Mite kiang Jehovah thu i gen ciang khat veivei mite’n hong zahpih ahihkeileh hong mudah thei uh hi. Tua in Pasian thu i gen ding hong khawlsak nuam thei hi. Tua bang in na tuak ngei hiam?—Jehovah a it naupang khat thu Lai Siangtho in hong gen a, ahihhang amah pen Pasian thu gen ding khawl dektak hi. A min pen Jeremiah hi. Ama thu sin beh lai ni maw.

Jeremiah a naupang lai-in Jehovah in amah sawl a, mite kiang na hoihlo na sepna uh pan khawl un, ci-in gensak hi. Tua pen Jeremiah ading haksa mahmah a, zong lau mahmah hi. Ama’n Jehovah kiang: ‘Bangci gen ding cih ka thei kei. Naupang khat ka hi lel hi’ ci hi. Ahih hang Jehovah in: ‘Lau kei in. Ke’n hong huh ning’ a ci hi.

 Tua ahih teh mite kiang na kikhel kei uh leh suksiat na thuak ding uh hi ci-in Jeremiah in vau na kipan hi. Jeremiah i thugen mite’n mang in na um naa?—Manglo hi. Amau zahpih ahihkeileh heh mahmah uh hi. Pawl khat in that nuam lai hi! Jeremiah bangci ding in na um mawh aa?—Amah lau lua a: ‘Jehovah thu cik mah hunin gen nawn kei ning’ ci hi. Ahih hang amah khawl takpi maw?—Hi lo, amah khawl lo. Jehovah it mahmah ahih teh ama thu gen ding khawl thei lo hi. Jeremiah khawl lo ahih manin Jehovah in amah honkhia hi.

Gentehna, mihoih lo honkhat in buan tampi a dim tuikhuk thuk mahmah sung ah Jeremiah khiasuk uh hi. An le tui zong nek ding omlo hi. Tua mite’n Jeremiah tua sungah nusia in si-sak nuam hi. Ahih hang Jehovah huhna tawh amah suakta!

Jeremiah’ gamtat zia pan bang sin thei na hiam?—Khat veivei a lau hang Jehovah i thu gen ding khawl nuam lo hi. Jehovah thu na gen ciang, mite’n hong zahpih in hong mudah khathei ding hi. Na maizum a, lau khathei ni teh. Ahih hang cik mahun in Jehovah thu gen ding khawl sawm ken. Jeremiah ahuh mah bangin a tawntung in nang hong huh ding hi.