SIN DING THU 19
Jehovah Tecite Pen Khristian Mante Ahi Uh Hiam?
Ko Jehovah Tecite in Khristian mante hi-in ka kithei uh hi. Bang hang hiam? Ka upna uh in a bulphuh, a lamdang diak ka min uh, le khatlekhat tunga itna ka kilah dante uh ngaihsun in.
1. Jehovah Tecite’ upna pen bang tungah kibulphuh a hiam?
“[Pasian’] thu in thuman thutak ahi hi,” ci-in Jesuh in gen hi. (Johan 17:17, ZSV) Jesuh mah bangin, Jehovah Teci te’n zong amau’ upna pen Lai Siangtho tungah bulphuh den uh hi. Ko ii khangthak tangthu sittel in. Kum 1870 kiim lai-in, Lai Siangtho sangnaupang honkhat in Lai Siangtho pen limtakin na sittel uh hi. Amaute in a upna uh pen tua hun lai-a Khristian upna (church doctrines) tawh a kibat loh ciang zong, Lai Siangtho tung mahah na bulphuh zaw uh hi. Tua khit ciangin Lai Siangtho thuman a muhkhiatte uh pen midangte kiangah hawmsawn uh hi. a
2. Bang hang Jehovah Tecite, cih min pua ka hi uh hiam?
Jehovah in amah a biate pen ama thu a mana gen uh ahih manin ka tecite, ci-in na sam hi. (Hebru 11:4–12:1) Gentehna-in, tanglai-a ama mite kiangah Pasian in: “Note pen keima teci na hi uh hi,” ci-in gen hi. (Isaiah 43:10 sim in.) Jesuh pen “a muanhuai teci,” ci-in kisam hi. (Maangmuhna 1:5, ZSV) Tua ahih manin, 1931 kumin Jehovah Teci cih min ka pua uh hi. Hih min ka puak manun ka angtang mahmah uh hi.
3. Jehovah Tecite in Jesuh’ itna koi bangin etteh uh a hiam?
Jesuh in a nungzuite it mahmah a, innkuanpih bangin ngaihsun hi. (Marka 3:35 sim in.) Tua mah bangin, ko Jehovah Tecite zong a kipumkhat leitung bup innkuan khat ka hi uh hi. Tua ahih manin khatlekhat unaunu, unaupa, ci-in ka kisam uh hi. (Filemon 1, 2) “Thu uppih mite [unaute] na it un,” cih thupiak zong ka zui uh hi. (1 Peter 2:17) Jehovah Tecite in nam tuamtuam tawh itna lak uh hi. Leitung bupa unaute in haksatna a thuak uh ciangin ka huh uh hi.
ZON BEH INLA, MUH BEH IN
Jehovah Tecite’ tangthu le Khristian mante ahihlam uh a kiciatna thu kan beh in.
Khristian mante’n a upna uh pen Lai Siangtho tungah bulphuh uh a, midangte kiangah zong genkhia uh hi
4. Ka upnate uh Lai Siangtho tungah kibulphuh
Lai Siangtho thuman hong kitel semsem ding cih Jehovah in na genkhol hi. Daniel 12:4 sim in. Tua khit teh hih dotna kikum un:
-
Pasian’ mite in Lai Siangtho limtakin kansuak uh leh, bang “theitel” ding uh a hiam?
Charles Russell le Lai Siangtho sangnaupang honkhatte in Lai Siangtho a kan dan uh en ni. VIDEO hong in. Tua khit teh a nuai-a dotna kikum un.
-
Hih video sungah, Charles Russell le a lawm Lai Siangtho Sangnaupangte in Lai Siangtho koi bangin na kan uh a hiam?
A lungluthuai thu
Khat veivei ciang, ka upnate uh ka puahphat hun uh zong om hi. Bang hang hiam? Ni a hong san semsem ciangin mualte le mun tuamtuam a kimuh cian semsem mah bangin, Lai Siangtho thu damdama ka tel semsem nadingun Pasian in hong huh hi. (Paunak 4:18 sim in.) Tua ahih manin Lai Siangtho pen a kikhel loh hang, Lai Siangtho thuman ka theih semsem uh ciangin ka upnate uh zong ka puahpha zel uh hi.
5. Ka min puak uh tawh kituakin ka nungta uh hi
Jehovah Tecite, cih min pen bang hangin pua ka hi uh hiam? VIDEO hong in. Tua khit teh a nuai-a dotna kikum un.
-
Jehovah Teci, cih min pen bang hangin kilawm mahmah a hiam?
Jehovah in ama teci dingin mihingte bang hangin teel a hiam? Pasian tawh kisai zuauthu kizel ahih manin Jehovah bek Pasian man ahihlam lahkhiat ding kisam ahih man hi. Tua zuauthu nih pen ngaihsun in.
Milim biak pen Pasian in deih hi, ci-in biakna pawlkhatte in hilh uh hi. Siampi Laibu 26:1 sim in. Tua khit teh hih dotnate kikum un:
-
Hih tawh kisai thuman in bang a hiam? Milim biak pen Jehovah in bangci muh a hiam?
Jesuh pen Pasian hi, ci-in biakna makai pawlkhat in hilh uh hi. Johan 20:17 sim in. Tua khit teh hih dotnate kikum un:
-
Hih tawh kisai thuman in bang a hiam? Pasian le Jesuh pen mi khat bek ahi uh hiam?
-
Jehovah in amah le a Tapa tawh kisai thuman taangko dingin a Tecite a sawllam na theih ciangin na lungsim bangci om a hiam?
6. Khatlekhat ka ki-it uh hi
Lai Siangtho in Khristiante pen pumpi nate tawh genteh hi. Korin Masa 12:25, 26 sim in. Tua khit teh hih dotnate kikum un:
-
Khristian mante in haksatna a tuak Khristiante tungah bang a cih ding uh kisam a hiam?
-
Jehovah Tecite itna a kilah dan uh na mu ngei hiam?
Mun khat a om Tecite in haksatna a tuak uh ciangin leitung bupa Tecite in huhpah uh hi. Gentehna khat en ni. VIDEO hong in. Tua khit teh a nuai-a dotna kikum un.
-
Jehovah Tecite ii dongtuak huhna nasep in itna koi bangin lakkhia a hiam?
Khristian mante in gentheih haksatna a thuak mite tungah itna lak uh
MI PAWLKHATTE’ GEN: “Jehovah Tecite pen tu nai-a hong piang biakna thak khat hi lel.”
-
Jehovah in amah a bia mite pen bang hun a kipanin ka tecite, ci-in sam a hiam?
TOMLAKNA
Jehovah Tecite pen Khristian mante ahi uh hi. Leitung bup innkuanpi ka hi uh a, ka upna uh pen Lai Siangtho tungah kibulphuhin, Jehovah tawh kisai thumante ka taangko uh hi.
Kikupkikna
-
Jehovah Tecite cih min pen bang hangin pua ka hi uh hiam?
-
Khatlekhat tungah ki-itna koi bangin kilak ka hi uh hiam?
-
Jehovah Tecite pen Khristian mante ahih uh na um hiam?
THEIH BEH NADING
Jehovah Tecite’ tangthu kan beh in.
Jehovah Tecite—A Gamtang Upna, Khen 1: Khuamial Sung Pana Suahtakna (1:00:53)
Jehovah Tecite in a man lo thuhilhna a pholak dan uh gentehna khat en in.
Jehovah Tecite tawh kisai dotnate ii a dawnna zong in.
“Jehovah Tecite Tawh Kisai A Kidong Thei Zel Dotnate” (website-a laimai)
Muhdahna hangin Stephen pen a gamtat sia mahmah hi. Jehovah Tecite kiangah amah a kikhelsak bang thu mu a hiam?
a Jehovah Tecite in Lai Siangtho thuman hilh nadingin, 1879 kum a kipan Vilnatausang laihawm pen tatsat lo-in thohkhia uh hi.
