SIN DING THU 22

Lungdamna Thu Taangko Theih Dan

Hong

Lai Siangtho thumante na theih ciangin, ‘Hih thu mi khempeuh in thei leh hoih si in teh maw!’ ci-in ngaihsun khathei hi teh. Mi khempeuh in a theih ding uh kisam cih pen man hi. Ahih hangin na theih thute midangte kiangah gensawn ding pen patau khathei ding hi teh. Na patauhnate do zo-in, Lai Siangtho sunga lungdamna thute lawp taka na taangko theih dan kikum ni.

1. Na meltheihte kiangah na thusinte bangci hawmsawn thei ding na hiam?

Jesuh’ nungzuite in: “Kote in ka muhsa uh le ka zaksa uh thute gen loin ka om thei kei ding uh hi,” na ci uh hi. (Sawltak 4:20) Amau in thuman pen manpha sa lua ahih manun mi a tam theitheite kiangah gen nuam uh hi. Nang ee, tua bangin na ngaihsun hia? Ngaihsun na hih leh na theih thute pen na innkuanpihte le na lawmte kiangah zahtakna tawh gen dingin hun lemtang zong in.—Kolose 4:6 sim in.

Na kipat theih dan ding pawlkhat

Na innkuanpihte tawh na kiho ciangin, “Tu kal sungin a lungluthuai thu khat thei ing,” ci-in Lai Siangtho sunga thu khat genpih in.
A cina, ahih kei leh lunghihmawhna a nei na lawmte kiangah a thangahhuai Lai Siangtho thu genpih in.
Nang’ thu a hong dong na naseppih kiangah Lai Siangtho na sinna pan, ahih kei leh kikhopna pana na thu theihte hilh in.
Na lawmte kiangah jw.org website lak in.
Lai Siangtho na sin hun ciang, midangte zong kihel dingin sam in, ahih kei leh jw.org ah Lai Siangtho sinna nget theih dan lak in.

2. Bang hangin pawlpi tawh taangko khawm ding ngimna in a neih taak ngimna hi a hiam?

Jesuh’ nungzuite in a meltheihte kiang bekah thu na gen lo uh hi. Jesuh in a nungzuite pen taangko dingin “khua le mun khempeuhah nih nihin a na pai dingin . . . a mapaisak hi.” (Luka 10:1) Tua banga hoihtaka vaihawm taangkona in mi tampite kiangah lungdamna thu zak theihna hunpha pia hi. Taangko khopna in nungzuite zong lungdamsak mahmah hi. (Luka 10:17) Nangh zong pawlpi tawh taangko khawm dingin ngimna na nei thei ding hiam?

ZON BEH INLA, MUH BEH IN

Lungsim patauhna do zo-a, lungdamna thu taangkona pana lungnopna na neih theih dan kan in.

3. Jehovah in nang hong ompih ding hi

Mi pawlkhat in a taangko nop uh hangin, midangte muh dan ding le thukkik dan ding ngaihsunin lungsim patau khathei uh hi.

Na theih thute genkhiat ding na patau hiam? Bang hang hiam?

VIDEO hong in. Tua khit teh a nuai-a dotna kikum un.

VIDEO: Hangsan Nadingin Jehovah Kiangah Thu Ngen Ing (4:05)

Hih Teci khangnote in launa lungsim koi bangin do zo uh a hiam?

Isaiah 41:10 sim in. Tua khit teh hih dotna kikum un:

Taangko ding na lau hun ciangin thungetna in koi bangin hong huh thei ding a hiam?

A lungluthuai thu

Jehovah Teci a tamzawte in lungdamna thu a taangko ngam ngei lo dingin kingaihsun uh hi. Gentehna-in, Sergey pen amah le amah kimuanna a neih loh banah a pau ngam khollo mi khat ahi hi. Ahih hangin Lai Siangtho a sin hi. “Ka lau hangin ka theih thute midangte kiangah genkhia ing. Lamdang ka sak khatah, tua banga ka genkhiatna in kei le kei kimuanna hong neisakin ka upna zong khauhsak semsem hi,” ci-in gen hi.

4. Zahtakna nei in

Lungdamna thu na gen ciangin bang gen ding cih bek hi lo-in koi bangin gen ding cih zong ngaihsun in. Timoti Nihna 2:24 le 1 Peter 3:15 sim in. Tua khit teh hih dotnate kikum un:

Midangte kiangah Lai Siangtho thu na gen ciangin hih munte koi bangin nuntakpih thei ding na hiam?
Na thugen pen na innkuanpihte le na lawm pawlkhatte in a san loh uh ciangin bang hih thei na hiam? Bang na hih ding kilawm lo a hiam?
Tanggen pah lo-in pilvang taka dotnate i dot pen bang hangin hoihzaw a hiam?

5. Lungdamna thu taangkona in hong lungnuamsak

Jehovah in Jesuh pen lungdamna thu taangko ding nasep na pia hi. Tua nasep pen Jesuh in koici ngaihsut a hiam? Johan 4:34 sim in. Tua khit teh hih dotnate kikum un:

Nekledawn in nuntakna bek hi lo-in, lungnopna zong hong pia hi. Jesuh in lungdamna thu taangkona-a kihelna, Pasian’ deihna banga nasep pen nuntakna an tawh bang hangin genteh a hiam?
Lungdamna thu taangkona pan bang lungnopnate kingah dingin um na hiam?

Sep theih dante

Kallai kikhopna pan kiholimna neih theih dan ding sin in.
Kallai kikhopna-ah sangnaupang tavuan adingin na min pia in. Tua in na theih thute midangte kiangah na gen theih nadingin hong huh ding hi.
“Mi Pawlkhatte’ Gen,” ahih kei leh “Mi Pawlkhatte’ Dotna,” cih thute zangin a kidong thei zel dotnate le nialnate na dawn dan ding kisin in.

MI PAWLKHATTE’ DOTNA: “Dam maw? Bang thu lamdang om a hia?”