SIN DING THU 04
Pasian Kua A Hiam?
Tangtawng pek a kipan mihingte in pasian le nusian tampi na bia uh hi. Ahih hangin Lai Siangtho sungah Pasian khat ii thu na gen a, tua Pasian pen “pasian dang khempeuh sangin lianzaw” hi, na ci hi. (2 Khang Tangthu 2:5) Amah kua a hiam? Mite’ biak pasian dangte sangin bang hang lianzaw a hiam? Hih sin ding thu-ah, Pasian in ama thu a hong theisak dan kan in.
1. Pasian min bang hi a, a min hong theisak nuam ahihlam bang hang gen thei ihi hiam?
Pasian in Lai Siangtho sungah ama min pen hih bangin na gen hi: “Kei pen TOPA [Jehovah] ka hi a, TOPA [Jehovah] pen keima min ahi hi.” (Isaiah 42:5, 8 sim in.) “Jehovah” cih pen Hebru min pan a kiletkhia kammal hi a, “A Suaksak Hi,” ci-in khiatna nei hi. Jehovah in ama min hong theisak nuam hi. (Paikhiatna 3:15) Bang hang hih bangin gen thei ihi hiam? Lai Siangtho sungah Pasian min 7,000 val bang om ahih man hi! a Jehovah pen ‘vantung hitaleh leitung hitaleh ah Pasian ahi hi.’—Thu Hilhkikna 4:39.
2. Lai Siangtho in Jehovah’ thu bang hong theisak a hiam?
Mihingte’ biak pasiante lakah Jehovah bek a man Pasian hi, ci-in Lai Siangtho in gen hi. Bang hang hiam? A hang tampi om hi. Jehovah bek sangpen thuneipa le ukpa hi a, amah bek “leitung khempeuhah a Sangpenpa,” ahi hi. (Late 83:18 sim in.) “A Vanglian” Pasian ahih manin na khempeuh a bawl thei hi. Amah in khuavannuai le leitunga a nungta khempeuhte a kipan “na khempeuh piangsak” hi. (Maangmuhna 4:8, 11) Jehovah bek a om tawntung pa ahi hi.—Late 90:2.
ZON BEH INLA, MUH BEH IN
Pasian’ za minte le aituam min a kibat lohna sittel in. Tua banah Pasian in a min a hong theisak dan le a hong theisakna a hang kan in.
3. Pasian in za min a tuamtuam a neih hang, aituam min khat bek nei
Za min le aituam min a kibat lohna na theih nadingin VIDEO hong in. Tua khit teh a nuai-a dotna kikum un.
-
“Topa” cih za min le aituam min a kibat lohna bang a hiam?
Mihingte in pasiante le topate na bia uh hi, ci-in Lai Siangtho in gen hi. Late 136:1-3 sim in. Tua khit teh hih dotna kikum un:
-
“Pasiante’ Pasian” le “topate’ Topa,” cih in kua a hiam?
4. Jehovah in a min hong theisak nuamin, hong zangsak nuam
Jehovah in a min hong theisak nuam ahihlam bang in hong lak a hiam? VIDEO hong in. Tua khit teh a nuai-a dotnate kikum un.
-
Jehovah in a min hong theisak nuam ahihlam na um hiam? Bang hang hiam?
Jehovah in a min i zat ding deih hi. Rom 10:13 sim in. Tua khit teh a nuai-a dotnate kikum un:
-
Jehovah cih Pasian min pen i zat ding bangzah taka thupi a hiam?
-
Mi khat peuhpeuh in na min hong theih a, na min tawh hong sap ciangin na lungsim bangci om a hiam?
-
Mite’n a min a zat uh ciangin Jehovah’ lungsim bangci om dingin um na hiam?
5. Jehovah in nang tawh hong kinai nuam
Soten a kici, Cambodia numei khat in Pasian min a theih ciang, “leitungah a lungdam pen hi ning,” ci-in gen hi. VIDEO hong in. Tua khit teh hih dotna kikum un.
-
Hih video-ah, Pasian min a theihna in Soten bangci huh a hiam?
Mi khat tawh lawmta i suah nadingin a masa penin a min i theih kul hi. James 4:8a sim in. Tua khit teh hih dotnate kikum un:
-
Jehovah in bang sem dingin nang hong sam a hiam?
-
Pasian min thei-a, i zatna in Pasian tawh koi bangin hong kinaisak semsem thei a hiam?
MI PAWLKHATTE’ GEN: “Pasian khat bek om ahih manin, i sap dan thupi kei.”
-
Pasian min Jehovah hi, cih pen na um hiam?
-
Pasian in a min i zat ding deih hi, cih pen koici hilhcian ding na hiam?
TOMLAKNA
Jehovah cih pen khat bek ahi, a man Pasian’ min ahi hi. Pasian in a min hong theisak nuam a, i zat ding zong deih hi. Tua hileh bek Pasian tawh i kinai thei ding hi.
Kikupkikna
-
Jehovah pen mite’ biak pasian dangte tawh bangci kilamdang a hiam?
-
Pasian min i zat ding bang hang kisam a hiam?
-
Jehovah in amah tawh na kinai ding deih ahihlam bangci theih na hiam?
THEIH BEH NADING
Pasian om takpi ahihlam i muan theihna a hang thu nga sittel in.
Pasian pen a tawntungin om hi, cih up ding a kisapna a hang kan in.
“Pasian Pen Kua’n Piangsak A Hiam?” (Vilnatausang, August 1, 2014)
Pasian min lawh dan a man lian a kitheih nawn loh hangin, bang hang zat ding kisam a hiam, cih kan in.
Pasian min i sap dan a thupi hiam? Pasian in min khat bek a neihlam i gen theihna a hang en in.
a Pasian min’ a khiatna le lehkhiat Lai Siangtho pawlkhatte-ah Pasian min a kihepkhiatna a hang na theih beh nop leh, Appendix A4 New World Translation of the Holy Scriptures Lai Siangtho sungah na en in.
