SIN DING THU 32

Pasian Gam In Tu’n Ukta!

Hong

Kum 1914 a kipanin vantungah Pasian Gam in ukta hi. Tua pen mihing ukna a bei ding hun, nitawp ni hun a kipatna zong ahi hi. Koi bangin theithei i hiam? Lai Siangtho genkholhna banah, kum 1914-a kipan leitung dinmun le mihingte’ lungsim puakzia a kikhel dante limtakin ngaihsun in.

1. Lai Siangtho in bangteng genkhol a hiam?

Daniel laibu in “kum sagih” a bei hun ciangin Pasian Gam in uk kipan ding cih gen hi. (Daniel 4:16, 17) Kum zalom tampi a sawt khit ciangin Jesuh in, “Gentail mite’ uk hun” a kici tua hun pen bei nai lo cih gen hi. (Luka 21:24) Kum 1914 kumin, tua kum sagih bei ahihlam kikum ni.

2. Kum 1914 a kipanin leitung dinmun le mihingte’ lungsim puakzia koici om a hiam?

Nungzuite in Jesuh kiangah: “Nang na hong pai ding hun le hun bei nading bang lim hong om ding ahi hiam?” ci-in na dong uh hi. (Matthai 24:3) Jesuh in a dawnna-ah Pasian Gam Kumpi-in vantungah a ukna a kipat khit cianga a hong piang ding thu tampite genkhol hi. Tuate lakah galkidona, kialpi, le zinling cihte kihel hi. (Matthai 24:7 sim in.) “Nitawp ni hun” sunga om mihingte’ lungsim puakzia hangin nuntakna pen “lauhuai” ding cih zong Lai Siangtho in na genkhol hi. (2 Timoti 3:1-5) Kum 1914 a kipanin hih dinmunte le lungsim puakziate kimu thei phadiak hi.

3. Pasian Gam ukna a kipat a kipanin leitung dinmun bang hangin hong sia mahmah a hiam?

Jesuh in Pasian Gam’ Kumpi a suahkhit a sawt loin, vantungah Satan le a dawite na do hi. Satan in guallelin: “A vantung mite tawh leitungah kilawnsuk hi,” ci-in Lai Siangtho in gen hi. (Maangmuhna 12:9, 10, 12) Suksiat thuak ding cih kithei ahih manin Satan heh mahmah a, leitungah lungkhamnate le haksatnate piangsak hi. Tua ahih manin leitung dinmun hizah takin hong sia hi! Pasian Gam in hih buainate hong siangsak ta ding hi.

ZON BEH INLA, MUH BEH IN

Kum 1914 a Pasian Gam ukna a kipatlam i theihtheih dan le tua in ei adinga khiatna a neih dan sittel in.

4. Lai Siangtho in kum 1914 ah Pasian Gam ukna kipan cih genkhol

VIDEO hong in.

VIDEO: Kum 1914 Kumin Pasian Gam Ukna Kipan (5:02)

Pasian in tanglai Babylon Kumpi Nebukhadnezzar pen mailam a a piang ding thute a mangah mansak hi. Tua mang le Daniel’ gen a khiatna pen Nebukhadnezzar’ ukna bek hi loin, Pasian ukna tawh zong kisai hi.—Daniel 4:17 sim in. a

Daniel 4:20-26 sim in. Tua khit teh lim en inla, a nuai-a dotnate dawng in:

(A) Nebukhadnezzar in a mangah bang mu a hiam?—A neu 20 le 21 en in.
(B) Singkung bang kicih ding a hiam?—A neu 23 en in.
(C) “Kum sagih” a bei ciangin bang hong tung ding a hiam?—A neu 26 en in.

Singkung Mang le Pasian Gam A Kizop Dan

GENKHOLHNA (Daniel 4:20-36)

Ukna

(A) Singkung golpi

Ukna bei

(B) “A singkung phuk” a, “kum sagih sung” beisak

Ukna kipankik

(C) “Kumpi na suakkik ding hi”

Genkholhna ii tangtunna masa . . .

(D) Singkung in kua etsakna hi a hiam?—A neu 22 en in.
(E) Ama ukna koi bangin bei a hiam?—Daniel 4:29-33 sim in.
(F) “Kum sagih” a bei ciangin Nebukhadnezzar tungah bang hong piang a hiam?—Daniel 4:34-36 sim in.

TANGTUNNA MASA

Ukna

(D) Babylon Kumpi Nebukhadnezzar

Ukna bei

(E) B.C.E. 606 khit ciangin Nebukhadnezzar hai-in kum sagih sung kumpi za kia

Ukna kipankik

(F) Nebukhadnezzar hong pil kikin kumpi semkik

Genkholhna ii tangtunna nihna . . .

(G) Singkung in kua etsakna hi a hiam?—1 Khang Tangthu 29:23 sim in.
(H) A ukna uh koi bangin bei a hiam? Jesuh leitungah a om sungin a ukna uh kipankik nai lo ahihlam koi bangin thei i hiam?—Luka 21:24 sim in.
(I) Bang hun le koi munah ukna hong kipankik a hiam?

TANGTUNNA NIHNA

Ukna

(G) Pasian tanga a uk Israel kumpite

Ukna bei

(H) Jerusalem khuapi kisusia-in, Israel kumpite’ ukna kum 2,520 sung bei

Ukna kipankik

(I) Jesuh in Pasian Gam kumpi hi-in vantungah uk kipan

Kum sagih pen bang tanvei sawt a hiam?

Lai Siangtho mun pawlkhat in a mun dangte hong telsak thei hi. Gentehna-in, Maangmuhna laibu in kum thum le a lang pen ni 1,260 tawh kikim cih gen hi. (Maangmuhna 12:6, 14) Kum sagih pen a zah nih hi a, ni 2,520 tawh kikim hi. Lai Siangtho in ni khat tanga kum khat zat hun zong om hi. (Ezekiel 4:6) Tua ahih manin Daniel laibu-a kum sagih pen kum 2,520 tawh kikim hi.

5. Kum 1914 a kipanin hih leitung kikhel

VIDEO hong in.

VIDEO: Kum 1914 A Kipanin Hih Leitung Kikhel (1:10)

Jesuh in Kumpi a sep khit ciangin leitung dinmun kikhel dan ding genkhol hi. Luka 21:9-11 sim in. Tua khit teh hih dotna kikum un:

Hih Lai Siangtho mun a a kigen bang dinmunte mu-in, za ngei na hiam?

Sawltak Paul in nitawp ni huna a kimu ding mihingte’ lungsim puakzia dingte na gen hi. Timoti Nihna 3:1-5 sim in. Tua khit teh hih dotna kikum un:

Hih lungsim puakziate lak panin bangteng mu khinta na hiam?

6. Pasian Gam in ukta cih na uplam lak in

Matthai 24:3, 14 sim in. Tua khit teh hih dotnate kikum un:

Pasian Gam in ukta ahihlam bang a thupi nasep in lak a hiam?
Hih nasepah koi bangin kihel thei na hiam?

Pasian Gam in ukta a, a sawt lo-in leitung zong uk ta ding hi. Hebru 10:24, 25 sim in. Tua khit teh hih dotna kikum un:

“Topa’ hong pai ding Ni hong naina thu thei ihih manin” bang i sep ding kilawm a hiam?

Midangte hamphatna a pia thei le a honkhia thei thute thei lecin, bang hih ding na hiam?

MI PAWLKHATTE’ DOTNA: “Jehovah Tecite in kum 1914 pen bang hangin thupi ngaihsut uh a hia?”

Nangh bangci dawn ding?

TOMLAKNA

Lai Siangtho genkholhna le leitung dinmunte in Pasian Gam in ukta cih hong theisak hi. Tua pen um ihihlam taangkona le kikhopnate-ah i kihelna tawh i lak hi.