SIN DING THU 21
Lungdamna Thu Koi Bangin Kitaangko A Hiam?
Jehovah in ama Gam tungtawnin mihingte’ haksatna khempeuh hemkhia ta ding hi. Tua a lungdamhuai thu mikim in a theih ding kisam hi. Mi khempeuhte kiangah lungdamna thu taangko dingin Jesuh in thu pia hi. (Matthai 28:19, 20) Tua thupiak pen Jehovah Tecite in koi bangin sem uh a hiam?
1. Tu hunah Matthai 24:14 pen koi bangin tangtung a hiam?
Jesuh in: “Pasian’ hong ukna hangin a lungdamhuai thu, leitung khempeuhah kihilh ding hi,” ci-in genkhol hi. (Matthai 24:14) Hih a thupi mahmah nasep pen Jehovah Tecite in lungdam takin sem uh hi. Leitung bupah kampau 1,000 val tawh ka taangko uh hi! Hih banga a lian mahmah nasep pen sep zawh nadingin kipawlkhopna le nakpi taka hanciamna kisam hi. Jehovah’ huhna lo tawh kisem zo lo ding hi.
2. Mite kiangah taangko dingin koi bangin hanciam ka hi uh hiam?
Mite omna mun khempeuhah ka taangko uh hi. Kum zalom masa lai-a Khristiante mah bangin, “mite inn-ah” pai-in ka taangko uh hi. (Sawltak 5:42) Tua bangin inn lusika pai ka hih manun kum simin mi tampite kiangah ka gen thei uh hi. Inn-ah mi om den lo ahih manin mi tampi omna munte-ah zong ka taangko uh hi. Jehovah le ama ngimna thu pen hun lemtang zongin mite kiangah ka taangko den uh hi.
3. Lungdamna thu taangko dingin kua in tavuan nei a hiam?
Lungdamna thu taangko ding pen Khristian man khempeuhte’ tavuan ahi hi. Nuntakna tawh kisai ahihlam thei ka hih manun thupi ngaihsutin ahi thei zahin ka taangko uh hi. (1 Timoti 4:16 sim in.) Tua banga taangko dingin sum ka sang kei uh hi. “Man piak kul loin . . . na ngah uh bangin . . . man va ngen kei un,” ci-in Lai Siangtho in gen hi. (Matthai 10:7, 8) Taangkona pen Jehovah’ thu manna le amah lungdamsakna ahih manin mi pawlkhatte in a deih loh uh hangin ka taangko veve uh hi.
ZON BEH INLA, MUH BEH IN
Leitung bupah taangko dingin Jehovah Tecite’ hanciamna le Jehovah in a huh dan kan in.
Leitung bupah taangkona: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Mi khempeuhte kiangah taangko dingin ka hanciam uh hi
Mun khempeuha mite kiangah lungdamna thu taangko dingin Jehovah Tecite in nakpi takin hanciam uh hi. VIDEO hong in. Tua khit teh hih dotna kikum un.
-
Taangko dinga Jehovah Tecite’ hanciamna tawh kisai bang in na lungsim la a hiam?
Matthai 22:39 le Rom 10:13-15 sim in. Tua khit teh hih dotnate kikum un:
-
Pasian’ thu taangkona in midangte itna lahkhiatna ahihlam koici lak a hiam?
-
Lungdamna thu a taangko mite pen Jehovah in bangci ngaihsut a hiam?—A neu 15-na en in.
5. Pasian tawh na a semkhawm mite ka hi uh hi
Taangko nasepna pen Jehovah in hong lamlak ahihlam tuahkhakna tampite in lak hi. Gentehna-in, New Zealand gam a om unaupa Paul in nitak lama innsim paina-ah numei khat tawh kimu hi. Tua zingsang mah mahin, mi khat hawhsak dingin Jehovah min tawh thu na ngen hi. “Thu a nget zawh nai thum sungin ka va tung hi,” ci-in Paul in gen hi.
Korin Masa 3:9 sim in. Tua khit teh hih dotna kikum un:
-
New Zealand gama tuahkhakna tawh a kibang tuahkhak thute panin taangko nasep pen Jehovah in hong lamlak ahihlam koici theithei i hiam?
Sawltak 1:8 sim in. Tua khit teh hih dotna kikum un:
-
Taangko na i sep zawh nadingin Jehovah’ huhna bang hang kisam i hiam?
A lungluthuai thu
Kalsimin kallai kikhopna-ah ka taangko dan ding uh hong kisinsak hi. Tua kikhopna-ah kikhawm ngei na hih leh tua kisinna pen bangci muh na hiam?
6. Taangko dinga Pasian’ thupiak ka mang uh hi
Kum zalom masa lai-in, mi pawlkhat in Jesuh’ nungzuite ii thu taangko khaktan na sawm uh hi. Ahih hangin Khristian masate in taangko theihna pen ‘upadi tawh kituaka a kip nadingin’ na hu uh hi. (Filippi 1:7, NWT) Jehovah Tecite in zong tua bangmahin sem uh hi. a
Sawltak 5:27-42 sim in. Tua khit teh hih dotna kikum un:
MI PAWLKHATTE’ DOTNA: “Jehovah Tecite’n bang hangin innsimah Pasian’ thu gen uh a hia?”
-
Nangh bangci dawng ding?
TOMLAKNA
Mi khempeuh kiangah lungdamna thu taangko dingin Jesuh in a nungzuite hilh hi. Jehovah in zong tua na a sem a mite huh hi.
Kikupkikna
-
Leitung bupah kuate in lungdamna thu taangko uh a hiam?
-
Pasian’ thu taangkona in midangte i itlam koici lak a hiam?
-
Pasian’ thu taangko leng, lungnopna kingah dingin na um hiam? Bang hang hiam?
THEIH BEH NADING
Khuapite-ah Jehovah Tecite’ taangko dan en in.
Jehovah Tecite in dongtuak mite koi bangin huh uh a hiam?
Pasian’ na hun bita a sem numei khat ii a lungkimhuai nuntakna thu ngai in.
Lungdamna thu taangko theihna hunpha a ngahsak thukhenna zumpi ii thukhensatnate sim in.
“Pasian Gam Thu A Taangko Mite In Thukhenna Zumah A Thu Uh Tun” (Pasian Gam In Uk Ta!, khenpi 13)
a Lungdamna thu taangko dinga thu a hong pia pa pen Pasian ahi hi. Tua ahih manin Jehovah Tecite in lungdamna thu taangko nadingin mihing thuneite kiang pan phalna kisam lo uh hi.
