SIN DING THU 17

Jesuh Pen Koi Bang Mi A Hiam?

Hong

Hih leitunga Jesuh thugente le a nasepte i kan ciangin Jesuh’ pianziate i thei hi. Tua in Jesuh le a Pa Jehovah tawh kinaih semsem nopna lungsim hong neisak hi. Jesuh’ pianzia hoih pawlkhat in bang a hiam? I nuntakna-ah Jesuh pen bangci etteh thei ding i hiam?

1. Jesuh in koi bang danin a Pa sun a hiam?

Vantungah Jesuh in itna a nei a Pa tawh kum awn tampi tak sung omkhawmin, a Pa kiang panin kisin hi. Tua ahih manin a Pa’ lungsim le ngaihsutna bang, hong nei thei-in hong sem thei hi. (Johan 5:19 sim in.) Jesuh in a Pa’ pianziate kicing takin etteh ahih manin: ‘Kei a hong mu khinte in Pa a mu khin ahi hi,’ ci-in na gen thei hi. (Johan 14:9) Jesuh’ pianziate kan lecin, Jehovah pen thei cian semsem ding hi teh. Gentehna-in, Jesuh in mite a don dan pan Jehovah in nang hong don mahmah ahihlam kilang hi.

2. Jesuh in Jehovah a itna koici lak a hiam?

“Leitung mite in Pa Pasian ka itna thu a theih nadingun Pa’ vaihawmna bangbangin a gamta ding ka hi hi,” ci-in Jesuh in gen hi. (Johan 14:31) Jesuh leitungah a om lai-in a haksat hun nangawnah zong thumanna tawh a Pa it mahmah ahihlam na lak hi. A Pa it ahih manin a Pa’ thu mite kiangah genin a Pa tawh kizopna hoih a neih theih nadingun na huh hi.—Johan 14:23.

3. Jesuh in mite a itna koici lak a hiam?

Jesuh in ‘mihingte it mahmah hi,’ ci-in Lai Siangtho in gen hi. (Paunak 8:31, NWT) Tua ahih manin, mite hopihin tha pia a, angsung khual lo-in huh hi. Vangliatna le hehpihna a neihlam a kilangsak na lamdangte zong bawl hi. (Marka 1:40-42) Mite hehpihin deidanna nei lo hi. Ama kammalte in a thuman mite adingin hehnepna pia-in lametna zong neisak hi. Mi khempeuh, a diakin ama thuhilhna a zuite it ahih manin gimna a thuak ding le a si dingin kipiakhia ngam hi.—Johan 15:13, 14 sim in.

ZON BEH INLA, MUH BEH IN

Jesuh’ pianziate le Jesuh banga itna le citna i lah theih dan kan in.

4. Jesuh in a Pa it

Jesuh’ etteh ding lim in Pasian tunga itna i lah theih dan hong hilh hi. Luka 6:12 le Johan 15:10; 17:26 sim in. Lai Siangtho mun khat ta sim khit ciangin hih dotna kikum un:

Jesuh ettehin Jehovah i itlam koici lak thei i hiam?

Jesuh in vantunga om a Pa it ahih manin thu ngenin hopih den hi

5. Jesuh in huhna a kisam mite don

Jesuh in ama ading sangin midangte ading don zaw hi. A gim mahmah lai-in zong hun le thatangte zangin mite na huh hi. Marka 6:30-44 sim in. Tua khit teh hih dotnate kikum un:

Hih thupiang sungah, Jesuh in midangte koi bangin don a hiam?—A neu 31, 34, 41, le 42 en in.
Mite huh dingin Jesuh pen bang in tawsawn a hiam?—A neu 34 en in.
Jesuh in Jehovah’ pianzia etteh ahih manin, hih thupiangte khempeuh in Jehovah’ thu bang hong hilh a hiam?
Jesuh in mite a don dan pen koici etteh thei ding ihi hiam?

6. Jesuh cingh mahmah hi

Jesuh pen a hauh loh hangin cingh mahmah hi. Midangte zong tua banga a cingh dingin hanthawn hi. Sawltak 20:35 sim in. Tua khit teh hih dotna kikum un:

Jesuh’ gen bangin, lungdam nadingin bang sem thei i hiam?

VIDEO hong in. Tua khit teh a nuai-a dotna kikum un.

VIDEO: “Piakkhiatna-ah Lungdamna Lianzaw Hi”—Tomlakna (4:00)

Neihlelam tampi i neih loh hangin i piakkhiat theih dan pawlkhat in bang a hiam?

A lungluthuai thu

Jesuh’ min suanga Jehovah kiangah thu ngen dingin Lai Siangtho in hong hilh hi. (Johan 16:23, 24 sim in.) Tua banga thu i ngetna in Jehovah tawh i kinai theih nadinga Jesuh’ hong sepsakte tungah lungdamna i lahna ahi hi.

MI PAWLKHATTE’ GEN: “Gentheih haksatna i thuakte Pasian in awlmawh kei.”