Mihing nupa masa pen Adam le Eve in Pasian’ thu mang lo uh ahih manin mawhna, gimna, le sihnate hong om hi. a Ahih hangin lametna bei lo hi. Jehovah in a Tapa Jesuh Khrih zangin mawhna le sihna pan i suahtak theih nading hong vaihawmsak hi. Jesuh in a sihna tawh tatkhiatna hong pia cih Lai Siangtho in hong hilh hi. Tatkhiatna cih pen mi khat a suahtak theih nadinga a kipia sum ahi hi. Jesuh in a cingtaak a mihing nuntakna pen hong tatkhiat nadingin pia hi. (Matthai 20:28 sim in.) Leitungah a tawntunga a nuntak theihna pen phal taka a piakkhiat ciangin, Adam le Eve in a suplawh khempeuh i ngahkik theih nading lampi hong kihong hi. Amah le Jehovah’ hong itna a nasiat dan zong hong theisak hi. Jesuh’ sihna tunga lungdam semsem dingin hih sin ding thu in hong huh ding hi.

1. Jesuh’ sihna pan tu-in koi bang hamphatna ngah i hiam?

Mawh nei mite ihih manin Jehovah’ deih loh na tampi i sem hi. Ahih hangin i mawhnate ading nakpi taka kisikkik a, Jesuh tungtawnin Jehovah kiangah mawh maisakna ngenin, mawhna i bawlkik loh nadingin hanciam leng, Pasian tawh kizopna hoih i nei thei ding hi. (1 Johan 2:1) “Khrih mahmah zong note adingin si a, Pasian’ kiangah hong tunpih theih nadingin mihoih khat pen mihoih lote’ mawhna hangin khatvei a si hi,” ci-in Lai Siangtho in gen hi.​—1 Peter 3:18.

2. Jesuh’ sihna pan mailam hunah koi bang hamphatna ngah ding ihi hiam?

Jehovah in Jesuh pen a cingtaak mihing nuntakna piakhia dingin leitungah hong sawl hi. Tua ahih manin, ‘Jesuh a um mi khempeuh si nawn loin hing tawntung thei ding uh hi.’ (Johan 3:16) Jesuh’ sihna hangin Jehovah in Adam’ thuman lohna hanga a piang siatna khempeuh hemkhia ta ding hi. Jesuh’ kipiakkhiatna pen umin sang lehang, leitung paradais-ah tawntung nuntakna i ngah thei ding hi.​—Isaiah 65:21-23.

 ZON BEH INLA, MUH BEH IN

3. Jesuh’ sihna in mawhna le sihna pan hong suaktasak

1. A cingtaak mi Adam in Pasian’ thu mang lo ahih manin mihingte’n mawhna nei-in si uh hi

2. A cingtaak mi Jesuh in Pasian’ thu mang ahih manin mihingte kicingtaakin tawntung nuntakna hunpha ngah thei uh hi

4. Jesuh’ sihna hangin mi khempeuh in hamphatna ngah thei hi

 5. Tatkhiatna pen nang adinga Jehovah’ hong piak letsong hi

Jehovah’ lawmte in tatkhiatna pen mi khat ciat ii ngah letsong bangin ngaihsun uh hi. Gentehna-in, Galati 2:20 sim in. Tua khit teh hih dotna kikum un:

• Sawltak Paul in tatkhiatna pen ama adinga Pasian’ piak letsong banga a muhlam koici lak a hiam?

Adam in mawhna a bawl ciangin, amah le a suanlekhakte khempeuh in si dinga thukhenna thuak uh hi. Ahih hangin Jehovah in tawntung nuntakna na ngah theih nadingin a Tapa sawlin sihna thuaksak hi.

A nuai-a Lai Siangtho munte na sim ciangin, Jesuh in gimna a thuak laitakin Jehovah’ lungsim om dan ding mitkha tawh bawl in. Johan 19:1-7, 16-18 sim in. Tua khit teh hih dotna kikum un:

• Jehovah le Jesuh’ hong sepsaknate tungah na lungsim bangci om a hiam?

 TOMLAKNA

Jesuh’ sihna hangin Jehovah in i mawhnate hong maisak a, tawntung nuntak theihna hunpha i ngah hi.

Kikupkikna

• Jesuh bang hang si a hiam?

• Jesuh ii a cingtaak nuntakna pen koi bang danin a kikim tatkhiatna hi a hiam?

• Jesuh’ sihna hangin koi bang hamphatna ngah thei na hiam?