1. Hih laibu limtakin na sin khit ciang bang ngaihsun khathei ding na hiam?

NANGH hih laibu na sin sungin Lai Siangtho thuman tampi na sin khin a, tua sungah Pasian kamciam ahi tawntung nuntakna, a site omzia, thawhkikna lametnate ahi hi. (Thuhilhna 9:5; Luka 23:43; Johan 5:28, 29; Maangmuhna 21:3, 4) Jehovah Tecite’ kikhopna-ah a kikhawm ta zong na hi thei a, amau’ nuntakna-ah biakna man a nuntakpih lam uh a um ta zong hi thei ni teh. (Johan 13:35) Jehovah tawh lawmta kizopna a khan  semsem nading a kipan khin zong hi thei ni teh, tua banah ama na a sem dingin a khensat ta zong hi thei ni teh. Tua ahih teh nangh, ‘Pasian na sem dingin tu’n bang kisam ka hia leh?’ ci-in ngaihsun kha ding hi teh.

2. Ba’hangin Ethiopia pasal pa tui kiphum nuam a hiam?

² Tua pen Jesuh hun lai-in a nungta Ethiopia pasal pa ii ngaihsutna tawh kibang hi. Jesuh a thawhkik zawh hun khat lai-in Jesuh’ nungzui ahi Filip in tua pa kiang thu na gen hi. Filip in Jesuh pen Messiah ahihna thu kician takin gen hi. Ethiopia pasal pa in ama sinkhak thute hangin a lungsim la lua ahih teh ama’n: “Hih lai-ah tui om hi. Tui kiphum nuam peuh leng kua’n hong kham thei ding ahi hiam?” na ci pah lian hi.—Sawltak 8:26-36.

3. (a) Jesuh in a nungzuite bang thu pia a hiam? (b) Mi khat tui a kiphum ciang koi banga a kiphum ding kul hiam?

³ Lai Siangtho in Jehovah Pasian na na sepnop leh tui na kiphum kul hi ci-in siang takin hong hilh hi. Jesuh in a nungzuite kiang: “Midang khempeuh, keima nungzui mi suaksakin, . . . tui sungah na phum un,” na ci hi. (Matthai 28:19) Jesuh in amah mah tui a kiphumna tawh etteh ding lim hong lak hi. Tui sungah ama pumpi bupin kiphumsuk hi, a lu tungah tui a kitheh hi lo hi. (Matthai 3:16) Tu hunah Khristian khat tui a kiphum ciang, tui sungah a pumpi bupin tumsuk ahih kei leh a kiphum loh phamawh hi.

4. Tui na kiphum pen midangte bang na lahna ahi hiam?

⁴ Tui na kiphum ciang Pasian’ lawm na suah nopna le ama na a sem nuam takpi na hihna midangte a lak na hi hi. (Late 40:7, 8) Tua ahih manin, ‘Tui ka kiphum theih nading bang kisam lai ka hiam?’ ci-in theinuam ding hi teh.

5. (a) Tui na kiphum ma, na sep masak pen ding bang a hiam? (b) Khristian kikhopnate-ah i kikhop ding ba’hang thupi a hiam?

⁵ Tui na kiphum ma-in Jehovah le Jesuh thu na theih loh phamawh hi. Tua pen Lai Siangtho na sinna tawh a  kipan khinta na hi hi. (Johan 17:3 Sim in.) Ahih hang tua zah bek tawh kicing lo hi. Lai Siangtho in Jehovah’ deihna ahi “thutheihna khempeuh tawh na kidim” ding kisam hi ci-in hong gen hi. (Kolose 1:9, ZSV) Jehovah Tecite’ kikhop hun bawlna in Jehovah tawh na kinaih zawk na’ng hong huh ding hi. Tua ahih manin tua banga kikhopnate manmanin na kikhop ding a thupina ahang khat ahi hi.—Hebru 10:24, 25.

6. Tui na kiphum ma, Lai Siangtho thu bangzah na theih ding kisam a hiam?

⁶ Ahih hang Jehovah in tui na kiphum ma-in Lai Siangtho a vekin na theih ding lamen lo hi. Pasian in Ethiopia pasal pa tui a kiphum ma, na khempeuh a thei dingin na lamen lo hi. (Sawltak 8:30, 31) Tua banah Pasian thu pen a tawntungin i sin suak ding ahi hi. (Thuhilhna 3:11) Ahi ta zongin tui na kiphum nop leh a tawmpen Lai Siangtho hilh thubulte thei a, na san ding kisam hi.—Hebru 5:12.

7. Lai Siangtho na sinna in koi bangin hong huh a hiam?

⁷ Lai Siangtho in: “Upna lo tawh kuamah in Pasian lungkimsak zo lo hi,” na ci hi. (Hebru 11:6) Tua ahih manin tui na kiphum ma, upna na neih ding kisam hi. Ni dang lai-a Korin khuapi sunga mi pawlkhat in Jesuh nungzuite thuhilhna a zak uh ciang, “Um uh a, tui a kiphum uh hi,” ci-in Lai Siangtho in hong gen hi. (Sawltak 18:8) Tua dan mahin, Lai Siangtho na sinna in Pasian kamciamte le mawhna le sihna pan hong honkhia thei Jesuh ii kipiakkhiatna a vang na up zawh nading a hong huh hi.—Joshua 23:14; Sawltak 4:12; 2 Timoti 3:16, 17.

8. Na sin thute midangte kiang na gen theih nading bang in hong hanthawn ding a hiam?

⁸ Lai Siangtho pan na sin thute hong tam semsemna  le na nuntakna zong hong huhna na muh ciang na upna zong hong khauhzaw ding hi. Na sin thute midangte kiang gen nuam ding hi teh. (Jeremiah 20:9; 2 Korin 4:13) Ahih hang kuate kiang gen ding na hiam?

9, 10. (a) Na sinsa thute kuate kiang gen ding kipat sawm na hiam? (b) Pawlpi tawh tangkona-ah na kihel nop leh bang na sep ding kul a hiam?

⁹ Na innkuanpihte, na lawmte, innvengte le naseppihte kiang na sin thute gen nuam ding hi teh. Tua bangin na gennop pen hoih hi, ahih hang a tawntungin dik inla itna tawh na gen in. A hun hong tun ciang pawlpi tawh tangko khawm dingin na kipan nuam ding hi. Tua bangin sem zo ta ning ci-a na kingaihsut ciang, Lai Siangtho hong sinpih pa ahih kei leh hong sin pih nu kiang, pawlpi tawh tangko nasepna-ah kihel nuam ing ci-in gen in. Ama’n a sem thei tadingin hong ngaihsun a, Lai Siangtho tawh kituakin nungta hi ci-a hong ngaihsut leh pawlpi sunga upa nih tawh hong kimuh pih ding hi.

¹⁰ Tua kimuh khopna-ah bang kikum ding na hi uh hiam? Upate tawh na kiho ciang Lai Siangtho hilh thubulte na um hiam, na tel hiam cih hong dong ding uh a, ni sim nuntakna-ah Lai Siangtho gente na nuntakpih hiam, Jehovah Teci khat suak nuam takpi na hiam cih thute hong en ding uh hi. Na phawk ding khatah upa te’n pawlpi sunga mimal khat ciat don uh a, tua sungah nang zong kihel na hih manin amau tawh na kiho ding na lau kul lo hi. (Sawltak 20:28; 1 Peter 5:2, 3) Tua na kimuh khop khit uh ciang pawlpi tawh tangkona-ah a kipan thei dingin hong ngaihsut uh leh upa te’n hong zasakkik ding hi.

11. Pawlpi tawh tangko na kipat ma, kikhelna na bawl ding ba’hang thupi mahmah a hiam?

¹¹ Pawlpi tawh tangko na kipat ma, na kikhel ding tampi om lai hi ci-in upa te’n hong gen khathei ding hi.  Tua bangin kikhel ding ba’hang thupi mahmah a hiam? Ba’hang hiam cih leh Pasian thu midangte kiang i gen ciang, ei pen Jehovah tang ihi a, amah pahtawina lampi tawh i nuntak loh phamawh ahih man ahi hi.—1 Korin 6:9, 10; Galati 5:19-21.

12. Mi khempeuh ba’hang kisik ding kisam a hiam?

¹² Tui na kiphum ma, na sep loh a phamawh na khat om lai hi. Sawltak Peter in: “Na mawhnate uh a kiphiatsiang theih nadingin kisikkik unla kikhel un,” ci hi. (Sawltak 3:19, ZSV) Kisik in a cih ciang bang a cihnopna hiam? I sep khialh na khat peuhpeuh tung nakpi takin khasia a cihna ahi hi. Gentehna, nulepa vai-ah gamtatsia na hih leh na kisikkik ding kisam hi. Tua khit teh na nuntak sung na hih theihzahin thuman sem na hih lezong, na kisik ding kisam veve lai hi, ahang pen i vekpi-in mawhnei mi ihi a, mawh maisak nading Pasian kiang i nget ding kisam ahih man ahi hi.—Rom 3:23; 5:1.

13. “Kikhel” in a cih ciang bang a cihnopna hiam?

¹³ Na sepkhak thute tung na khasiat bek tawh a kicing ding hiam? Kicing lo hi. Peter in na “kikhel” ding zong kisam hi na ci hi. A cihnopna-ah na gamtat hoih lohna khat peuhpeuh paikhia-in gamtat hoih kipan a, na sep ding kisam hi. Tua pen thu khat tawh genteh ni, a om takpi mun khatah a khatveina khual a zin lai takin kingaihsun in. Na pai khit a sawt loin lampial na tot khak lam a phawk khavat hi lecin, nangh bang cih ding na hiam? Damdama khawlin kilehkikin lampi man tungah paikik hamtang ding hi teh. Tua mah bangin Lai Siangtho na sin ciang na zongsatsa ahih kei leh na khat peuh kikhel ding kisam na kisaklam omkha ding hi. Lungsim takpi tawh “kikhel” in—tua pen na kikhel loh phamawh cihna hi a,—tua khit ciang thuman sep ding na kipan in.

14. Pasian kiang nang le nang koici ki-ap ding na hiam?

¹⁴ Tui na kiphum ma, a thupi mahmah na sep ding a kisam adang khat pen Jehovah kiang nang le nang na ki-ap ding ahi hi. Jehovah kiang nang le nang na ki-ap ciang, na thungetna sungah nang bek hong bia ning, ka nuntakna-ah a thupi penin nangma deihna sem ning ci-in kamciamna nei in.—Thu Hilhkikna 6:15.

15, 16. Mi khat Pasian kiang amah le amah a ki-ap nading bang in hanthawn ding a hiam?

¹⁵ Jehovah Pasian na bek sem ning ci-a kamciam piak pen na it khat tawh na nuntak sung tengkhawm ding cih kamciam na piak tawh kibang hi. Gentehna, pasal khat le numei khat a kiheelin ngaihsun in. Tua pasalpa in numeinu thu hong theih semsem ciang amah hong it-in tua numeinu hong tenpih nuam hi. Tua pen a thupi mahmah thu khensat ding ahi phial zongin, pasalpa in tua tavuan pen lungkim takin sang hi. Ba’hang hiam cih leh ama’n numeinu it ahih man ahi hi.

¹⁶ Jehovah thu na theih semsem ciang amah nong it ding a, ama na nasep ciang a hoih penin sem nuam ding hi teh. Tua in thungetna-ah ama na sem nuam ing ci-a kamciam na piak theih nading hong hanthawn ding hi. Lai Siangtho in Jesuh nung a zui nuam kuamahpeuh in amau “deihna bangin gamta nawn lo” ding uh hi na ci hi. (Marka 8:34) A cihnopna in bang a hiam? Na nuntakna-ah Jehovah thu a masa penin na man ding a cihna ahi hi. Na ngaihsutna le na ngimnate sang, Jehovah in bang deih hiam cih thupi zaw hi.—1 Peter 4:2 Sim in.

17. Mi pawlkhat ba’hang Jehovah kiang amau le amau ki-ap lo uh a hiam?

¹⁷ Mi pawlkhat in Pasian na sem ning ci-a a kamciam uh pen a kip loh khak ding lau uh ahih manin Jehovah  tung amau le amau ki-ap lo uh hi. Amau Jehovah a lungnop loh ding ut lo uh a, ahih kei leh Jehovah kiang ki-ap kei lehang i sep thute tungah ama’n hong sai thei nawn lo ding hi ci-in ngaihsun khathei uh hi.

18. Jehovah a lungnop loh ding na lunghihmawhna na phul zawh nading bang in hong huh thei ding a hiam?

¹⁸ Jehovah a lungnop loh ding na lunghihmawhna na phul zawh nading amah na itna in hong huh ding hi. Amah it na hih manin, ama tungah na kamciam na kip zawh nading a hoih penin semsuak ding hi teh. (Thuhilhna 5:4; Kolose 1:10) Jehovah Pasian deihna nasep pen haksa lua ding ci-in ngaihsun kei in. Sawltak Johan in: “Pasian i it ciangin ama thupiakte a zui ihi hi. Eite adingin ama thupiakte zuih ding a haksa lua hi lo hi,” na ci hi.—1 Johan 5:3.

19. Jehovah kiang nang le nang na ki-ap ding ba’hang lau kul lo a hiam?

¹⁹ Jehovah kiang nang le nang na ki-ap na’ng mi cingtaak na suah ding kisam lo hi. I sep theihzah sang a semzaw dingin cikmah hunin Pasian in lamen lo hi. (Late 103:14) Thu man taka na sep zawh nading Pasian in hong huh ding hi. (Isaiah 41:10) Na lungsim khempeuh tawh Jehovah na muang in, tua hileh “lampi man amah in hong lak ding hi.”—Paunak 3:5, 6.

20. Pasian kiang nang le nang ki-ap khin na hihleh na kalsuankik ding khat pen bang a hiam?

²⁰ Jehovah kiang nang le nang na ki-ap ding na kimuang ta hiam? Jehovah kiang nang le nang ki-ap khin na hihleh kalkhat a suankik dingin a kigingsa na hi ta hi. Tui na kiphum ding kisam hi.

21, 22. Na upna “kam tawh” koi bangin “pulak” thei ding na hiam?

²¹ Na kikhopna pawlpi sunga pawlpi upate ii thu lempipa kiang Jehovah tung nang le nang na ki-ap khitna le  tui na kiphumnopna na gen in. Tua khit teh amah le adang pawlpi upa pawlkhat in Lai Siangtho hilh thubulte hong kikuppihkik ding uh hi. Amau tui na kiphum ding a thukim uh leh hong tung ding Jehovah Tecite khawk kikhop ahih kei leh kikhoppi-ah tui na kiphum theih nading hong gen ding uh hi. Tua kikhoppi-ah tui kiphumna tawh kisai thugenna khat om ding hi. Tua thugenpa in tui a kiphum dingte kiang  thudot tomno nih hong dong ding hi. Tua thudotte na dawnkikna pen na upna “kam tawh pulak” na hi hi.—Rom 10:10, ZSV.

²² Tua khit ciang tui kiphum theita hi teh. Tui sungah na pumpi bupin na kiphum ding kisam hi. Tui  kiphumna pen Jehovah kiang nang le nang na ki-ap khitna le tu’n nang pen Jehovah Teci mi khat na suah lam mi khempeuh a lak na hi hi.

23. “Pa min, Tapa min, le Kha Siangtho min tawh” tui na kiphum un a cihin bang a cihnopna hiam?

²³ Jesuh in a nuizuite kiang “Pa min, Tapa min, le Kha Siangtho min tawh” tui na kiphum un ci hi. (Matthai 28:19 Sim in.) Bang a cihnopna hiam? Jehovah ii thuneihna le Pasian ngimna-ah Jesuh ii panmun na thupi muh ding cihna hi a, Pasian in ama deihna a tangtun nading a kha siangtho a zat dan zong na thupi muh ding a cihnopna zong ahi hi.—Late 83:18; Matthai 28:18; Galati 5:22, 23; 2 Peter 1:21.

24, 25. (a) Tui kiphumna in bang khiatna nei a hiam? (b) A nunung pen khenpi-ah bang thu kikum ding ihi hiam?

²⁴ Tui kiphumna in a thupi mahmah khiatna nei hi. Tui sungah na kiphum ciang, nuntakna lui si khin ahih kei leh paikhia a cihnopna ahi hi. Tui sung pan nong pusuakkik ciang Pasian deihna a sem dingin nuntakna thak a kipan na hi hi. Tu-a kipan Jehovah Pasian na sem tading cih a lak na hi hi. Na phawk ding khatah nasep, kipawlna ahih kei leh mihingte kiang a ki-ap na hi kei hi. Na nuntakna Jehovah tungah a ki-ap na hi hi.

²⁵ Pasian kiang na ki-apna in amah tawh na kilawmtakna a khan semsem nading hong huh ding hi. (Late 25:14) Mi khat tui a kiphum manin hotkhiatna ngahta a cihna hi lo hi. Sawltak Paul in: “Pasian kihtakna le zahtakna tawh na maa uh nawt unla, amah in note hong hotkhiatna thu a cingtaak suaksak un,” na ci hi. (Filippi 2:12) Tui kiphumna pen a kipatna hi pan hi. Tua bang hileh Jehovah tawh koi bangin kinaizaw thei ding na hi hiam? Hih laibu ii a nunung pen khenpi in tua thu hong hilh ding hi.