Jehovah pen buaina Pasian hi lo hi. (1 Korin 14:33, ZIV) Tua ahih manin ama mite zong paizia kician tak nei-in vaihawmsak dingin i lamen thei hi. Koi bangin Khristian pawlpi paizia kivaihawm a hiam? Pawlpi a khantoh semsem nadingin koici huh thei ding i hiam?

1. Pawlpi lutang in kua a hiam?

“Khazih in pawlpi lutang hi.” (Efesa 5:23, ZSV) Amah in leitung bupa Jehovah’ minamte’ nasep pen vantung panin makaih hi. Jesuh in a picing pawlpi upa honkhat pen “a pil a citak nasem” hi dingin seh hi. Amaute pen Governing Body ci-in zong kisam hi. (Matthai 24:45-​47 sim in.) Kum zalom masa lai-a Jerusalem-a om sawltakte le pawlpi upate mah bangin, Governing Body in zong leitung bupa pawlpite pen lamlak uh hi. (Sawltak 15:2) Ahih hangin hih unaupate pen pawlpi makaite hi lo hi. Jehovah’ lamlahna a ngah nadingun Lai Siangtho simin Jesuh’ makaihna zui uh hi.

2. Pawlpi upate pen kuate hiam? Amau’ tavuan in bang a hiam?

Pawlpi upate pen a picing Khristiante hi uh a, Pasian’ mite Lai Siangtho thu hilhin tha pia uh hi. Ahih hangin khasum sang lo uh hi. Amaute in “sum ngahnopna bek tawh a sem hi loin utna lungsim tawh a semte” ahi uh hi. (1 Peter 5:1, 2) Pawlpi nasemte cih pen pawlpi upate a huhte le mailam hunah pawlpi upa a suak thei dingte ahi uh hi.

Governing Body in pawlpi upa pawlkhatte pen khawkvaan dingin seh hi. Khawkvaante in lamlahna pia ding le thapia dingin pawlpite-ah a ban banin hawh uh hi. Amaute in Lai Siangtho’ kalhna banga kicinna a nei unaupate pen pawlpi upa le pawlpi nasem dingin seh uh hi.​—1 Timoti 3:1-10, 12; Titus 1:5-9.

3. Teci khat ciat ii tavuan in bang a hiam?

Pawlpi sunga om mi khempeuh in kikhopnate-ah kihelna le ahi thei zah a taangkona tawh ‘TOPA’ [Jehovah’] min phat uh hi.’​—Late 148:12, 13 sim in.

 ZON BEH INLA, MUH BEH IN

4. Jesuh pen mi a tawldamsak makai pa hi

Jesuh ii lawptaka hong sapna thu, Matthai 11:​28-​30 ah sim in. Tua khit teh hih dotna kikum un:

• Jesuh pen koi bang makai hi a, koi bang lungsim hong neisak nuam a hiam?

5. Pawlpi upate’n etteh huai-a omna tawh thu hilh uh

1. Pawlpi upate’n amau mahmah ii upna le a innkuanpihte’ upna a kip nadingin hanciam uh

2. Pawlpi upate’n pawlpi sunga om mi khempeuh don uh

3.   Pawlpi upate’n manmanin Pasian thu taangko uh

4. Pawlpi upate’n thu hilh uh. Biakinn hahsiang nasepte-ah zong huh uh

6. Pawlpi upate’ thu mangin na semkhawm un

Pawlpi upate’ thu manga na i sepkhop ding a thupina a hang pen Lai Siangtho in gen hi. Hebru 13:17 sim in. Tua khit teh hih dotnate kikum un:

• Hong makaite’ thu mang a, a gen banga gamta dingin Lai Siangtho in bang hangin hong hanthawn a hiam? Tua tawh kisai nangh bangci ngaihsut na hiam?

Luka 16:10 sim in. Tua khit teh hih dotna kikum un:

• Thuneu khat nangawnah zong pawlpi upate thu manga i sepkhop ding bang hangin thupi a hiam?

 TOMLAKNA

Jesuh pen pawlpi lutang ahi hi. Jesuh’ khut nuai-a om pawlpi upate in hong tawldamsakin, etteh huai-a omna tawh hong hilh uh ahih manin a thu uh mangin ka semkhawm uh hi.

Kikupkikna

• Pawlpi lutang in kua a hiam?

• Pawlpi upate’n pawlpi koi bangin panpih uh a hiam?

• Jehovah a bia mite in bang tavuan nei uh a hiam?