Jehovah Pasian’ thu na ngaihsut ciangin na lungsimah bang hong kilang a hiam? Vanglian lua ahih manin vantunga aksite bangin mihingte tawh kigamla lua mahmah, ci-in na ngaihsun hiam? Ahih kei leh a om takpi mi khat bang hi lo-in, huihpi banga thahatna nam khat, ci-in na ngaihsun hiam? Jehovah pen koi bang Pasian a hiam? Lai Siangtho in Jehovah’ pianziate a gen banah nang zong hong don hi, ci-in na gen hi.

1. Pasian pen bang hang mu thei lo ihi hiam?

“Pasian pen kha ahi hi.” (Johan 4:24) Jehovah in cilesa pumpi nei lo hi. Vantunga a teng kha mi ahih manin kimu thei lo hi.

2. Jehovah’ pianzia pawlkhat in bangteng a hiam?

Jehovah pen a kimuh theih loh hangin pianzia hoih a nei, Mi khat ahihlam mite’n a theih uh ciangin Pasian hong it uh hi. Lai Siangtho in: “TOPA [Jehovah] in thutang deih a, ama mi siangthote nusia lo ding hi,” ci-in gen hi. (Late 37:28) A diakin, gentheih haksatna a thuakte tungah Pasian pen “lainatna le hehpihna tawh kidim hi.” (James 5:11, ZSV) “Lungsim kitamzante kiangah TOPA [Jehovah] hong om a, lungsim zangawpte a hon hi.” (Late 34:18) I gamtatnate in Jehovah tungah sukha thei hi. A hoih lo-a i gamtat leh Pasian’ lungsim dahsak hi. (Late 78:40, 41) Ahih hang, a hoih i gamtat leh Pasian lungdamsak hi.​—Paunak 27:11 sim in.

3. Eite hong it ahihlam Jehovah in koici lak a hiam?

Jehovah ii a kilangkhiapen pianzia in itna ahi hi. ‘Pasian pen ki-itna ahi hi.’ (1 Johan 4:8) Jehovah in Lai Siangtho le a piansak nate tungtawnin itna hong lak hi. (Sawltak 14:17 sim in.) Gentehna-in, Pasian in eite hong bawl dan ngaihsun in. A hoih mahmah colour tuamtuamte muhtheihna, a ngaihnop mahmah tumgingte ngaihtheihna, le nektheih a lim a alte ciaptheihna hong pia hi. Nuntakna nuam zong hong neisak nuam hi.

 ZON BEH INLA, MUH BEH IN

5. Jehovah in a deihhuai pianziate nei

Moses pen citak taka Pasian a bia mi khat ahih hangin, Piangsak Pa’ thu theih beh nuam lai veve hi. Tua ahih manin: ‘Nang ka hong theih nadingin tu-in nangma geelnate kei hong lak in,’ ci-in gen hi. (Paikhiatna 33:13) Jehovah in zong Ama thu Moses na theisak hi. Paikhiatna 34:4-6 sim in. Tua khit teh hih dotnate kikum un:

• Jehovah in ama thu Moses kiangah bang theisak a hiam?

• Jehovah’ pianziate lak pan bang deihpen na hiam?

 TOMLAKNA

Jehovah pen kha mi hi a, pianzia hoih tampi zong nei hi. A diakdiakin amah pen itna ahi hi.

Kikupkikna

• Jehovah pen bang hang mu thei lo ihi hiam?

• Kha siangtho cih in bang a hiam?

• Jehovah’ pianzia pawlkhat in bang a hiam?