SIN DING THU 16

Jesuh Leitungah A Om Lai-in Bangteng Sem A Hiam?

Hong

Mi tampite in Jesuh pen bangmah a sem thei lo a suaktung naungek, kamsang mipil, ahih kei leh a si dektak mi khat bangin ngaihsun uh hi. Ahih hang, leitunga a nuntakna thute kan leng, ama thu i thei semsem ding hi. Hih sin ding thu-ah Jesuh ii a thupi pena a nasep pawlkhat le tuate na hamphatpih theih dan kikum ding hi hang.

1. Jesuh ii a thupi pen nasep in bang a hiam?

‘Pasian’ Ukna hanga lungdamna thu hilh’ pen Jesuh ii a thupi pen nasep hi. (Luka 4:43 sim in.) Mihingte’ buaina khempeuh a vengsak thei gam, ahih kei leh kumpi ki-ukna khat pen Pasian in phut ta ding ahihlam a lungdamhuai thu na taangko hi. a Tua a lungdamhuai thu pen Jesuh in kum thum le a lang sung, hanciam takin na taangko hi.—Matthai 9:35.

2. Jesuh in bang hang na lamdangte bawl a hiam?

‘Jesuh tungtawnin Pasian in lim le na lamdangte bawlin na hong sem hi,’ ci-in Lai Siangtho in gen hi. (Sawltak 2:22) Jesuh in Pasian’ piak vangliatna tawh huihpi daisak, mi tul tampi an vak a, cinate damsakin, a site nangawn zong hingkiksak hi. (Matthai 8:23-27; 14:15-21; Marka 6:56; Luka 7:11-17) Hih na lamdangte in Jesuh pen Pasian’ sawl mi ahihlam hong theisak hi. Jehovah in mihingte’ buaina khempeuh vengsak dingin thahatna a neihlam zong hong lak hi.

3. Jesuh’ nuntakzia pan bang sin thei i hiam?

Jesuh in na khempeuhah Jehovah’ thu mang hi. (Johan 8:29 sim in.) Langpannate kawmkalah a Pa in a sepsaknopte a sih dongin cihtakna tawh sem hi. Tua in mihing te’n haksatna kawmkalah zong Pasian’ na sem thei uh ahihlam hong theisak hi. Tua bang dan tawh Jesuh in ‘ama khekhap i zuih theih nadingin etteh ding lim hong nusiat hi.’—1 Peter 2:21.

ZON BEH INLA, MUH BEH IN

Jesuh in lungdamna thu a taangko dan le na lamdangte a bawl dan kan in.

4. Jesuh in lungdamna thu taangko

Jesuh in leivui a sah mahmah lampite-ah tai tampi khe tawh pai-in mi a tam theithei kiangah lungdamna thu taangko hi. Luka 8:1 sim in. Tua khit teh hih dotnate kikum un:

Jesuh in a thu ngai dinga a hong pai mihonte kiang bekah thu taangko a hiam?
Jesuh in mite a muh theih nadingin koi bangin hanciam a hiam?

Messiah in lungdamna thu taangko ding ahihlam Pasian in na genkhol hi. Isaiah 61:1, 2 sim in. Tua khit teh hih dotnate kikum un:

Hih genkholhna pen Jesuh in koi bangin tangtungsak a hiam?
Hih lungdamna thu pen tu huna mite’ zak ding kisam na sa hiam?

5. Jesuh in a manpha thute hong hilh

Jesuh in Pasian Gam lungdamna thu a taangko banah zat theih pah ding thute zong hilh hi. A minthang mahmah Mualtung Thuhilhna lak pan thu pawlkhat na ngaihsut theih nadingin Matthai 6:14, 34 le 7:12 sim in. Tua khit teh hih dotnate kikum un:

Hih Lai Singtho munte-ah Jesuh in i zat theih pah ding bang thute hong hilh a hiam?
Hih thute pen tu hunah zong a zat taak lai hiam?

6. Jesuh in na lamdangte bawl

Jehovah in Jesuh pen nalamdang tampi a bawl theih nadingin vangliatna na pia hi. Gentehna-in, Marka 5:25-34 sim in. Ahih kei leh VIDEO hong in. Tua khit teh a nuai-a dotnate kikum un.

VIDEO: A Cina Numei Khat Hong Damsiangkik (5:10)

Hih video sungah, cina nu in bang um a hiam?
Hih nalamdang bawlna-ah bang in na lungsim hong sukha a hiam?

Johan 5:36 sim in. Tua khit teh hih dotna kikum un:

Jesuh’ bawl na lamdangte in ama thu bang “kilangsak” a hiam?

A lungluthuai thu

Leitunga Jesuh’ nuntakna thu a tamzaw pen Lungdamna Thu laibu lite ahi—Matthai, Marka, Luka, le Johan laibute-ah kigelh hi. Lungdamna Thu a atte in Jesuh’ tungtang thu tuamtuamte na at uh hi. Hih laibu lite i sim ciangin a lungluthuai mahmah Jesuh’ nuntak ziate i theithei hi.

MATTHAI

in Lungdamna Thu a masa pen na at hi. Jesuh’ thuhilhnate le a diakin Pasian Gam thu na limgen pen hi.
MARKA

at Lungdamna Thu pen a tompen hi. A lunglawphuai thupiangte kihel hi.
LUKA

in thungetna a thupi dan le Jesuh in numeite a hehpih dan na limgen hi.
JOHAN

in Jesuh le a lawm itte kihona banah midangte tawh a kihonate uh na gelh ahih manin Jesuh’ pianzia hong theisak hi.