Nu le pate thu mang ding a tawntung in a ol hiam?—Khat veivei haksa mah. Jesuh in Jehovah leh a nu le pate thu a mang lam na thei ngei hiam?—Na nu le na pate thu na mang ding a haksat ciang Jesuh na etteh lecin thu na mang na’ng hong huh ding hi. Tua thu sin beh lai ni.

Jesuh leitungah a om ma, a Pa Jehovah tawh vantungah om khawm hi. Ahih hang, leitungah zong Jesuh in nu le pa nei hi. Amin uh Josef leh Mary hi. Ama’ nu leh pate’ in koi ci hong piang cih thu na thei naa?—

Jehovah in vantunga Jesuh nuntakna la-in Mary sungah thun a, tua ahih manin Jesuh hong suaka leitungah hong teng hi. Hih pen na lamdangpi aive! Jesuh pen Mary gil sungah naungeek dangte a nute gil sungah hong gol mah bangin golto hi. Khakua hong cing khit teh, Jesuh hong suak hi. Tua ahih teh, Mary leh a pasal Josef-te pen hih leitunga Jesuh’ nu le pa hong hi ta uh hi.

Jesuh kum 12 bek a phak lai in, na khat a sepna pan a Pa Jehovah bangzah takin it hiam cih na lak hi. Tua thupiang pen Jesuh leh a nu le pate khual gamla Jerusalem ah Paisan pawi a pai na uah thupiang hi. Inn hong ciahkik lamkal ah Josef leh Mary in Jesuh mu nawn lo uh hi. Amah a omna na thei naa?—

Josef leh Mary manlang takin Jerusalem ah paikik uh a, mun khempeuh ah Jesuh a zong uh hi. Amuh loh ding uh lau ahih teh patau lua uh hi. Ahih hang ni thum khit ciang biakinn ah mu uh aive! Jesuh biakinn-ah ba’hang in om hiam cih na thei naa?—Ba’hang hiam cih leh a Pa Jehovah thu sinnuam ahih man hi. Jehovah it a, ama lungsim tawh a kituak nading Jesuh in sin nuam hi. Hong gol toto a, tangval hong suah hang, Jesuh in Jehovah thu a tawntung in na mang hi. Thu a mang ding haksa a sak hun leh tua in amah a genthei sak phial zong, Jesuh in thu na mang veve hi. Jesuh in Josef leh Mary-te thu zong a mang na leh?—Mang mah, Lai Siangtho in mang mah na ci.

Jesuh gamtat zia pan nang bang sin thei na hiam?—Na nu le na pa thu mang ding a haksa phial zong thu na mang ding kisam hi. Tua bang in na sem nuam naa?—