SIN DING THU 11
Lai Siangtho Na Sim Ciang, Phattuamna Tampi Na Ngah Theih Dan
Nasep a haksa khat kipat ding na ngaihsut ciangin na lunghimawh ngei hiam? Nasep a baih zawk nadingin khatvei sep ciang, tawmta-a khenin sem thei hi teh. Lai Siangtho na sim ciangin zong tua bangmah hi ding hi. ‘Koi pan ka kipan tam?’ ci-in ngaihsun khathei ding hi teh. Lai Siangtho na sim ciang le na sin ciangin nuam na sak theih nadinga hong huh thei a baih mahmah thu pawlkhat hih sin ding thu-ah kikum ding hi hang.
1. Lai Siangtho manmana sim ding bang hang kisam a hiam?
“TOPA [Jehovah] thu,” ahih kei leh Lai Siangtho manmana a simte pen mi nuamsate hi-in, a maa pai mahmah ding uh hi. (Late 1:1-3 sim in.) Sim na kipat tungin ni khatin minute tawmvei sung bek sim in. Pasian’ Kammal na theih semsem ciangin Lai Siangtho sim nuamsa semsem ding hi teh.
2. Lai Siangtho na sim ciang, hamphatna na ngah nadingin bang in hong huh ding a hiam?
Lai Siangtho i sim ciang, hamphatna tampi i ngah nadingin tawmvei sung khawlin i sim thu pen limtaka ngaihsut ding kisam hi. Sim bek hi lo-in, i “lungngaihngaih” ding zong kisam hi. (Late 119:97) Lai Siangtho na sim ciangin, ‘Hih Lai Siangtho mun in Jehovah’ thu bang gen a hiam? Bangci nuntakpih thei ding ka hiam? Hih Lai Siangtho mun zangin midangte koici huh thei ding ka hiam?’ ci-in nang le nang kidong in.
3. Lai Siangtho sim nading hun na ngah nadingin bang hih thei na hiam?
Lai Siangtho sim nading hun ngah lo-in na om hiam? Ei a tamzaw in tua bangin ki-om thei hi. ‘Na hun neih khempeuh a hoih lama zat’ ding hanciam in. (Efesa 5:16) Ni simin Lai Siangtho sim nadingin hun a tuamin koih thei hi teh. Mi pawlkhat in zingsang tungin sim uh a, pawlkhatte leuleu in sun an nek hunin sim uh hi. Zan lupkuan gamdaih hun cianga a simte zong om hi. Nang adingin bang hun lempen ding a hiam?
ZON BEH INLA, MUH BEH IN
Lai Siangtho sim na lunglut theih semsem nadingin na kithawikholh theih dan kan in. Lai Siangtho sinna pan hamphatna tampi na ngah theih nadinga na hih theih dingte zong kan in.
Nek theih a tuamtuam duh dinga i kisin theih mah bangin, Lai Siangtho sim nuam i sak theih nadingin zong i kisin thei hi
4. Lai Siangtho sim nuam na sak nadingin hanciam in
Lai Siangtho sim kipat ding haksa khathei ding hi. Ahih hang, i nek ngei loh nek theih khat peuhpeuh pen i ciap kawmin lim i sak theih mah bangin, Lai Siangtho zong i sim kawmin “duh belin” nei-in kisimsuak nuam ding hi. Peter Masa 2:2 sim in. Tua khit teh hih dotna kikum un:
-
Nisimin Lai Siangtho sim lecin sim nopna lungsim le simsuaknopna lungsim nei dingin na ki-um hiam?
Mi pawlkhat in Lai Siangtho sim nuam a sak nadingun bang hih uh a hiam, cih na theih nadingin VIDEO hong in. Tua khit teh hih dotnate kikum un.
-
Hih video-ah, khangnote in bang haksatnate na nawkzo uh a hiam?
-
Lai Siangtho sim ding, cih a ngimna uh a tangtun zawh nadingun bang in amau na huh a hiam?
-
Lai Siangtho sim a lunglut semsem nadingun bang hih uh a hiam?
Sim na kipat theih nadinga na sep theih dante:
-
Tu huna a kizang Lai Siangthote lak pan lehkhiat dan a manpen teel in. Nang’ kampau tawh New World Translation Lai Siangtho a om leh sim in.
-
Na deihpen mun pan sim kipan in. Na theih nadingin “Lai Siangtho Simna” cih pen en in.
-
Na sim khit zah ciamteh in. Hih laibu-a “Lai Siangtho Na Simkhit Zah” cih pen zang in.
-
JW Library®app zang in. Tua hileh Lai Siangtho pen koi mun koi munah na om zongin phone tawh ahi a, tablet tawh ahi zongin sim thei, ngai thei ding hi teh.
-
New World Translation sunga om appendix-te zang in. Tua sunga om gamlimte, hilhcian nadinga a kibawl limte le kammal khiatna a kigelhte in Lai Siangtho sim hong lunglutsak semsem ding hi.
5. Lai Siangtho sinna ading kithawikhol in
Late 119:34 sim in. Tua khit teh hih dotna kikum un:
-
Lai Siangtho na simma le Lai Siangtho sin nading na kithawikholh ma-in bang hang thunget ding kisam a hiam?
Lai Siangtho sinna pan hamphatna tampi na ngah theih nadingin bang na hih ding kisam a hiam? Sin ding thu khat na kithawikholh ciangin, hih a nuai-a thute bangin hih sin in:
-
Sin ding thu a kipatna lama laikhawkte sim in.
-
Lai Siangtho munte sim inla, a thu tawh koi bangin kizom hiam, cih na tel nadingin hamciam in.
-
Dotna ii a dawnna sunga a thupi diak kammalte le kamlomte git in. Tua hileh Lai Siangtho hong sinpihte tawh na kikup dan uh hong nuam ding hi.
A lungluthuai thu
Jehovah Tecite in Lai Siangtho a tuamtuam zang uh hi. Ahih hang lehkhiat dan a man, a tel baih le Pasian’ min a zang New World Translation of the Holy Scriptures deihpen uh hi.—Website-a thu “Jehovah Tecite In Lai Siangtho A Tuamin A Nei Uh Hiam?” cih en in.
MI PAWLKHATTE’ GEN: “Lai Siangtho sin nading hun nei ke’ng. Nasep gimlua ing.”
-
Nangh bangci ngahsut na hiam?
TOMLAKNA
Lai Siangtho pan hamphatna tampi na ngah theih nadingin na sim ding hun pen geel in. Na sim thute na tel nadingin thu ngen in. Lai Siangtho sinna adingin kithawikhol in.
Kikupkikna
-
Lai Siangtho na sim ciang, hamphatna tampi na ngah theih nadingin bang in hong huh ding a hiam?
-
Lai Siangtho sim nading le kan nading hun na ngah nadingin bang hih thei na hiam?
-
Lai Siangtho sinna ading kithawikholhna in bang hangin hamphatna om a hiam?
THEIH BEH NADING
Lai Siangtho na sim ciang, hamphatna tampi hong ngahsak thu pawlkhat ngaihsunkik in.
“Lai Siangtho In Nuntakna A Khantohsak Theih Dan” (Vilnatausang No. 1 2017)
Lai Siangtho sim theih dan thu thumte kan in.
“Lai Siangtho In Koi Bangin Hong Huh Thei A Hiam?—Khen 1: Lai Siangtho Kantelna” (Website-a thu)
Lai Siangtho sim nuam na sak theih nadingin bang hih thei na hiam, cih kan in.
Kum tampi Lai Siangtho a simte kiangah amau’ sim dan na dong in.
