Rebekah pen Jehovah a it numei khat hi. A pasal min pen Isaac hi. Ama’n zong Jehovah it hi. Rebekah in Isaac tawh koi ci ki muh? Numei nu in Jehovah lungdam sak nuam hi cih koi ci lah hiam? Ama thu sin beh lai ni.

Isaac’ nu le pa pen Abraham leh Sarah hi. Kanaan gamah tenguh a, tua gama a om mite in Jehovah bia lo uh hi. Ahih hang Abraham in a tapa pen Jehovah abia numei tawh bek kiteng sak nuam hi. Tua ahih ciang in a nasem pa sawl a, Abraham in a behte om na mun Haran ki-ci gamah Isaac ading zi a zongsak hi. Tua a nasem pa pen Eliezer hi kha thei in teh.

Eliezer pen Abraham’ nasem dang te tawh khual zinkhawm hi. A khual zinna uh sau mahmah hi. Kalaoh sawm tawh an leh letsongte pua uh hi. Isaac ading numei koi ci telsak ding cih Eliezer in bangci theih ding hiam? Eliezer le nasem dangte Haran gam hong tung uh ciang tuikhuk gei-ah khawl phot uh hi. Ba’hang hiam cih leh Eliezer in mite’ tui hong tawi dekta, cih thei ahih man hi. Ama’n Jehovah kiang thungen in hih bang in: ‘Ke’n nungak no nu kiang tui ka ngen ding a, tua numei in kei ading leh ka kalaohte ading tui hong piak leh nasehsa numei nu hi cih ka thei ding hi’ ci hi.

 Tua lai tak tuikhuk gei ah nungak no Rebekah hong pai hi. Lai Siangtho in numei nu a meel hoih mahmah ci hi. Eliezer in a dawn ding tui a nget leh numei nu’n ‘Aw le, tui hong pia ning, na kalaohte ading zong tui hong tawi sak ning’ a ci hi. Ngaihsun pak dih! A dangtak kalaohte’n tui tampi tak dawn ahih teh, Rebekah in tuikhuk pan tui khai ngekngek aive. Bangzah takin thanuam hiam cih lim sungah na mu hia?—A thungetna Jehovah in a dawnkik Eliezer in lamdang salua hi.

Eliezer in Rebekah letsong hoih tampi a pia hi. Numei nu in Eliezer le nasem dangte a inn-ah a sam hi. Eliezer in hih munah Abraham in a sawlna ahang leh ama thunget Jehovah in adawnna na gen hi. Rebekah innkuanpih te’n Isaac tawh a kiteen ding lungdam pih uh hi.

Ahih hang Rebekah in Isaac teenpih nuam in na um hiam?—Rebekah in Eliezer pen Jehovah in a sawl ahih lam thei hi. Tua ahih man in Rebekah innkuanpih te’n Kanaan gam pai-in Isaac na teenpih nuam hiam ci-in a dot uh leh, nungak nu in: ‘Pai nuam mah ing’ a ci hi. Tua ciang in, Eliezer tawh a zin khawm pah uh hi. Kanaan gam a tun uh ciang Isaac a teenpih hi.

Rebekah in Jehovah sepsak nop pen sem ahih man in, Jehovah in amah thupha pia hi. Kum tampi khit ciang in, ama suanlekhak sungpan Jesuh hong suak hi! Nangh zong Rebekah tawh kibanga Jehovah na lungdamsak leh, ama’n thupha hong pia ding hi.