Mi khat in tuahsiatna a tuah hun ciangin, “Ba’hang hih bang tuakkha ka hia?” ci-in dong thei hi. Lai Siangtho in kician taka dawng ahih manin lungdamhuai mahmah hi!

1. Leitungah siatna a hong kipat nadingin Satan in bang hih a hiam?

Dawimangpa Satan in Pasian langpangin na do hi. Satan in midangte uk nuam ahih manin mihing masa pen ahi, Adam le Eve pen a langpanna-ah kihel dingin na thuzawh hi. Satan in zuaugenin Eve khem hi. (Piancilna 3:1-5) Jehovah in na hoih khat pia nuam lo cih ngaihsutna neisak hi. Tua in, Pasian thu mang kei uh leh mite’n nuamsa zaw ding cih a genna hi. Eve kiangah a sih loh ding thu a gen pen Satan ii zuaugen masakpen hi. Tua ahih manin, Lai Siangtho in Satan pen “zuauna khempeuh a pianna a zuaugen pa,” ci-in sam hi.​—Johan 8:44.

2. Adam le Eve in bang teel uh a hiam?

Jehovah pen Adam le Eve tungah cingh mahmah hi. Singkung khat ii gah simloh adang huan sunga singgah khempeuh nek phal hi. (Piancilna 2:15-17) Ahih hangin amau in nek dinga a kikham singgah pen nek dingin na khensat sese uh hi. Eve in “singgah loin a ne hi.” A nung ciangin Adam in zong “a ne hi.” (Piancilna 3:6) A nihun Pasian’ thu na mang lo uh hi. Adam le Eve pen a cingtaak mite ahih manun thuman ding haksa lo hi. Ahih hangin Pasian’ thu pen mang nuam lo-in mawhna na bawl uh a, Pasian’ ukna na nial uh hi. Tua ahih manin nakpi takin gimna na thuak uh hi.​—Piancilna 3:16-19.

3. Adam le Eve ii thu khensatna in eite koi bangin hong sukha a hiam?

Adam le Eve in mawhna a bawl uh ciangin a cingtaak lo mi hong suak uh hi. Tua cingtaak lohna pen a suanlekhakte tungah piasawn uh hi. Adam tawh kisai-in Lai Siangtho in hih bangin gen hi: “Mi khat hangin leitungah mawhna hong om a, tua mawhna hangin sihna hong piang hi. . . . Tu-a bangzia-in mi khempeuh tungah sihna hong tung hi.”​—Rom 5:12.

Thu tuamtuam hangin gimna i thuak hi. I thu khensatna a khialh manin gimna i thuak hun a om mah bangin, midangte’ thu khensatna hoih lo hangin gimna i thuak hun zong om hi. Khat veivei ciangin, om loh nading hun le om loh nading munah i om khak manin gimna i thuak hun zong om hi.​—Thuhilhna 9:12 sim in.

 ZON BEH INLA, MUH BEH IN

4. Gimnate a piangsak pa

Mi tampite in leitung pen Pasian ukna nuai-a om bangin ngaihsun uh hi. Tua pen a man hiam? VIDEO hong in.

James 1:13 le 1 Johan 5:19 sim in. Tua khit teh hih dotna kikum un:

• Siatna le gimnate pen Pasian piansak ahi hiam?

5. Satan’ ukna hanga a hong piang thute ngaihsun in

1. Adam le Eve pen a cingtaak mi hi-in Paradais-ah om uh. Ahih hangin Satan’ thu mangin Jehovah na langpang uh

2.   Langpanna hangin hih leitung pen mawhna, gimna, le sihna tawh kidim

3. Jehovah in mawhna, gimna le sihnate maimangsak ding. Mihingte hong kicingtaak kikin Paradais-ah tengkik ding uh

6. Jehovah in gimna i thuakte lunghimawh

Gimna i thuakte Pasian in a lunghimawh hiam? Kumpi David le sawltak Peter’ lai-atte limtakin ngaihsun in. Late 31:7 le 1 Peter 5:7 sim in. Tua khit teh hih dotna kikum un:

• Jehovah in gimna i thuakte lunghimawh ahihlam na theih ciangin na lungsim bangci om a hiam?

 TOMLAKNA

Dawimangpa Satan le mihing nupa masate pen leitunga siatnate a tungsakte ahi uh hi. Jehovah in gimna i thuak pen lunghimawh mahmah a, a sawt lo-in hong hepkhiatsak ding hi.

Kikupkikna

• Satan in Eve pen koi bangin khem a hiam?

• Adam le Eve’ langpanna hangin bangteng tuak ihi hiam?

• Jehovah in gimna i thuakte lunghimawh ahihlam koici theih ihi hiam?