Itna nei nupi khat in a ta sangkah dinga a kithawisak bangin ngaihsun in. A ta pen kisilsakin puan a siangtho sitset a silhsak hi. Tua-in naupang cidamsak a, amah a don nu le pa a neihlam zong kilangsak hi. Tua mah bangin hong it i Pa, Jehovah in zong i pumpi le i gamtatna a siangtho ding deih hi. I sianthona in phattuamna hong ngahsak banah Pasian zong pahtawi hi.

1. I pumpi koi bangin siangthosak thei ding i hiam?

Jehovah in: “Note zong na siangtho un,” ci-in hong gen hi. (1 Peter 1:16) Siangtho taka i om theih nadingin pumpi lam le gamtatna lamah i siangtho ding kisam hi. I pumpi a siantho nadingin manmanin i kisil kul hi. I puante, inn, le tuan theih mawtaw le mawtaw-saikelte pen siangtho taka i koih ding kisam hi. Biakinn a siantho nadingin zong i huh thei hi. Pumpi lama i sianthona in Jehovah pahtawi hi.​—2 Korin 6:3, 4.

2. A siangtho lo bang gamtatnate pelh ding i hiam?

‘Pumpi le lungsim a ninsak theite khempeuh pana kisiansuah’ dingin Lai Siangtho in hong hanthawn hi. (2 Korin 7:1) Tua ahih manin pumpi le lungsim a ninsak thei khempeuh i pelh ding kisam hi. A siangtho lo ngaihsutnate ahi thei zahin i pelh ding zong kisam hi. Tua hileh bek i ngaihsutnate pen Jehovah’ deihna tawh kituak thei ding hi. (Late 104:34) Kampau hoih lote zong i pelh ding kisam hi.​—Kolose 3:8 sim in.

Adang bangte in pumpi lam le gamtatna lamah hong ninsak thei a hiam? Tuibuk muam, za tep, kunza hai, khaini muam banah, gualnop nadinga guihtheih khamtheih zatui zahate zatna in pumpi ninsak hi. Tuate i pelhna in hong cidamsak banah nuntakna letsong pen i thupi ngaihsutlam lak hi. Gamtatna siangtho lo ahi, khat kia-a zahmawh khoiha nopsakna bawlna le nulepa lunggulhna a piangsak lim le laibute pelhin, gamtatna lamah siangtho dingin i hanciam hi. (Late 119:37; Efesa 5:5) Tua bang gamtatnate kikhel ding a haksat hang, Jehovah in hong huh ding hi.​—Isaiah 41:13 sim in.

 ZON BEH INLA, MUH BEH IN

3. Pumpi lama sianthona in Pasian pahtawi

Sianthona tungtanga Jehovah muh dan pen tanglai Israel-te tunga a piak thukhamte panin kithei thei hi. Paikhiatna 19:10 le 30:17-19 sim in. Tua khit teh hih dotnate kikum un:

• Hih Lai Siangtho munte-a a gen mah bangin, pumpi lama sianthona pen Jehovah in bangci muh a hiam?

• Pumpi lam siantho nadingin bangteng sem thei na hiam?

Pumpi lam siantho nadingin hun le thatang piakkhiat kul hi. Koi munah i om zongin, a zawng ihi a, a hau ihi zongin siangtho takin i om thei hi. VIDEO hong in. Tua khit teh a nuai-a dotna kikum un.

• I van neihte siangtho taka i koihna in taangko nasepna pen koi bangin vang neisak a hiam?

4. Gamtat hoih lote nusia in

Za ahih kei leh gualnop nadinga guihtheih khamtheih zatui zahate na zat leh tua bang gamtat hoih lote nusiat ding a haksatlam thei ding hi teh. Bang in hong huh thei ding a hiam? Tua bang gamtat hoih lote in nang a hong sukkhak dan ngaihsun in. Matthai 22:37-39 sim in. Tua khit teh hih thute kikum un. Za tepna ahih kei leh gualnop nadinga guihtheih khamtheih zatui zahate zatna in . . .

• Jehovah tawh kilawmtatna pen koi bangin kisiasak a hiam?

• innkuan le midangte tungah koi bangin sukhasak a hiam?

Gamtat hoih lote nusia dingin geel in. a VIDEO hong in.

Filippi 4:13 sim in. Tua khit teh hih dotna kikum un:

• Manmana thungetna, Lai Siangtho sinna le kikhopnate in gamtat hoih lo a nusiat theih nadingin mi khat koi bangin tha pia thei a hiam?

 5. A siangtho lo ngaihsutnate le gamtatnate kikhel in

Kolose 3:5 sim in. Tua khit teh hih dotnate kikum un:

• Nulepa lunggulhna a piangsak lim le laibute etna, tua bang lim le laite, le video-te phone tawh kikhakna, le khat kia-a zahmawh khoiha nopsakna bawlna cihte pen Jehovah muhna-ah siangtho lo ahihlam koici thei i hiam?

• Gamtat siangtho dingin Jehovah in hong kalh pen kilawm na sa hiam? Bang hang hiam?

A siangtho lo ngaihsutnate hepkhiat theih dan zong in. VIDEO hong in.

Jesuh in i gamtat a siantho nadingin hangsan taka i sepkhiat ding a kisaplam gentehna pia-in hong hilh hi. Matthai 5:29, 30 sim in. Tua khit teh hih dotna kikum un:

• Jesuh in i pumpi a taktaka liamsak dinga hong genna hi lo-in, hangsan taka i sepkhiat ding a kisaplam hong genna hizaw hi. Mi khat in a siangtho lo ngaihsutnate a pelh nadingin hangsan takin bang a hih ding kisam a hiam? b

A siangtho lo ngaihsutnate paihkhiat ding na hanciamna pen Jehovah in manphasa hi. Late 103:13, 14 sim in. Tua khit teh hih dotna kikum un:

• Gamtat hoih lo paaikhia dingin hanciam na hih leh hih Lai Siangtho mun in koi bangin tha hong neisak thei a hiam?

 TOMLAKNA

I pumpi, i lungsim le i gamtatna-ah siangtho den leng, Jehovah’ maipha i ngah ding hi.

Kikupkikna

• Siangtho den ding pen bang hangin thupi a hiam?

• Pumpi lamah koi bangin siangtho thei ding na hiam?

• Na ngaihsutna le na gamtatna a siantho den nadingin bang sem ding na hiam?