SIN DING THU 09
Thungetna Tawh Pasian Kiang Nai In
Na nuntakna-ah lamlahna kisam ing, ci-in na kingaihsun ngei hiam? Bang a thupi dotnate ii dawnna pen thei nuam na hiam? Hehnepna na kisam hiam? Jehovah tawh na kinai nuam hiam? Tuate khempeuh thungetna tawh kingah thei hi. Tua hileh, lampi man tawh koi bangin thu ngen ding na hiam? Pasian in thungetna khempeuh a ngai hiam? Na thungetnate Pasian in hong ngaihsak nadingin bang na hih ding kisam a hiam? Tua thute kikum ni.
1. Kua kiangah thu ngen ding ihi hiam? Bang ading thu ngen thei i hiam?
Jesuh in vantunga om i Pa’ kiang bekah thu ngen un, ci-in hong hilh hi. Jesuh mahmah in zong Jehovah kiangah thu na ngen hi. Jesuh in: “Thu na nget uh ciangin hih bangin na ngen un: ‘Vantunga om kote’ Pa aw, . . . ’” ci-in hong hilh hi. (Matthai 6:9) Jehovah kiang thu i nget ciangin amah tawh i kilawmtatna hong kip semsem hi.
I kisap na khempeuh adingin thu kingen thei hi. Pasian in ama deihna tawh a kituak thungetnate hong ngaihsak hi. “Ama deihna tawh kituakin i nget nakleh i nget khempeuh Pasian in hong pia ding hi.” (1 Johan 5:14) Jesuh in bangteng kingen thei hiam, cih i theih nadingin i etteh ding thunget dan hong hilh hi. (Matthai 6:9-13 sim in.) Aituam ading thu i nget theih banah Pasian in hong sepsak nate tungah zong lungdamna i ko thei hi. Midangte adingin zong thu kingetsak thei hi.
2. Koi bang danin thu ngen ding ihi hiam?
“Ama [Pasian] mai ah na lungsim uh sungkhia un,” ci-in Lai Siangtho in hong hanthawn hi. (Late 62:8, ZSV) Tua ahih manin lungsim takpi tawh lawptaka thu i nget ding kisam hi. Aw gingin, ahih kei leh aw suak lo-in thu i ngen thei a, zahtakna a lak omdan ahih ding kisam hi. A hun le a mun ciangtan om lo-in thu kingen thei hi.
3. Pasian in i thungetnate koi bangin hong dawng a hiam?
Nam tuamtuam tawh hong dawng hi. Jehovah in Lai Siangtho hong pia a, tua sungah i theihnop dotnate ii a dawnna om hi. Lai Siangtho in “mi pillote pilsak hi.” (Late 19:7; James 1:5 sim in.) Haksatna i thuak ciangin Pasian in lungdaihna hong pia thei hi. Tua bek tham loh i kisap hun ciangin zong amah a bia mite tungtawnin huhna hong pia thei hi.
ZON BEH INLA, MUH BEH IN
Pasian’ deihna tawh kituaka thu na nget theih dan kan inla, thungetna in hamphatna hong ngahsak theih dan zong kan in.
4. Pasian in a ngaihsak thungetna
Pasian in i thungetnate bang tungah bulphuhin hong sang a hiam? VIDEO hong in.
Jehovah in ama kiangah thu i nget ding deih hi. Late 65:2 sim in. Tua khit teh hih dotnate kikum un:
-
“Thungetna a zapa” in ama kiangah thu hong ngensak nuamin na um hiam? Bang hang hiam?
I thungetnate Pasian in hong ngaihsak ding i deih leh Pasian’ tehna tawh kituaka i om ding kisam hi. Mikah 3:4 le 1 Peter 3:12 sim in. Tua khit teh hih dotna kikum un:
-
I thungetnate Pasian in hong ngaihsak ding i deih leh bang i hih ding kisam a hiam?
Gal a do uh ciangin a langnihun gal zawh nadingin thu ngentuak uh hi. Tua banga amau thungetnate Pasian in dawng ding hi, ci-a a lamet uh pen ahi thei ding hiam?
5. I thungetna pen lungsim tawng pan ahih ding kisam
Mi pawlkhat in a kibang kammalte lo kikkika thu ngen dingin kihilh uh hi. Tua banga thu i nget pen Pasian in deih ding a hiam? Matthai 6:7 sim in. Tua khit teh hih dotna kikum un:
-
Thu i nget ciangin ‘kam tampi luilui’ pen koici pelh thei ding i hiam?
Jehovah tungah lungdamna na koh theih nading thu khatta nisimin ngaihsun in. Tua bangin kal khat bupin ngaihsun lecin, a kibang lo thu sagih hong om ding ahih manin na thungetnate kithuap nawn lo ding hi.
A migi papi khat in a tapa’ lungsim sunga om thute genkhiasak nuam hi. Tua bangmahin, Jehovah in zong i lungsim sung pan lawptaka thu i nget ding deih hi
6. Thungetna pen Pasian hong piak letsong hi
Nuntakna-ah, a diakin haksatna i tuah hun ciangin thungetna in koi bangin hong thahatsak a hiam? VIDEO hong in.
Thungetna in lungdaihna hong neisak thei hi, ci-in Lai Siangtho in kamciam hi. Filippi 4:6, 7 sim in. Tua khit teh hih dotnate kikum un:
-
Thungetna in buainate a siansak zawh den loh hangin, koi bangin hong huh thei a hiam?
-
Bang adingin thu ngen nuam na hiam?
A lungluthuai thu
“Amen” cih kammal in “tua bangin piang takpi hen,” ahih kei leh “hitakpi hen,” cih khiatna nei hi. Lai Siangtho hun lai-in, thungetna a tawp ciang “amen” ci uh hi.—1 Khang Tangthu 16:36.
7. Thunget nading hun pia in
Khat veivei ciangin thunget ding mangngilh zah donga nasep i hauh hun zong om khathei hi. Thungetna pen Jesuh adingin bangzah takin thupi a hiam? Matthai 14:23 le Marka 1:35 sim in. Tua khit teh hih dotnate kikum un:
-
Jesuh in thunget nading hun a ngah nadingin bang hih a hiam?
-
Bang hun ciangin hun pia-a thu ngen thei ding na hiam?
MI PAWLKHATTE’ GEN: “I thunget khempeuh pen a kingah khin zong hi tuan kei.”
-
Nangh bangci ngaihsut na hiam?
TOMLAKNA
Lungsim takpi tawh thungetna in Pasian tawh hong kinaisak a, lungdaihna hong neihsak banah Jehovah’ deihnate sem dingin zong tha hong neisak thei hi.
Kikupkikna
-
Kua kiangah thu ngen ding ihi hiam?
-
Koi bang danin thu ngen ding ihi hiam?
-
Thungetna i hamphatpih dan pawlkhat in bang a hiam?
THEIH BEH NADING
Thungetna tawh kisai mite’ dot theih zel dotnate ii a dawnna zong in.
“Thungetna Tawh Kisai Na Theih Ding A Kisam Thu Sagih” (Vilnatausang, October 1, 2010)
Thunget ding a kisapna a hang le na thunget dan a khantoh theih nadingin bang hih thei na hiam, cih kan in.
Kua kiangah thu ngen ding ihi hiam, cih tawh kisai Lai Siangtho hong hilhna ngaihsun in.
“Mi Siangthote Kiang Thunget Ding A Kilawm Hiam?” (Website-a thu)
Hih music video in, a hun le a mun ciangtan om lo-in thu kingen thei, cih hong theisak hi.
