1. Nuntakna kua hong piak a hiam?

JEHOVAH pen “a nungta Pasian” ahi hi. (Jeremiah 10:10) Amah pen Piangsakpa hi a, ama’n nuntakna hong pia hi. Lai Siangtho in: ‘Nangmah in na khempeuh piangsakin, nangma deihna bangin na khempeuh omin, na khempeuh kipiangsak hi,’ na ci hi. (Maangmuhna 4:11) Hi mah hi, Jehovah in i nuntak ding deih hi. Nuntakna pen ama hong piak a manpha letsong ahi hi.—Late 36:9 Sim in.

2. I nuntakna-ah i lawhcin nading bang i sep ding kisam a hiam?

² Jehovah in i nuntak suak theih nadinga a kisam nate hong pia a, tua sungah an le tuite kihel hi. (Sawltak 17:28) Tua bek tham loh lungnuam taka i nuntak ding deih hi. (Sawltak 14:15-17) I nuntakna-ah i lawhcin theih nading Pasian’ thukhamte i zuih ding kisam hi.—Isaiah 48:17, 18.

3. Kain in Abel a thah ciang Jehovah in bang na cih hiam?

³ Lai Siangtho in i nuntakna le midangte ii nuntakna pen Jehovah ading manpha mahmah na ci hi. Gentehna, Adam le Eve-te ta—Kain—in a sanggampa Abel tung a heh mahmah lai-in Jehovah in Kain kiang na hehna na kidop ding kisam hi ci hi. Ahih hang Kain in thu ngai loin hong heh semsem a, “A sanggampa Abel a that hi.” (Piancilna 4:3-8) Kain in Abel that ahih manin Jehovah in dan na pia hi. (Piancilna 4:9-11) Tua ahih manin hehna le muhdahna in ei hong hiamtatsak thei ahih kei leh hong gilosak thei ahih teh lauhuai mahmah hi. Tua bang tawh a kibang mite tawntung nuntakna ngah lo ding uh hi. (1 Johan 3:15 Sim in.) Jehovah’ lungkim ding i ut leh mi  khempeuh i it theih nading i hanciam loh phamawh hi.—1 Johan 3:11, 12.

4. Pasian in Israel minamte kiang a piak thukham nam khatin letsong ahi, nuntakna tawh kisai bang hong theisak a hiam?

⁴ Tua zawh kum tul tampi khit ciang Jehovah in Moses kiangah Thukham Sawm a piak ciang nuntakna pen a manpha-in a muhna na lak hi. Tuate lakpan thukham khat pen: “Mi na that kei ding uh hi,” cih hi. (Thu Hilhkikna 5:17) Mi khatin ngimna tawh mi khat peuhpeuh a thah leh, amah kithat ding hi.

5. Nau bawlsiatna tawh kisai Pasian in bangci ngaihsut a hiam?

⁵ Nau bawlsiatna tawh kisai Pasian in bangci ngaihsut a hiam? A suak nai lo naungek ii nuntakna nangawn Jehovah ading manpha mahmah hi. Jehovah in Israel minamte kiang a piak Thukham sungah mi khat in numei naupaii khat liamsakin a nau tolh a, a sih leh tua mi kithat ding ci hi. (Paikhiatna 21:22, 23 Sim in; Late 127:3.) Hih thu in nau bawlsiatna pen khial hi cih hong hilh hi.—A Nunga Chiaptehna 28 en in.

6, 7.  Nuntakna pen a manpha a i muh lam Jehovah tung koici lak ding ihi hiam?

⁶ I nuntakna le midangte’ nuntaknate a manpha mahmaha i muh lam Jehovah tung koici lakthei ding ihi hiam? I nuntakna ahih kei leh midangte nuntakna a lauhuaisak bangmah i sep lohna tawh kilak thei hi. Tua ahih manin za ahi zong, kun’za ahi zongin khamtheih guihtheih zatuite i zang kei hi. Ba’hang hiam cih leh tuate in i nuntakna hong siasakin, zong hong sisak thei ahih man ahi hi.

⁷ I nuntakna le i pumpi Pasian hong piak hi a, tua pen ama deihna bangin i zat ding kisam hi. Tua ahih teh i pumpi hoih taka i kep ding kisam hi. Tua bangin i don kei leh Pasian mai-ah a siangtho lo i suak ding hi. (Rom 6:19; 12:1; 2 Korin 7:1) Nuntakna pen a manpha-in i muh kei leh nuntakna hong pia Jehovah i bia thei kei ding hi. Gamtat hoih lohna pan i kikhel ding a haksat mahmah hang, nuntakna pen a manpha-in mu ihih manin hanciamin kikhel lehang Jehovah in hong huh ding hi.

8. Midangte nuntakna ahih kei leh i nuntakna a kituahsiat loh nading bangci kiciansak ding ihi hiam?

 ⁸ Nuntakna pen a manpha letsong ahihlam i sin khin hi. Jehovah in midangte nuntakna le i nuntakna cikmah hunin i tuahsiat loh nading i hihtheih zahin i kidop ding hong lamen hi. I mawtaw, mawtaw saikel, ahih kei leh adang a kituang thei mawtawte i hawl ciang, tua thu i zui hi. A lauhuai kimawlnate ahih kei leh ngongtat a kimawlnate i peel hi. (Late 11:5) I inn zong a muanhuai nading ihih theih zahin i bawl ding kisam hi. Jehovah in Israel mite kiang: “Na inn tung panun mi khat kia-in mi sihna hanga mawhna na innsung uhah na tunsak khak loh nadingun inn thak na lam uh ciangin na innkhumzang uhah tangban [ahih kei leh, umna niam] na khung ding uh hi,” ci-in thu pia hi.—Thu Hilhkikna 22:8.

9. Ganhingte’ tungah bangci bawl ding ihi hiam?

⁹ Ganhingte tung i bawl dan zong Jehovah ading thupi mahmah hi. I nek ding le niklepuan ading ganhingte thah ding hong phal a, i nuntakna hong lauhuaisak ahih leh tua ganhing i thah ding hong phal hi. (Piancilna 3:21; 9:3; Paikhiatna 21:28) Ahih hang ganhingte bawlsia ahih kei leh kimawlna peuhin i that kei hi.—Paunak 12:10.

10. Sisan pen nuntakna tawh a kibatna koici theih ihi hiam?

¹⁰ Sisan pen Jehovah ading siangtho hi. Ahang pen nuntakna aitaang ahih man hi. Kain in Abel a thah khit ciang Jehovah in Kain kiang: “Na sanggampa’ sisan, leilak panin kei tungah hong kiko hi,” na ci hi. (Piancilna 4:10) Abel sisan pen ama nuntakna aitaang ahih teh Kain in Abel that ahih manin Jehovah in daan na pia hi. Noah’ hun Tuiciin a tun khit ciang sisan pen nuntakna aitaang mahin Jehovah in na genkik hi. Jehovah in Noah le a innkuanpihte ganhing sa a nek ding na phal hi. Ama’n: “A nungta a gamtang peuhmah, note adingin an hi ding hi. Kung hing khempeuh ka hong piak bangin na khempeuh  zong note ka hong pia hi,” ci hi. Ahih hang Jehovah in a nek loh ding thu khat na pia a: “A nuntakna ahi—a sisan—pen a sa tawh na ne khawm kei bek ding uh hi,” ci hi.—Piancilna 1:29; 9:3, 4.

11. Pasian in Israel minamte kiang sisan tawh kisai-in bang thu pia a hiam?

¹¹ Jehovah in Noah kiang sisan ne kei un a cih zawh kum 800 khit ciang ama mite kiang: “Israel mite khatpeuh hitaleh, amaute lakah a peem khualmi khatpeuh hitaleh in zong, sabetna-ah, a kine thei ding gamsa khatpeuh hitaleh vasa hitaleh a man pa in a si buakhia-in leivui tawh vuk ding hi,” ci-in thu na pia leuleu hi. Tua banga a cih khit ciang: “Si na ne kei ding uh hi,” a ci hi. (Siampi Laibu 17:13, 14) Ama mite in sisan pen a siangtho-in a muh ding uh Jehovah in tuni ciang dong na deih lai hi. Amau a sa ne thei a, ahih hang sisan ne thei lo uh hi. Nek dingin sa a gawh uh leh a sisan lei-ah a buak ding uh kisam hi.

12. Khristian te’n sisan bangci muh uh a hiam?

¹² Jesuh a sih zawh kum a sawt loin, Jerusalem khua-a om Khristian pawlpi sunga sawltakte le upate in Israel minamte kiang a kipia Thukhamte sungpan bang thukham teng Khristian te’n a zuih suak ding uh kul hiam, cih a khensat dingin kimuh khopna nei uh hi. (Sawltak 15:28, 29 Sim in; 21:25.) Sisan pen tu dong mah Jehovah ading a manphatna le tu dong mah a siangtho-in a muh suak ding uh a kisapna a teltheih nading Jehovah in na huh hi. Khristiante masate in sisan ne ahih kei leh dawn lo uh a, si a kician a a paikhiat kei leh sa a ne kei uh hi. Sisan a nekkhak uh leh milim abia ahih kei leh nulepa thangtatte mah bangin mi hoih lo suak ding uh hi. Tua hun a kipan Khristian mante in sisan nek ding ahih kei leh dawn ding na nial uh hi. Tu hunin e leh? Jehovah in tuni ciang dong mah sisan pen a siangtho-in i muh ding a deih hi.

13. Khristian te’n si thun ding ba’hang sang lo uh a hiam?

¹³ Tua bang ahih leh Khristian te’n si thun ding zong  nial uh a cihna maw? Hi mah, si thun ding nial uh hi. Sisan nek loh ding ahih kei leh i dawn loh ding Jehovah in thu hong pia hi. Siavuan khat in zu dawn kei in, hong ci leh na thagui sungah thun ding na hiam? Thun het lo ding hi teh! Tua mah bangin sisan ne ahih kei leh dawn kei in, ci-a thu kipiak pen si thun ding zong i san loh ding a cihnopna mah ahi hi.—A Nunga Ciaptehna 29 en in.

14, 15. Khristian khat ading Jehovah thu mang ding le nuntakna pen a thupi muh ding bangzah takin thupi a hiam?

¹⁴ Si na thun kei leh si ding hi teh, ci-in siavuan khat in hong gen leh bang cih ding ihi hiam? Sisan tawh kisai Pasian thukham i mang ding le mang loh ding pen ei mimal khatciat ii khensat ding ahi hi. Khristian te’n Pasian letsong ahi, nuntakna pen thupi muh mahmah uh a, nuntak theih nading sisan tang-a a kizang kikhoinate zong uh hi; ahih hang si thun ding pen sang lo uh hi.

¹⁵ I cidam suak nading i hanciam suak ding a, ahih hang nuntakna pen Pasian ading manpha lua ahih manin si thun ding pen i sang kei hi. Ama thu mang loin i khan a sau zawk na’ng i hamciam sangin Jehovah thu i man ding thupi zaw hi. Jesuh in: “Hih a leitung nuntakna a hu nuamte in a nuntakna bulpi nangawn tawh suplawh ding a, keima hangin hih a leitung nuntakna a suplawhte in a nuntakna bulpi huzo ding hi,” na ci hi. (Matthai 16:25) Jehovah thu i mang nuam hi, ba’hang hiam cih leh en’ amah it ihih man hi. Ama’n ei ading bang hoihpen hiam cih thei a, nuntakna pen Jehovah’ muh dan bangin a manpha, a siangtho-in i mu hi.—Hebru 11:6.

16. Pasian’ nasemte in ba’hang ama thu mang uh a hiam?

¹⁶ Pasian ii a citak nasemte in sisan tawh kisai Pasian thukham zuih ding khensat uh hi. Amau sisan ne lo ahih kei leh dawn lo uh a, tua khit teh zatui kikhoi nadingin sisan pen sang lo uh hi. * Ahih hang amau a cidam  suak nadingin a kisam adang cina khoinate sang uh hi. Nuntakna le sisan a Piangsakpa in amau ading bang hoihpen hiam cih thei ahihlam a muang uh hi. Nang ading bang hoihpen hiam cih ama’n thei takpi-in na um hiam?

17. Jehovah in Israel minamte kiang a phal sisan zat theihna thu khat pen bang a hiam?

¹⁷ Pasian in Moses tunga a piak Thukham sungah Jehovah in Israel minamte kiangah: “Bang hang hiam cihleh pumpi nuntakna pen si sungah om hi. Note ading kilemna bawl [ahih kei leh, mawh maisak nading ngen] nadingin note adingin biakna tau tungah tua si ka piazo hi. Si pen nuntakna ahih manin kilemna a piangsak na ahi hi,” ci hi. (Siampi Laibu 17:11) Israel minam te’n mawhna a bawl khak uh ciang ganhing biakpiakna tawh Jehovah kiang mawh maisakna a nget ding uh kul a, biakinn-a biakpiakna tau tungah sisan pawlkhat a buaksak nading Siampi pa kiangah huhna a nget ding uh zong kisam hi. Hih pen Israel minamte in sisan a zat ding Jehovah in a phal thu khat bek ahi hi.

18. Jesuh ii kipiakkhiatna in bang hong ngahsak ding a hiam?

¹⁸ Jesuh leitungah hong pai ciang, i mawhnate amai nadingin ama nuntakna ahih kei leh a sisan a piakkhiatna tawh ganhing biakpiakna thukham pen na khek hi. (Matthai 20:28; Hebru 10:1) Jehovah in Jesuh vantungah a hinkiksak khit ciang Jesuh’ nuntakna pen manpha mahmah hi, tua ahih manin Jehovah in mihing khempeuh a tawntunga nuntak theih nading hunpha pia thei hi.—Johan 3:16; Hebru 9:11, 12; 1 Peter 1:18, 19.

19. “Mi khempeuh sisan panin” i sian nading bang i sep ding kisam hiam?

¹⁹ A manpha mahmah letsong ahi, nuntakna Jehovah in hong pia ahih manin ama tung lungdam mahmah hi  hang! Tua banah mi te’n Jesuh a up uh leh a tawntunga nungta thei ding ahih manin mite kiang tua thu i gen nuam hi. Mihingte i it a, tua khit teh nuntakna a ngah theih nadingun ihih theih tawpin thu i sinpih hi. (Ezekiel 3:17-21) Tua ahih teh sawltak Paul in: “Mi khempeuh sisan panin kei ka siang hi cih thu tuni in note tungah teci kong pang hi. Bang hang hiam cih leh Pasian gelna khempeuh sit loin note kong hilh khin zo hi,” ci-in a gen mah bangin en’ zong i gen thei ding hi. (Sawltak 20:26, 27, ZSV) Hi mah hi, Jehovah thu le ama’n nuntakna manpha a sak ngiatna thu midangte kiang i gen ciang, nuntakna le sisan nakpi taka i thupi ngaihsutna a lakkhia ihi hi.