SIN DING THU 34

Jehovah I Itlam I Lah Theih Dan

Hong

Lai Siangtho na sincil lam sangin Pasian tawh kinaizawin na kithei hiam? Pasian tawh na kilawmtatna a kipsuak ding na ut hiam? Jehovah na it semsem leh amah in zong nang hong it semsemin hong don semsem ding hi, cih phawk in. Tua hileh, Jehovah na itlam koi bangin lak thei ding na hiam?

1. Jehovah i itlam koi bangin lak thei i hiam?

Jehovah’ thu i manna tawh amah i itlam i lak thei hi. (1 Johan 5:3 sim in.) Ama thu mang dingin zawhthawhna tawh hong sawl teitei lo hi. Tua sangin, thu man ding le man loh ding pen ei khat ciat tungah teeltheihna hunpha hong pia hi. Bang hang hiam? Jehovah in ama thu “lungsim takpi tawh mang” dingin hong deih ahih man hi. (Rom 6:17) A dang khatin gen leng, tavuan khat dana ngaihsutna bek tawh hi lo-in, amah na it mana a thu na man ding deih hi. Jehovah deihna banga semin a deih lohte pelhna tawh amah i itlam i lah theih nadingin hih laibu ii Khen 3-na le 4-na in hong huh ding hi.

2. Jehovah i itlam i lah ding bang hang haksa thei a hiam?

‘Thuman mi’ thuakna tam mahmah’ hi. (Late 34:19) I vekpi-in ei mahmah ii kicin lohnate a do ihi hi. Sumlepai haksatna, thuman lohna, le adang haksatnate zong i tuak thei hi. Tua banga haksatna i tuak hun ciangin Jehovah hong gen banga sep ding pen haksa thei ding hi. Bang hang hiam cih leh a man lo lampi zuih ding baihzaw ahih man hi. Ahih hangin Jehovah’ thu citak takin mang lecin, na khempeuh sangin amah na itlam le ama tungah na cihtaklam a lak na hi hi. Tua hileh ama’n zong nang’ tungah hong citak ding hi. Ama’n cikmahin hong nusia ngei lo ding hi.—Late 4:3 sim in.

ZON BEH INLA, MUH BEH IN

Thu na manna in Jehovah adingin thupi ahihlam le ama tungah na cihtaksuak nadinga hong huh thei ding thute sittel in.

3. Na kihelna thubuai khat

Job Lai Siangtho bu in a gen bangin, Satan in Job bek a ngawh hi lo-in Jehovah a bia nuam mi khempeuhte zong a ngawh ahi hi. Job 1:1, 6–2:10 sim in. Tua khit teh hih dotnate kikum un:

Satan’ gen bang hi leh, Job in Jehovah thu a manna a hang bang a hiam?—Job 1:9-11 en in.
Nang a kipan, mi khempeuh tawh kisai-in Satan in bang gen a hiam?—Job 2:4 en in.

Job 27:5b sim in. Tua khit teh hih dotna kikum un:

Job in Jehovah it takpi ahihlam koici lak a hiam?

Job in cihtakna tawh Jehovah a itlam lak

En zong cihtakna tawh Jehovah i itlam i lak hi

4. Jehovah lungdamsak in

Paunak 27:11 sim in. Tua khit teh hih dotnate kikum un:

Pilvang taka ama thu na man leh Jehovah’ lungsim bangci om ding a hiam? Bang hang hiam?

5. Jehovah tungah i citak thei hi

Jehovah i itna in ama thu hong genkhiasak nuam hi. Ama tungah citak ihih manin haksatna kawmkalah zong i gen veve hi. VIDEO hong in. Tua khit teh a nuai-a dotnate kikum un.

VIDEO: Langpanna Kawmkalah Na Upna Kembit In (5:09)

Jehovah’ thu midangte kiangah gen ding haksa na sa ngei hiam?
Hih video-ah, launa lungsim nawkzo dingin Grayson pen bang in na huh a hiam?

Ama itte it a, ama muhdahte i muhdah ciangin Jehovah tungah cihtak ding hong baihzaw hi. Late 97:10 sim in. Tua khit teh hih dotnate kikum un:

Na thu sinsate bulphuhin, Jehovah in bangteng it a, bangteng mudah a hiam?
A hoih nate it a, a hoih lote mudah dingin bang in hong huh thei a hiam?

6. Jehovah’ thu mang leng hamphatna kingah ding

Jehovah’ thu mang leng hamphatna om den hi. Isaiah 48:17, 18 sim in. Tua khit teh hih dotnate kikum un:

Eite adinga a hoihpen Jehovah in thei den hi cih na muang hiam? Bang hang hiam?
Lai Siangtho le Pasian man ahi, Jehovah’ thu sin na hih manin bang hamphatna ngah khinta na hiam?

MI PAWLKHATTE’ GEN: “Ka ut bangin ka gamta zongin Pasian ading thupi kei.”