi mah hi, Job pen Jehovah ii lawm hoih hi takpi hi.

 ⁸ Job in ama angsung khualna-in Pasian na a sem hi, ci-in Satan in hang takin gen hi. Satan in Jehovah kiang: “Amah le a innkuan le a neihsate khempeuh na hutna-in a kimkotah dai khan hi lo na hi hiam? Ama hihna khempeuhah thupha na pia a, genzawh lohin ama neihsa pung hi. Ahi zongin na khut zanin ama neihsa khempeuh suksak lecin na maitang mahmahah nang hong samsia pah ding hi,” na ci hi.—Job 1:10, 11.

9. Jehovah in Satan bang hih dingin na phal hiam?

⁹ Job in Jehovah na a sep pen ama kiang pan thupha a ngah man bek hi ci-in Satan in na ngawh hi. Tua banah Job in Jehovah na a sep nawn loh nading ka bawlzo ding hi, na ci lai hi. Jehovah in Satan gen a thukim loh hang, Job in amah a it mana ama lawm hi takpi hiam cih a ze-et ding na phal hi.

10. Satan in Job koi bangin do a hiam? Job in koi bangin na thukkik a hiam?

¹⁰ A masa penin Satan in Job ii neihsa ganhing khempeuh guksak ahih kei leh suksiatsak hi. Tua khit teh Job ii sila tampi Satan in that hi. Job in a neihsa khempeuh summang hi. A nunung pen a dona-ah Satan in Job ii a ta sawmte huihpi nung sakin that hi. Ahih hang Jehovah tung Job na citak suak hi. “Hih thu khempeuhah Job khial lo a, Pasian zong mawhsak lo hi.”—Job 1:12-19, 22.

11. (a) Satan in Job koi bangin na ze-et kik a hiam? (b) Job in koici thukkik a hiam?

¹¹ Satan nungkik tuan loin: “Tu-in na khut zan inla, ama sa le a guh suksak lecin nangma maitang mahah pel loin nang hong samsia ding hi,” ci-in Pasian na to veve hi. Tua khit teh Satan in, a na mahmah natna tawh Job na do hi. (Job 2:5, 7) Tu’n zong Jehovah tung Job na citak veve hi. Ama’n: “Ka nuntak laiteng, kei a thuman hi’ng, ka cihna thu ka khia ngei kei ding hi!” a ci hi.—Job 27:5.

12. Satan pen zuaukhempa ahihna Job in koi bangin na lak hiam?

¹² Job in Satan’ ngawhna le gimna hizah takin a thuakna  ahang bangmah thei lo hi. A thuak gimnate Jehovah hang hi, ci-in ngaihsun hi. (Job 6:4; 16:11-14) Tua bang ahih hang Jehovah tung Job na citak veve hi. Tu’n thu siang takin kithei ta hi. Job pen angsung bek a en mi hi lo hi. Pasian it ahih manin amah pen Pasian’ lawm ahi hi. Satan’ ngawhnate khempeuh pen zuau ahi hi.

13. Job a cihtak manin bang thalawh a hiam?

¹³ Van tungah bang thu piang hiam cih Job in a theih loh hang Pasian tung citakin Satan pen gilopa ahihlam na lak hi. Job pen a citak lawm hoih ahih manin Jehovah in thupha na pia hi.—Job 42:12-17.

14, 15. Satan in leitunga numei le pasal khempeuhte bang gensia a hiam?

¹⁴ Job tunga a piang thute pan a thupi mahmah thu tampi na sin thei hi. Tu hunin zong Pasian na i sep pen Pasian kiang pan thupha i ngah man bek hi ci-in Satan in ei hong gensia hi. Job 2:4 ah Satan in: “Mi khat in ama nuntakna a hutna-in a neih khempeuh pia ngam ding hi,” ci-in gen hi. Tua ahih manin Satan in Job bek hi lo, leitunga numei le pasal khempeuh in amau angsung bek en uh hi, ci-in zong a gensia hi. Job a sihzawh kum tampi khit ciang, Jehovah le ama nasemte Satan in na gensia lai hi. Gentehna, Paunak 27:11 ah: “Ka ta aw, pil in; tua hileh ka lungdam ding a, kei hong mawhsak [ahih kei leh, gensia] nuamte in bangmah hong cih thei lo ding hi,” ci-in i sim hi.

¹⁵ Jehovah thu na man ding, ama lawm citak na suah nading na teel thei a, tua na teelna in Satan pen zuaukhempa ahihlam a lak na hi hi. Pasian lawm na suah nading na nuntakna-ah kikhelna lianpi na bawl ding a kisap leh tua pen na bawl khempeuh lakpan a hoihpen khensatna ahi hi! Tua na khensatna pen thupi mahmah hi. Satan in nangh haksatna na tuah ciang Pasian tung citak kei ni teh, ci-in hong to hi. Ama’n Pasian tung i cihtak loh nading hong lim khem ding hi. Koi bang danin maw?

16. (a) Pasian na sepna pan mite a khawl nading Satan’ zat khemnate in bang a hiam? (b) Jehovah Pasian na, na sep nawn loh nading Dawimangpa in koi bangin hong hanciam ding a hiam?

 ¹⁶ Satan in a tuamtuam zangin Pasian’ lawm ihihna pan i khawl nading hanciam hi. Ama’n “humpinelkai bangin a nek theih ding zongin vak kawikawi” in hong do hi. (1 Peter 5:8) Na lawmte, na innkuanpihte ahih kei leh midangte in thu man taka na sepna le Lai Siangtho na sinna pan na khawl nading a hanciam uh ciang lamdang na sa kei in. Nang hong kilangdo hi, ci-in ngaihsun khathei ni teh. * (Johan 15:19, 20) Satan zong amah le amah “Pasian’ vantungmi tawh a kibangin kibawltawm thei hi.” Tua ahih manin ama’n Jehovah thu i man loh nading hanciamin hong khem kha ding hi. (2 Korin 11:14) Pasian na i sepna pan i khawl nadinga Satan ii a zat khemna nam khat pen Pasian na a sem dingin kicinna nei ngei kei ning ci-a i ngaihsut nading ahi hi.—Paunak 24:10.

17. Jehovah thu ba’hang mang ihi hiam?

¹⁷ Jehovah thu i mang ciang Satan pen zuaukhempa ahihlam a lak ihi hi. Thu i mang nading bangin hong huh ding a hiam? Lai Siangtho in: ‘TOPA note’ Pasian, na lungsim khempeuh uh, na nuntakna khempeuh uh, le na thahatna khempeuh uh tawh na it un,’ ci hi. (Thu Hilhkikna 6:5) Jehovah thu i mang hi. Ba’hang hiam cih leh amah it ihih man hi. Jehovah i itna hong khan semsemna tawh kizui-in sep dinga ama hong nget na khempeuh i sem nuam hi. Sawltak Johan in: “Pasian i it ciangin ama thupiakte a zui ihi hi. Eite adingin ama thupiakte  zuih ding a haksa lua hi lo hi,” ci-in na at hi.—1 Johan 5:3.

18, 19. (a) Jehovah in hoih lo hi, ci-a a gen thu pawlkhatte in bang a hiam? (b) I sepzawh loh ding na khat peuhpeuh a sem dingin Jehovah in hong sawl lo hi, cih koi bangin thei ihi hiam?

¹⁸ Ahih hang Jehovah in hoih lo hi, ci-a a gen na pawlkhat in bang a hiam? Tua thu pawlkhatte “ Jehovah In A Muhdahte Mudah In” cih bawm sungah na en in. A masa-in tuate laka pawlkhatte tua zahpi-in sia lua kei, ci-in ngaihsun khathei ding hi teh. Ahih hang Lai Siangtho sunga munneute simin tua thute limtakin na ngaihsut ciang Jehovah’ thukhamte zuihna in pilna ahihlam na theitel ding hi. Na nuntakna-ah kikhelna pawlkhat na bawl ding kisam hi ci-in zong ngaihsun khathei ding hi teh. Tua banga na kikhel pah ding haksa khathei ding hi. Ahih hang tua bangin kikhelna na bawl leh Pasian ii lawm citak na hihna pan hong pai lungnopna le lungdaihna na ngah ding hi. (Isaiah 48:17, 18) Tua banga kikhelnate  i bawl ding piang thei hi cih en’ koici theih ihi hiam?

¹⁹ I sep zawh loh ding na khat peuhpeuh a sem dingin Jehovah in cikmah hunin hong sawl lo ding hi. (Thu Hilhkikna 30:11-14) Pasian pen i Lawm takpi ahih mah bangin ei le ei i kitheihna sang ama’n ei hong theizaw hi. I thanemnate le i thahatnate ama’n thei hi. (Late 103:14) Sawltak Paul in: “Pasian in citakin a thuciamna lenkip ahih manin note’ thuak zawh loh ding ze-etna hong tuaksak lo ding hi. Ze-etna na tuah hun ciangin zong na thuakzawh nading uh thahatna hong guan ding ahih manin na suahtak zawh nading uh lampi hong honsak ding hi,” ci-in hong hanthawn hi. (1 Korin 10:13) Jehovah in thuman i sepzawh nading a tawntungin tha hong pia ding hi cih i muang thei hi. Ama’n haksatna na tuah ciang na thuakzawh nading “a lian mahmah vangliatna” hong pia-in hong huh ding hi. (2 Korin 4:7, ZSV) Tua banga haksatnate a tuak ciang Jehovah huhna a ngah  khit teh Paul in: “Khrih in a hong piak vangliatna tawh hihte khempeuh nawkzawh nading thahatna a nei ka hi hi,” na ci hi.—Filippi 4:13.

20. Na etteh ding thuhoihte in bang a hiam? Ba’hangin na etteh ding kisam a hiam?

²⁰ Jehovah’ lawm ding i ut leh Jehovah in hoih lo ci-a a gen thute i gamtatna pan i khawl loh phamawh banah tua sanga i sepzawk ding kisam hi. (Rom 12:9) Pasian’ lawmte in ama it thute it uh hi. Tua thute Late 15:1-5 ah na gen hi. (Sim in.) Jehovah’ lawmte in ama hoihnate ahi “itna, lungdamna, lungnopna, lungduaina, migitna, hoihna, cihtakna, dikna le pumpi ki-ukzawhna” te ettehin lakkhia uh hi.—Galati 5:22, 23.

21. Pasian itna na lahkhiat theih nading bang na kan ding kisam hiam?

²¹ Tua a ithuai thuhoihte na lahkhiat theih nading bang na kan ding kisam a hiam? Lai Siangtho manmanin simna le sinna tawh Jehovah in a it thute na kan ding kisam hi. (Isaiah 30:20, 21) Tua banga na sep leh Jehovah na itna hong khang ding a, tua banah na itna hong khanna tawh kizui-in ama thu na mang nuam ding hi.

22. Jehovah thu na man leh bang thalawh ding na hiam?

²² Na nuntakna-ah kikhel ding na kisam khathei a, tua kikhelna pen puan lui suah a, puan thak a silhkik tawh kigenteh thei hi. Lai Siangtho in na “ngeina lui le gamtatna lui” te suahkhia-in, “ngeina thak tawh kituakin” na gamtat ding kisam hi, ci hi. (Kolose 3:9, 10) Tua banga i kikhel ding a baih loh hang, Jehovah thu mangin tua banga kikhelna i bawl ciang, ama’n “noptuamna lian [‘thupha tampi,’ NW]” hong pia ding ci-in a kamciam hi. (Late 19:11) Jehovah’ thu man ding teel inla, Satan pen zuaukhempa ahihlam na lak in. Mailam thupha ngahnopna hang tawh hi loin angsung khual lo itna tawh Pasian na na sem in. Tua ciangin Pasian lawm na suak takpi ding hi!