SIN DING THU 36
A Tawntungin Thuman In
A thuman mi pen mi khempeuh in lawm dingin deih uh hi. Jehovah in zong ama lawmte pen thuman dingin deih hi. Thuman lo mite tawh a kidim leitungah thuman ding cih pen baih lo hi. Ahih hangin a tawntungin thuman leng, bang hamphatna ngah ding i hiam?
1. Thuman ding a thupina a hang lianpen in bang a hiam?
Midangte tunga i thumanna in Jehovah i itlam le amah i zahtaklam lak hi. Jehovah in i ngaihsut khempeuh le i sep khempeuh thei hi. (Hebru 4:13) Thuman ding i hanciam pen zong thei a, manpha hong sa hi. “Jehovah in a sia-in a gamtate mudah a, thuman mite bek a pawlpih dingin a la hi,” ci-in Lai Siangtho in gen hi.—Paunak 3:32.
2. Nisim nuntakna-ah i thuman theih dan pawlkhat in bang a hiam?
“Khatlekhat tungah thuman thutak kam kipau” dingin Jehovah in hong deih hi. (Zekhariah 8:16, 17) Tua thu in bang a cihnopna hiam? Innkuanpih, naseppih, unaupihte, ahih kei leh kumpi thuneite tawh i kiho ciangin zuauthu i gen kei a, mi theih khialh dingin thute zong i gen kei hi. Thuman mi in mi’ na gu lo, mi khem lo hi. (Paunak 24:28 le Efesa 4:28 sim in.) Amau in phiangsiah zong man takin pia uh hi. (Rom 13:5-7) ‘A tawntungin na a manin sem’ uh hi.—Hebru 13:18.
3. Thumanna hanga a kingah hamphatnate in bang a hiam?
Thuman hi, cih min hoih ngah ihih manin midangte in hong muang uh hi. Thumanna in pawlpi sunga mi khempeuh pen a ki-it innkuan khat bangin hong omsak a, lungmuanna hong neisak hi. Lungsim kitheihna siangtho zong hong neisak hi. Tua banah i thumanna in, ‘hong Hon Pasian’ thu a hoihna kilangsak a,’ tua in midangte zong Jehovah biaknopna lungsim neisak thei hi.—Titus 2:10.
ZON BEH INLA, MUH BEH IN
Thumanna in Jehovah tawh na kizopna-ah hamphatna a hong ngahsak dan le nuntakna’ dinmun tuamtuamte-ah na thuman theih dan kan in.
4. Jehovah in thumanna deih
Late 44:21 le Malakhi 3:16 sim in. Tua khit teh hih dotnate kikum un:
-
Jehovah’ theih loh dingin thu kiseelcip thei hi, ci-in bang hangin ngaihsut ding hi lo a hiam?
-
A baih loh hun ciangin zong thuman gen leng, Jehovah’ lungsim bangci om dingin ngaihsun na hiam?
Naupangte in thuman a gen uh ciang nu le pate lungdam hi. Eite in thuman i gen ciang Jehovah lungdam hi
5. A tawntungin a manin gamta in
A tawntunga thuman ding pen hi thei lo hi, ci-in mi tampite in ngaihsun uh hi. A tawntunga thuman ding a kisapna a hang na theih nadingin VIDEO hong in.
Hebru 13:18 sim in. Tua khit teh a nuai-a dinmunte-ah thumanna i lah theih dan kikum ni.
-
Innkuan sungah.
-
Nasepna le sanginnah.
-
Adang dinmunte-ah.
6. Thumanna in hamphatna hong ngahsak
Thumanna hangin haksatna kituak thei hi. Ahih hangin thumanna pen a hoihpen nuntakna lampi ahi hi. Late 34:12-16 sim in. Tua khit teh hih dotna kikum un:
-
Thumanna in nuntakna-ah hamphatna koi bangin hong ngahsak a hiam?
-
A thuman nupate a innkuan uh nuam
-
A thuman nasem mi pen a pute in muang uh
-
A thuman gammi in kumpi uliante’ mai-ah minpha ngah uh
MI PAWLKHATTE’ GEN: “Zuauthu tawmcik gen pen phamawh kei ee.”
-
Zuauthu khempeuh Jehovah in mudah hi, ci-in bang hangin um na hiam?
TOMLAKNA
Jehovah in a lawmte pen kampau le gamtatna khempeuhah a thuman ding uh deih hi.
Kikupkikna
-
Thuman theih dan pawlkhat in bang a hiam?
-
Jehovah’ theih loh dingin thu kiseelcip thei hi, ci-in bang hangin ngaihsut ding hi lo a hiam?
-
Hun khempeuhah bang hangin thuman nuam na hiam?
THEIH BEH NADING
Tate in thuman a sep nadingun nu le pate in koi bangin hilh thei ding a hiam?
I kamciam banga sepna in bang hamphatna omsak a hiam?
Phiangsiahte a man lo-a zang uh ahih leh zong, bang hangin i piak ding kisam a hiam?
“Phiangsiah Piak Ding A Kisam Hiam?” (Vilnatausang, September 1, 2011)
Mikhem pa khat pen bang hangin thuman mi hong suak a hiam?
