SIN DING THU 03
Lai Siangtho Na Muang Thei Hiam?
Lai Siangtho sungah kamciamnate le thuhilhnate tampi om hi. Lai Siangtho hong hilh thute na theihnop hang, muanlahna nei khathei ding hi teh. Hih banga a khanglui laibu sunga kamciamnate le thuhilhnate pen a uphuai hiam? Tu hun le mailam hunah nuntak nuam kinei thei ahihlam Lai Siangtho genna pen na muang hiam? Mi tampite’n muang uh hi. Nangh zong na kan in.
1. Lai Siangtho pen thupiang takpi a kigelhna laibu maw, ahih kei leh phuahtawm tangthu bu?
Lai Siangtho sungah “a man taktak thute” kigelh hi. (Thuhilhna 12:10) A om ngei takpi mite’ tangthu le a piang ngei takpi thute ahi hi. (Luka 1:3; 3:1, 2 sim in.) Lai Siangtho sunga ni thupite, mite, mun le gamte, le thupiangte pen man takpi ahihna tanglai thu a kan mipilte le tanglai van a kan mipilte in na thukim uh hi.
2. Lai Siangtho pen taanglai laibu ahih hang bang hangin khanglui lo ci thei i hiam?
Lai Siangtho sungah tu hun tawh a kituak thute na kigelhkhol hi. Gentehna-in, science pilna tawh kisai thute zong kigelh hi. Tua thute pen a kigelh hun lai-in zong mite’n na um lo uh hi. Ahi zongin tu hun science pilna in Lai Siangtho’ gen pen man hi cih thukimpih hi. Lai Siangtho pen “a tawntungin . . . kip ngitnget” hi.—Late 111:8.
3. Mailam thu tawh kisai Lai Siangtho’ gente bang hang muang thei i hiam?
Lai Siangtho sungah “a piang nai lo nate” tawh kisai genkholhnate a om hi. (Isaiah 46:10) A piang khinsa thute zong a pianma kum sawtpi pek a kipan kician takin na genkhol hi. Tua banah tu huna a piang ding leitung dinmunte zong a neng a tawngin na genkhol hi. Hih sin ding thu-ah, Lai Siangtho genkholhna pawlkhat kikum ding hi hang. Tua genkholhnate a tangtun takpina pen lamdang peuhmah hi!
ZON BEH INLA, MUH BEH IN
Tu hun science pilna in Lai Siangtho thukimpih ahihlam sittel inla, a lungluthuai Lai Siangtho genkholhna pawlkhat zong na kan in.
4. Science pilna in Lai Siangtho thukimpih
Tanglai-in, mi tampite’n leitung pen khat peuhpeuh tungah kinga hi ci-in na um uh hi. VIDEO hong in.
A beisa kum 3,500 kiim lai-in Job laibu sungah bang na kigelh a hiam cih sim ni. Job 26:7 sim in. Tua khit teh hih dotna kikum un:
-
Leitung pen “bangmah in a len lo pi-in” kikhai lingleng hi cih pen bang hang lamdang a hiam?
Kum 1800 kum khit ciang bekin tui ban pai dan (water cycle) thu pen mite in hoih takin na tel pan uh hi. Ahih hang a beisa kum tul tampi a kipan Lai Siangtho sungah bangci na kigelh a hiam cih sim ni. Job 36:27, 28 sim in. Tua khit teh hih dotnate kikum un:
-
Tui ban pai dan (water cycle) thu ol taka a kigelh dan pen bang hang ciapteh huai sa na hiam?
-
Tu-a na sim Lai Siangtho mun in Lai Siangtho tunga na upna a kipsak semsem hiam?
5. Lai Siangtho in a thupi thupiangte na genkhol
Isaiah 44:27–45:2 sim in. Tua khit teh hih dotna kikum un:
-
Babylon khuapi a kisuksiat ma kum 200 lai pekin Lai Siangtho in bang thu a neng a tawngin na genkhol a hiam?
B.C.E. b 539 kumin Persia Kumpi Sairas le a galkapte’n Babylon khuapi zo-in a lakna thu tawh kisai mihing tangthu-ah kician takin na om hi. Amaute in khuapi a dal guntuite heikhia uh hi. Honsa-in a om kulhpi kongkhakte pan lut uh a, galsim kullo-in khuapi zo-in laksak uh hi. Kum 2,500 bang a sawt khit, tu hun ciang dongin Babylon khuapi pen a sia-in omlai hi. Lai Siangtho genkholhna sim ni.
Isaiah 13:19, 20 sim in. Tua khit teh hih dotna kikum un:
-
Babylon tawh kisai genkholhna koi bangin tangtung a hiam?
Tu hun Iraq gama om Babylon khua sia
6. Lai Siangtho in tu huna thupiang dingte na genkhol
Lai Siangtho in tu hun pen “nitawp ni hun” ci-in na gen hi. (2 Timoti 3:1) Nitawp ni hun tawh kisai Lai Siangtho in bang gen a hiam cih sim ni.
Matthai 24:6, 7 sim in. Tua khit teh hih dotna kikum un:
-
Nitawp ni hun tawh kisai Lai Siangtho in bang gen a hiam?
Timoti Nihna 3:1-5 sim in. Tua khit teh hih dotnate kikum un:
-
Lai Siangtho in nitawp ni hun sunga mite’ lungsim puakzia tawh kisai-in bang gen a hiam?
-
Hih lungsim puakziate lak panin bangteng mu khinta na hiam?
MI PAWLKHATTE’ GEN: “Lai Siangtho pen phuahtawm tangthu bu hilel.”
-
Bang thu hangin, Lai Siangtho pen muantaak hi ci-in ngaihsun na hiam?
TOMLAKNA
Tanglai thu, science pilna, le genkholhnate in Lai Siangtho pen muantaak ahihlam lakkhia hi.
Kikupkikna
-
Lai Siangtho pen thupiang takpi a kigelhna laibu maw, ahih kei leh phuahtawm tangthu bu?
-
Bang thute-ah science pilna in Lai Siangtho na thukimpih a hiam?
-
Lai Siangtho in mailam thu na genkhol hi ci-in na um hiam? Bang hang hiam?
THEIH BEH NADING
Lai Siangtho sungah science pilna tawh a kituak lo thute a om hiam?
“Science Pilna Pen Lai Siangtho Tawh A Kituak Hiam?” (Website-a thu)
“Nitawp ni hun” tawh kisai-a thupiangte in bang a hiam?
“A Tangtung Khinsa Lai Siangtho Genkholh Thu 6” (Vilnatausang, May 1, 2011)
Greek Kumpi’ ukna gam tawh kisai Lai Siangtho genkholhna a tangtun dan kan in.
Lai Siangtho genkholhnate in mi khat ii nuntakna a kikhelsak dan kan in.
