SIN DING THU 18

Khristian Mante Khentel Theih Dan

Hong

Khristian a kici mi tampi om hi. Ahih hang, amau’ upnate le gamtatzia tawh kisai tehnate kibang lo hi. Tua ahih leh Khristian mante bangci khentel thei ding ihi hiam?

1. Khristian cih in bang a hiam?

Khristiante pen Jesuh Khrih’ nungzuite ahi uh hi. (Sawltak 11:26 sim in.) Amau in Jesuh’ nungzui ahihlam bangci lak uh a hiam? Jesuh in: “Ka thuhilhnate na zuih paisuak nak-uhleh ka nungzui taktakte na hi ding uh hi,” ci-in na gen hi. (Johan 8:31) Tua ahih manin Khristian mante in Jesuh’ thuhilhnate a man uh kul hi. Jesuh in Lai Siangtho bulphuha thu a hilh mah bangin, Khristian man te’n zong a upna uhah Lai Siangtho mah bulphuh uh hi.—Luka 24:27 sim in.

2. Khristian mante in itna koi bangin lak uh a hiam?

Jesuh in a nungzuite kiangah: “Note ka hong it zahin note khatlekhat na ki-it un,” ci-in na gen hi. (Johan 15:12) Jesuh in a nungzuite a itlam koici lak a hiam? Amaute hun pia-in kikholhpih a, tha pia-in na huh hi. Amau adingin a nuntakna nangawn zong piakhia hi. (1 Johan 3:16) Tua bangmahin, Khristian mante in itna thu kampau bek tawh gen lo-in, khatlekhat a ki-itlam uh pen gamtatna tawh lakkhia uh hi.

3. Khristian mante in bang na sem uh a hiam?

Jesuh in a nungzuite nasep na pia hi. ‘Pasian’ Ukna thu hilh ding,’ ahih kei leh taangko dingin na sawl hi. (Luka 9:2) Khristian masate in kikhopna munte bekah hi lo-in mi tampi omna mun le inna omte kiangah zong taangko uh hi. (Sawltak 5:42 le 17:17 sim in.) Tua mah bangin, tu lai-a Kristian mante in zong mi a muh khempeuhte kiangah Lai Siangtho thuman thutak taangko uh hi. Midangte it uh ahih manin hun le thatangte zangin hehnepna le lametna a pia Lai Siangtho thu hilh uh hi.—Marka 12:31.

ZON BEH INLA, MUH BEH IN

Khristian mante le Jesuh’ thuhilhna zui lo-a amah a etteh lo mite na khentel theih dan kan in.

4. Khristian mante in Lai Siangtho thuman zong uh

Khristian masate in Pasian’ kammalte manphasa uh

Khristian a kici a tamzaw in Lai Siangtho thuman zon ding kisam sa lo uh hi. VIDEO hong in. Tua khit teh a nuai-a dotna kikum un.

VIDEO: Khristian Biakna Hong Kisia (5:11)

Khristian pawlpi pawlkhat in mite’n Jesuh’ thuhilhnate a theih loh nadingin bang hih uh a hiam?

Jesuh in Lai Siangtho sunga thuman na hilh hi. Johan 18:37 sim in. Tua khit teh hih dotna kikum un:

Jesuh’ gen mah bangin, “thuman tawh a kizom” Khristiante pen bangci khentel thei ding ihi hiam?

5. Khristian mante in Lai Siangtho thuman taangko uh

Khristian masate in mite kiangah taangko uh

Jesuh vantungah a kahma-in a nungzuite kiangah tavuan khat pia a, tua pen tu hun ciang dong kisem hi. Matthai 28:19, 20 le Sawltak 1:8 sim in. Tua khit teh hih dotna kikum un:

Taangko nasep pen bangzah tak le bang ciang donga kisem ding a hiam?

6. Khristian mante pen a gen uh le a nasep uh kituak

Tom a kici pasal khat in bang hangin Khristian biakna man mu kisa ta a hiam? VIDEO hong in. Tua khit teh a nuai-a dotnate kikum un.

VIDEO: Biakna Tungah Ka Lungkia (5:20)

Hih video-ah, Tom pen bang hangin biakna tungah lungkia a hiam?
Bang hangin thuman mu kisa ta a hiam?

Kampau sangin gamtatna in thu bunzaw hi. Matthai 7:21 sim in. Tua khit teh hih dotna kikum un:

I uplam i gen bek le gamtatna tawh i lahna, koi pen Jesuh in thupi sa zaw a hiam?

7. Khristian mante khatlekhat ki-it uh

Khristian masate khatlekhat ki-it uh

Khristian mante in a thu uppih unaute adingin a nuntakna uh a kipiakhia ngam takpi uh hiam? VIDEO hong in. Tua khit teh a nuai-a dotnate kikum un.

VIDEO: A Nuntakna A Piakhia Ngam Mi (2:55)

Hih video-ah, Unaupa Johansson adinga a nuntakna piakhia dingin Lloyd pen bang in na tawsawn a hiam?
Amah pen Khristian man hi takpi cih na um hiam?

Johan 13:34, 35 sim in. Tua khit teh hih dotnate kikum un:

Jesuh’ nungzuite (Khristian mante) in nam dang le gam dang mite tungah koici gamtat uh a hiam?
Gal a kido hun ciangin amaute in bang cih ding uh a hiam?

MI PAWLKHATTE’ GEN: “Khristian biakna a tam mahmah hang, i biak Pasian pen khat bek hi.”