SIN DING THU 25
Mihingte Adinga Pasian’ Ngimna In Bang A Hiam?
Lai Siangtho in, “Mihingte a nuntak hun tom mahmah a, lungkhamna tawh kidim hi,” ci-in gen hi. (Job 14:1) Tua pen mihingte adinga Pasian’ ngimna ahi hiam? Hi lo ahihleh mihingte adinga Pasian’ ngimna in bang a hiam? A ngimna a tangtung takpi ding hiam? Lai Siangtho sunga a thangahhuai dawnnate ngaihsun in.
1. Jehovah in koi bang nuntakna hong neisak nuam a hiam?
Jehovah in a hoihpen nuntakna hong neisak nuam hi. Mihing masa pen Adam le Eve bawl a, a nopci mahmah Eden huanah omsak hi. Tua khit ciangin, “Pasian in amaute thupha pia a, . . . ‘Ci pha-in tampi pha unla, leitung dimin . . . ukna nei ta un,’” ci hi. (Piancilna 1:28) Jehovah in amaute ta neisak nuam a, leitung bup paradais suaksak ding le ganhingte kemcing dingin a deih hi. Mihingte khempeuh cidam sitset dingin le a tawntunga nungta dingin Pasian in ngimna nei hi.
Tua bang lianin a hong pian loh hangin, a Pasian’ ngimna kikhel tuan lo hi. (Isaiah 46:10, 11) A thumang mite a kicing dinmunah a tawntunga nungta dingin Pasian in ngimna nei lai veve hi.—Maangmuhna 21:3, 4 sim in.
2. Tu hunah khiatna nei nuntakna koi bangin nei thei ding ihi hiam?
Jehovah in hong bawl lai-in ‘kha thu lamah zawngkhal kisakna,’ ahih kei leh Pasian theih nopna le biaknopna lungsim hong guan hi. (Matthai 5:3-6 sim in.) Amah tawh kizopna hoih hong neisak nuam a, ‘ama lampite i tot ding, amah i it ding,’ le ‘lungsim khempeuh tawh’ ama na i sep ding deih hi. (Thu Hilhkikna 10:12; Late 25:14) Tua bangin sem leng, haksatna i tuah hun ciangin zong lungnopna man kinei thei ding hi. Jehovah i biak ciangin Pasian’ ngimna banga a nungta ihi a, tua in i nuntakna pen khiatna hong neisak hi.
ZON BEH INLA, MUH BEH IN
Ei adingin leitung a puahphat lai-a Jehovah hong itna a liat dan le nuntakna ii ngimna thu Lai Siangtho hong hilh dan kan in.
3. Jehovah in mihingte adingin a hoih mahmah ngimna nei hi
VIDEO hong in. Tua khit teh a nuai-a dotna kikum un.
-
A etlawm mahmah i omna leitung pen Pasian in bang hangin bawl a hiam?
Thuhilhna 3:11 sim in. Tua khit teh hih dotna kikum un:
-
Hih Lai Siangtho mun in Jehovah thu bang hong theisak a hiam?
4. Jehovah’ ngimna kikhel lo
Late 37:11, 29 le Isaiah 55:11 sim in. Tua khit teh hih dotna kikum un:
-
Mihingte adinga Jehovah’ ngimna kikhel lo ahihlam koici theih i hiam?
A kinusiacip innsia khat pen kipuahphakik thei hi. Tua bang mahin, Pasian in zong mi tampite’ don loh hih leitung pen amah a it mite adingin puahphakik ding hi
5. Jehovah i biakna in i nuntakna khiatna neisak
Nuntakna ii ngimna theihna in hong lungdamsak thei hi. VIDEO hong in. Tua khit teh a nuai-a dotna kikum un.
-
Nuntakna ii ngimna thei ahih manin Terumi in bang hamphatna ngah a hiam?
Thuhilhna 12:13 sim in. Tua khit teh hih dotna kikum un:
-
Ei ading na tampi hong bawlsak Jehovah tungah i lungdamna koici thukkik ding i hiam?
MI PAWLKHATTE’ DOTNA: “Nuntakna ii ngimna pen bang a hia?”
-
Nangh bangci dawng ding?
TOMLAKNA
Leitungah a kicing dinmun tawh a tawntunga nungta dingin Jehovah in hong deih hi. Lungsim khempeuh tawh Pasian i biak ciangin, tu mahmahin zong i nuntakna in khiatna hong nei hi.
Kikupkikna
-
Adam le Eve ading Jehovah ii a kipatcila a ngimna in bang a hiam?
-
Mihingte adinga Pasian’ ngimna kikhel lo ahihlam koici theih i hiam?
-
Khiatna nei nuntakna koici nei thei ding na hiam?
THEIH BEH NADING
Eden huan na om takpi ahihna thu kan in.
“Eden Huan A Om Takpi Hiam?” (Vilnatausang, January 1, 2011)
Leitung a tawntungin om ding ahihlam a muanhuaina thu sim in.
Nuntakna ii a khiatna muh khiatna thu tawh kisai Lai Siangtho’ genna sittel in.
Ama ading na khempeuh kicing khin banga a kingaihsun mi khat in a nuntakna-ah a kisam khat a muhkhiat dan en in.
a A pian lohna a hang pen sin ding thu 26-ah thei ding hi teh.
