SIN DING THU 38
Nuntakna Letsong Na San Manin Lungdam In
Nuntakna i neih manin na hoih tampi i sem thei a, tua pan lungnopna i ngah thei hi. Haksatnate i tuak zongin nuntakna-ah lungnop nading thute om veve hi. Nuntakna letsong i san manin i lungdamna koici lak thei ding i hiam? Lungdamna i lahna a hang thupipen in bang a hiam?
1. Nuntakna i neih manin bang hang i lungdam ding kisam a hiam?
Nuntakna pen hong it i Pa, Jehovah kiang pana i ngah letsong ahih manin i lungdam ding kisam hi. Amah in “nuntakna tuinak” hi a, nuntakna khempeuh ama piansak ahi hi. (Late 36:9) ‘Amah in mi khempeuh tungah nuntakna le naksuk naktoh a kipan na khempeuh a piapa ahi hi.’ (Sawltak 17:25, 28, ZSV) Jehovah in i nuntak suak theih nadingin a kisam nate hong pia hi. Tua tham lo-in, nuntakna nuam i neih theih nadingin zong hong vaihawmsak hi.—Sawltak 14:17 sim in.
2. Jehovah’ hong piak nuntakna letsong hanga i lungdamna koici lak thei ding i hiam?
Nu’ gil sunga na om lai a kipanin Jehovah in nang hong don hi. Jehovah tunga a citak David in: “A kibawlkim nai lo ka pumpi na mit in a mu hi,” ci-in thu na ngen hi. (Late 139:16) Jehovah in na nuntakna pen manpha sa mahmah hi. (Matthai 10:29-31 sim in.) Mi thahna tham lo-in, ei le ei kithahna nangawn in Pasian’ lungsim nakpi takin nasak ding hi. a (Paikhiatna 20:13) A kisam lopi-a i nuntakna ading a lauhuai thei kimawlna, ahih kei leh midangte’ nuntakna adinga a lauhuai thei nasepna in zong Jehovah’ lungsim nasak ding hi. Ei ii nuntakna le midangte’ nuntakna thupi ngaihsutin nuntakna letsong hanga i lungdamna i lakkhia hi.
ZON BEH INLA, MUH BEH IN
Nuntakna letsong i san mana lungdamna i lah theih dan thu pawlkhat ngaihsun in.
3. Na cidamna kem in
A ki-ap khin Khristiante in Jehovah na sep nadingin a nuntakna khempeuh pia uh hi. Tua in amau pumpi pen Pasian adingin biakpiakna bangin pia uh cihna hi. Rom 12:1, 2 sim in. Tua khit teh hih dotnate kikum un:
-
Na cidamna na kepna a hang pen bang ahih ding kilawm a hiam?
-
Na cidamna na kep theih dan pawlkhat in bangteng a hiam?
4. Nang le midangte’ nuntakna siatna a tun loh nading thupi ngaihsut in
Nuntakna a lauhuaisak thei sepnate pelh dingin Lai Siangtho in hong hanthawn hi. Siatna i tuah loh nadinga i sep theihte i theih nadingin VIDEO hong in.
Paunak 22:3 sim in. Tua khit teh a nuai-a dinmunte-ah siatna i tuah loh nadingin sep theih dan kikum un.
-
Inn ah.
-
Nasepna-ah.
-
Kimawlnate-ah.
-
Mawtaw, ahih kei leh saikel i hawl ciang le i tuan ciang.
5. A suak nai lo naungek’ nuntakna bawlsia ken
Nuntakna le nu’ gil sunga naungek ii a khankhiat dan pen Jehovah in lunglut ahihlam David in lakam tawh na phuak hi. Late 139:13-17 sim in. Tua khit teh hih dotna kikum un:
-
Jehovah’ muhna-ah mi khat ii nuntakna pen nu’ gil sunga a om lai-in kipan a hiam, ahih kei leh a suah ciangin kipan a hiam?
Tanglai Israel-te kianga a piak Jehovah’ thukham in nute le nu’ gil sunga nau pen kemcing hi. Paikhiatna 21:22, 23 sim in. Tua khit teh hih dotnate kikum un:
-
Mi khat in a suak nai lo naungek khat ngim lohpi-a a sihsak khak ciang Jehovah in bangci muh a hiam?
-
Mi khat in ngimna tawh sisak leh, Jehovah’ lungsim bangci om ding a hiam? b
-
Jehovah’ muh dan na theih ciangin na lungsim bangci om a hiam?
Nuntakna manpha a sa numei in zong nau bawlsiat loh ngal teel ding dang om nawn lo hi cih ngaihsutna nei khathei hi. Isaiah 41:10 sim in. Tua khit teh hih dotnate kikum un:
-
Numei khat in nau bawlsia dinga hanthotna a thuak ciangin kua kiangah huhna a nget ding kilawm a hiam? Bang hang hiam?
MI PAWLKHATTE’ GEN: “Nau bawlsiat loh phamawh dinmun zong om thei hi.”
-
A nu le nu’ gil sunga nau ii nuntakna pen Jehovah in manpha a saklam bang in hong muangsak a hiam?
TOMLAKNA
Nuntakna pen Jehovah’ piak letsong ahi hi. I nuntakna le midangte’ nuntakna pen i it ding, i zahtak ding le kemcing dingin Lai Siangtho in hong hilh hi.
Kikupkikna
-
Mihing nuntakna pen Jehovah ading bang hangin manpha a hiam?
-
Ngimna tawh mi thahna pen Jehovah in bangci muh a hiam?
-
Nuntakna letsong na san manin bang hang lungdam ding na hiam?
THEIH BEH NADING
Nuntakna letsong hong pia Jehovah tungah lungdamna koici lak thei i hiam?
Nau a bawlsia ngei numei khat pen Jehovah in a maisak hiam?
“Nau Bawlsiatna Tawh Kisai Lai Siangtho In Bang Gen A Hiam?” (Website-a thu)
Gualnop nadinga kimawlnate i teel ciangin nuntakna tawh kisai Pasian’ muh dan pen bang hangin i ngaihsut ding kisam a hiam?
“‘A Lauhuai Kimawlnate’—A Kimawlhuai Hiam?” (Khanghlo In!, October 8, 2000)
Mi khat in amah le amah kithah nopna lungsim a neih ciangin Lai Siangtho in koi bangin huh thei a hiam?.
a Jehovah in lungsim kitamzante don mahmah hi. (Late 34:18) Amau le amau a kithat nuam zah donga lungsim kitamzante thei siamin, huh nuam hi. Pasian’ huhna in ei le ei kithah nopna lungsim hong dozosak ahihlam hih sin ding thu sunga Theih Beh Nading nuai-a “Ei le Ei Kithahnopna Lungsim I Neih Ciangin Lai Siangtho In A Hong Huh Thei Ding Hiam?” cih thulu sim in.
b Nau a bawlsia ngeite zong Jehovah in maisak thei ahih manin amau le amau kimawhsiat luat ding kisam lo hi. Na theih beh nadingin hih sin ding thu sunga Theih Beh Nading nuai-a “Nau Bawlsiatna Tawh Kisai Lai Siangtho In Bang Gen A Hiam?” cih thulu sim in.
