SIN DING THU 41
Nulepa Vai Tawh Kisai Lai Siangtho In Bang Gen A Hiam?
Mi a tamzawte in nulepa vai pen gen nuam lo uh hi. Ahih hangin Lai Siangtho in nulepa vai a gen ciangin kician tak le thupi ngaihsut takin na gen hi. Lai Siangtho’ gente pen i hamphatpih thei hi. Tua pen ahi ding mah hi. Jehovah in hong Piangsak Pa ahih manin ei adinga a hoihpen thei hi. Tua tham lo-in, amah i lungkimsak nadinga i sep theihte le nuntak nuam i neih den nadinga hong panpih theite zong hong gen hi.
1. Nulepa vai tawh kisai Jehovah’ muh dan bang a hiam?
Nulepa lupkhopna pen a kitengkhinsa nupate tunga Jehovah’ piak letsong ahi hi. Tua letsong in ta neih theih nading bek hi lo-in, khatlekhat a ki-it a kingaihlam uh nuam takin lakkhiasak thei hi. Lai Siangtho in: “Na tenpih numei tawh lungdam in,” ci-in gen hi. (Paunak 5:18, 19) A kitengsa Khristian nupate in cihtakna kilak tuak a, angkawm lo dingin Jehovah in deih hi.—Hebru 13:4 sim in.
2. Nulepa vai-a paktatna cih in bang a hiam?
“Numei pasal paktatte . . . Pasian gam a luah kei ding hi,” ci-in Lai Siangtho in gen hi. (1 Korin 6:9, 10, ZIV) Greek kama Lai Siangtho a atte in nulepa vai-a paktatna adingin por·neiʹa cih kammal na zang uh hi. Hih kammalah (1) kiteng lo-a nulepa mawhna bawlna, a (2) pasal le pasal, numei le numei lupkhopna, le (3) ganhing tawh mawhna cihte kihel hi. ‘Numei pasal paktatna i pelh’ ciangin Jehovah i lungkimsak a, ei mahmah in zong hamphatna i ngah hi.—1 Thesalonika 4:3, ZIV.
ZON BEH INLA, MUH BEH IN
Nulepa vai-a paktatna na pelh theih dan le gamtat sianthona pan hamphatna na ngah theih dante kan in.
3. Nulepa mawhna na taisan un
A citak Josef in a gamtat a siantho nadingin na hanciam hi. Piancilna 39:1-12 sim in. Tua khit teh hih dotnate kikum un:
-
Josef in bang hangin na taisan a hiam?—A neu 9 en in.
-
Josef’ thu khensatna man na sa hiam? Bang hang hiam?
Khangnote in Josef ettehin nulepa mawhna pen koi bangin taisan thei ding a hiam? VIDEO hong in.
Jehovah in i vekpi-in nulepa mawhna taisan dingin hong deih hi. Korin Masa 6:18 sim in. Tua khit teh hih dotnate kikum un:
-
Koi bang dinmunte hangin nulepa mawhna kibawl khathei a hiam?
-
Nulepa mawhna pen koi bangin taisan thei na hiam?
4. Zolna na do zo thei hi
Nulepa mawhna bawl dinga hong kizol ciangin nial ding pen bang in haksasak thei a hiam? VIDEO hong in. Tua khit teh a nuai-a dotna kikum un.
-
Hih video-a unaupa in a ngaihsutna le a gamtatnate in a zi’ tungah cihtak lohna piangsak thei ahihlam a phawk ciangin bang hih a hiam?
A citak Khristiante nangawn in zong ngaihsutna siangtho neih ding haksa sak hun nei uh hi. Nulepa mawhna thu ngaihsun den lo dingin koici pelh thei na hiam? Filippi 4:8 sim in. Tua khit teh hih dotnate kikum un:
-
Bang thu i ngaihsut ding kisam a hiam?
-
Lai Siangtho simna le Jehovah’ na sepna-ah tampi kihelna in zolna do zo dingin koi bangin hong huh thei a hiam?
5. Jehovah’ tehnate in hamphatna hong pia
Jehovah in eite adinga a hoihpen thei hi. I gamtat a siantho theih dan le gamtatna siangtho i hamphatpih theih dan hong hilh hi. Paunak 7:7-27 sim in. Ahih kei leh VIDEO hong in. Tua khit teh a nuai-a dotnate kikum un.
-
Hih khangnopa pen zolna a piangsak dinmun sungah koi bangin tung a hiam?—Paunak 7:8, 9 sim in.
-
Paunak 7:23, 26 ah a gen mah bangin, nulepa mawhna in siatnate piangsak thei hi. Gamtat siangtho den leng, bang buainate pelh thei ding i hiam?
-
Gamtat sianthona in nuntak nuam i neih den nadingin koi bangin hong huh thei a hiam?
Mi pawlkhat in pasal le pasal, numei le numei paktatna tawh kisai Lai Siangtho’ thukham pen itna neih loh vai hi, ci-in ngaihsun uh hi. Ahih hangin itna Pasian Jehovah in mi khempeuhte’n nuntak nuam nei den dingin deihsak hi. Tua banga i nuntak theih nadingin Pasian’ tehna banga i om kul hi. Korin Masa 6:9-11 sim in. Tua khit teh hih dotna kikum un:
-
Pasal le pasal, numei le numei paktatna pen Pasian’ muhna-ah a kilawm lo cih ciang bek ahi hiam?
Pasian’ maipha i ngah theih nadingin i vekpi-in i kikhel kul hi. Hanciam thaman a om hiam? Late 19:8, 11 sim in. Tua khit teh hih dotnate kikum un:
-
Gamtatna tawh kisai Jehovah’ tehnate pen kilawm kituak na sa hiam? Bang hang hiam?
Jehovah in gamtatna tawh kisai-a ama tehnate zui dingin mi tampi huh hi. Nang zong hong huh ding hi
MI PAWLKHATTE’ GEN: “A ki-it nak uh leh lupkhop pen khial kei.”
-
Nangh bangci ngaihsut na hiam?
TOMLAKNA
Nulepa lupkhopna pen a kitengkhinsa nupate tunga Jehovah’ piak letsong ahi hi.
Kikupkikna
-
Nulepa vai-a paktatna-ah bangteng kihel a hiam?
-
Nulepa mawhna i pelh theih nadingin bang in hong huh ding a hiam?
-
Gamtatna tawh kisai Jehovah’ tehnate i zuih ciang, koi bang hamphatna kingah a hiam?
THEIH BEH NADING
Pasian in nupate pen bang hangin kitenna bawlsak nuam a hiam, cih thu kan in.
“Kiteng Lo-a Omkhopna Tawh Kisai-in Lai Siangtho In Bang Gen A Hiam?” (Website-a thu)
Lai Siangtho in pasal le pasal, numei le numei paktatna a khamna pen tua bang mite mudah dinga hanthotna ahih leh hih loh ngaihsun in.
“Pasal le Pasal, Numei le Numei Lupkhopna Pen A Khial Hiam?” (Website-a thu)
Nulepa lupkhopna tawh kisai-a Pasian’ thukhamte in eite hong kemcing ahihna thu kan in.
“Kam Tawh Paktatna Pen Koi Banga I Muh Ding Kisam A Hiam?” (Website-a thu)
“Amaute In Kei Hong Zahtak Bawl Uh,” cih tuahkhakna-ah pasal le pasal mawhna a bawlpa khat a kikhelna a hang sim in.
“Lai Siangtho In Nuntakna Kikhelsak” (Vilnatausang, April 1, 2011)
a Tuate sungah nulepa lupkhopna, taw le kam zanga paktatna, le midang khat ii zahmawh pen lunggulhna lungsim tawh khoihsakna cihte kihel hi.
