SIN DING THU 06
Nuntakna Koici Hong Kipan A Hiam?
Pasian pen “nuntakna tuinak,” ahi hi. (Late 36:9) Tua pen na um hiam? Mi tampite’n nuntakna pen ama thu-a hong piang hi, ci-in ngaihsun uh hi. Tua banga a ngaihsut uh pen man ahihleh, eite pen ngimna om lopi-a hong piang cihna hi ding hi. Ahih hang nuntakna pen Jehovah Pasian in piangsak ahihleh ngimna nei ding hi lo a hiam? a Nuntakna’ a kipatna thu Lai Siangtho’ genna le tua pen bang hang um thei ihi hiam, cih thu ngaihsun in.
1. Khuavannuai koici hong kipan a hiam?
Lai Siangtho in: “A kipat cil-in Pasian in vantung le leitung a piangsak hi,” ci hi. (Piancilna 1:1) Khuavannuai in kipatna nei hi, cih pen science mipil a tamzaw in na sang uh hi. Khuavannuai pen Pasian in koici bawl a hiam? Pasian in a “kha” ahi, a thahatna zangin galaxy-te, aksite, ni kiimkota leitungte (planet) le khuavannuai-a na khempeuh na bawl hi.—Piancilna 1:2.
2. Pasian in bang hangin leitung na bawl a hiam?
Jehovah pen “leitung a piangsakin a bawl pa (a kipsak pa; a awngthawl dingin bawl loin, tenna dingin leitung a piangsak pa!)” ahi hi. (Isaiah 45:18) Ama’n hih leitung pen a nopci mahmah ding le a tawntunga a ki-om thei dingin na bawl hi. (Isaiah 40:28; 42:5 sim in.) Hih leitung pen a pian tuampi khat hi, ci-in science mipilte’n gen uh hi. Mihingte’ nuntak theih nading leitung omsun ahi hi.
3. Mihingte pen ganhingte tawh koici kilamdang a hiam?
Jehovah in leitung a bawl khit ciangin, nuntakna a neite zong na bawl hi. A masa penin leitungah singkung, singnote, le ganhingte na bawl hi. Tua khit teh, “Pasian in ama lim bangin mihing piangsak,” hi. (Piancilna 1:27 sim in.) Mihingte’ lamdanna in bang a hiam? Pasian’ lim banga hong kibawl ahih manin itna le thumanna cih banga Pasian’ pianziate a lak thei ihi hi. Kampau sintheihna, limlemel a hoihte theihtheihna, tumgingte ngai-a lungnop theihna nei dingin zong hong kibawl hi. Ganhingte tawh kibang lo-in, ei hong Bawlpa i bia thei hi.
ZON BEH INLA, MUH BEH IN
Nuntakna pen design kisuai cih thu le Lai Siangtho sunga piansakna thute pen uphuai takpi ahihlam a kiciansak thute ngaihsun in. Mihingte’ neih pianzia hoihte in Pasian’ thu a hong theisakte kan in.
4. Nuntakna pen design kisuai
Mihingte’n a piangsa nate ettehin design suai uh ahih manin phatna ngahzel uh hi. Tua ahihleh design masa pen adingin phat ding a kilawmpen in kua a hiam? VIDEO hong in. Tua khit teh hih dotna kikum un.
-
Mihingte’n a piangsa nate etteh-in bang design-te suai uh a hiam?
Inn pen mi khat peuhpeuh in design suai-in kilam hi. A piangsa nate ciang, kua in design suai-in lam a hiam? Hebru 3:4 sim in. Tua khit teh hih dotnate kikum un:
-
A piangsa nate lakah bang design pen hoihsa na hiam?
-
Khuavannuai le khuavannuai-a om na khempeuh pen design kisuai hi, ci-a i san theihna thu a om hiam? Bang hang hiam?
A lungluthuai thu
JW.ORG sunga “Ama Thu-in Hong Piang Thei Ding A Hiam?” cih le “Nuntakna’ A Kipatcilna Tunga Muh Dante” cih thulute-ah hih thu tawh kisai thute le video-te om hi.
“Inn khempeuh a lam na om ciat sam a, ahi zongin na khempeuh a piangsak pa pen Pasian ahi hi”
5. Lai Siangtho sunga piansakna thu a kigelh pen uptaak hi
Piancilna a lian 1-ah leitung le leitunga nuntakna a neite hong piankhiat dan kigen hi. Tua thute a uphuai ding hiam, ahih kei leh phuahtawm thu hi lel hiam? VIDEO hong in. Tua khit teh hih dotnate kikum un.
-
Ni khat nai 24-ta a sawt ni guk sungin leitung le leitunga nuntakna a neite kipiangsak hi, ci-in Lai Siangtho in hong hilh a hiam?
-
Lai Siangtho sunga piansakna thu pen uphuai na sa hiam? Bang hang hiam?
Piancilna 1:1 sim in. Tua khit teh hih dotna kikum un:
-
Khuavannuai in kipatna nei hi, ci-in science mipilte’n gen uh hi. Amau’ genna pen tu-a i sim Lai Siangtho mun tawh a kituak hiam?
Pasian in piansawnna zangin nuntakna a neite piangsak hi, ci-in mi pawlkhat in ngaihsun uh hi. Piancilna 1:21, 25, 27 sim in. Tua khit teh hih dotnate kikum un:
-
Pasian in nuntakna a nei khat peuhpeuh a bawl khit ciangin ngasa, nawipia ganhing namte, le mihingte pen piangsawnsak hi, ci-in Lai Siangtho in a hilh hiam? Ahih kei leh nuntakna a neite khempeuh “amau nam ciatin” piangsak hizaw a hiam? b
6. Pasian’ piansakte lakah mihingte pen lamdang mahmah
Jehovah in ganhingte tawh kibang lo-in ei hong bawl hi. Piancilna 1:26 sim in. Tua khit teh hih dotna kikum un:
-
Pasian’ limlemel banga hong kibawl eite in itna le hehpihna i lah theihna pan Pasian’ thu bang hong theisak a hiam?
MI PAWLKHATTE’ GEN: “Piansakna thu Lai Siangtho’ genna pen phuahtawm thu hi lel.”
-
Nangh bangci ngaihsut na hiam? Bang hang hiam?
TOMLAKNA
Jehovah in khuavannuai le nuntakna a nei khempeuh piangsak hi.
Kikupkikna
-
Khuavannuai’ a kipatna thu Lai Siangtho in bang hong hilh a hiam?
-
Pasian in nuntakna a nei khat peuhpeuh panin nuntakna nei nam tuamtuamte piangsawnsak a hiam? Ahih kei leh nuntakna a neite khempeuh piangsak hizaw a hiam?
-
Mihingte’ lamdan mahmahna in bang a hiam?
THEIH BEH NADING
A piangsa nate pana a kimuthei design-te na kan in.
“A Piangsa Nate In Bang Hong Hilh A Hiam?” (Khanghlo In!, September 2006)
A pa in a tapa kiangah piansakna thu koici hilh a hiam, cih en in.
Piansawnna cih pen Lai Siangtho tawh a kituak hiam, cih kan in.
“Nuntakna A Nei Nam Tuamtuam Piangsak Dingin Pasian In Piansawnna A Zang Hiam?” (Website-a thu)
Nuntakna pen a kipiangsak maw, ama thu-a hong om, cih pen suang a suak limte (fossil record) le science mipilte’ muhkhiatna in bang kilangsak a hiam, cih sittel in.
a Sin Ding Thu 25-ah mihingte ading Pasian’ ngimna kikum ding hi hang.
b Lai Siangtho sungah “amau nam ciatin” cih kammal in nuntakna a nei honkhat a cihnopna ahi hi.
