Jehovah in vantunga ama innkuan thu hong theisak nuam hi. Tua a innkuan sungah vantung mite kihel a, amaute pen “Pasian’ tapate,” kici hi. (Job 38:7) Vantung mite’ thu Lai Siangtho in bang gen a hiam? Amau tavuan in bang a hiam? Vantungmi khempeuh Pasian’ innkuanpihte ahi uh hiam?

1. Vantung mite pen kuate a hiam?

Jehovah in leitung a bawlma-in vantung mite na bawl hi. Amaute pen Pasian mah banga a kimu thei lo kha mite hi uh a, vantungah om uh hi. (Hebru 1:14) Vantungmi atul-amakin om a, pianzia a tuam tek nei uh hi. (Maangmuhna 5:11) ‘Jehovah’ thugen a ngai, ama thu bangin a semte’ ahi uh hi. (Late 103:20) Tanglai-in, Jehovah in ama thu a gen ding le ama mite a honkhia dingin vantung mite sawl thei zel hi. Tu hunah zong, vantung mite in Pasian’ thu a thei nuam mite ka muh theih nadingun hong lamlak hi.

2. Satan le dawite pen kuate a hiam?

Vantungmi pawlkhat pen Jehovah tungah citak lo uh hi. A langpang masa pen vantungmi in “Dawimangpa ahih kei leh Satan a kici, leitung mi khempeuh a khem pa” ahi hi. (Maangmuhna 12:9) Satan in midangte uk nuam ahih manin ama langpanna-ah kipawl dingin mihing masa pen nupate na thuzawh hi. A nung ciangin adang vantung mite nangawn zong na kihelsak zo hi. Tua a langpang vantung mite pen dawite kici hi. Jehovah in amaute pen vantung panin leitungah khiasuk a, a sawt lo-in susia ta ding hi.​—Maangmuhna 12:9, 12 sim in.

3. Satan le dawite in koi bangin hong khem sawm uh a hiam?

Satan le dawite in dawi siamna le dawite tawh a kizom a hoih lo siamna zangin mite khem uh hi. Gentehna-in, mi pawlkhatte in khutlam ente, aisante, dawi siampute le mi bum theite kiangah thu dong uh hi. Midangte in dawi siamna a kihel zatui kikhoina zong uh a, misite tawh kihopih thei ding ci-a khemna a um zong om uh hi. Ahih hangin Jehovah in: “Vankahte le aisanna lamah kihei kei un,” ci-in vauna pia hi. (Siampi Laibu 19:31) Tua pen Satan le dawite’ hong khemna pan hong hu nuam ahih man hi. Amaute pen Pasian’ galte le ei hong siasak nuamte ahi uh hi.

 ZON BEH INLA, MUH BEH IN

6. Satan le dawite i zo thei hi

Dawite pen Satan in uk hi. Ahih hangin a citak vantung mite pen vantung mite laka a lianpen pa ahi, Mikhael a kici Jesuh in lamlak hi. Mikhael pen bangzah takin vanglian a hiam? Maangmuhna 12:7-9 sim in. Tua khit teh hih dotnate kikum un:

• Kua vanglian zaw a hiam? Mikhael le a vantung mite maw, ahih kei leh Satan le a dawite?

• Jesuh’ nungzuite adingin Satan le dawite lau a kul ding hiam?

Satan le dawite na do zo thei hi. James 4:7 sim in. Tua khit teh hih dotna kikum un:

• Satan le dawite lak pan koici kidal thei na hiam?

 TOMLAKNA

A citak vantung mite in ei hong huh uh hi. Jehovah’ gal Satan le dawite in dawi siamna zangin mite khem uh hi.

Kikupkikna

• Jehovah’ thu mite’n a theih nadingun vantung mite in koi bangin huh uh a hiam?

• Satan le dawite pen kuate a hiam?

• Dawi siamna pen bang hangin i pelh ding kisam a hiam?