SIN DING THU 42
Zileta Neih leh Neih Loh Tawh Kisai Lai Siangtho In Bang Gen A Hiam?
Ngeina pawlkhatah, zileta a neite bek lungnuam dingin kingaihsun hi. Ahih hangin zileta a nei khempeuh lungnuam tuan lo-in, a nei lo khempeuh zong dah tuan lo uh hi. Zileta neihna le neih lohna a nihin letsong bangin Lai Siangtho in gen hi.
1. Zileta neih lo-a om a hamphatna in bang a hiam?
“Tua ahih manin a neite zong hoih a, a nei loin a kikem zote hoihzaw lai hi,” ci-in Lai Siangtho in gen hi. (1 Korin 7:32, 33, 38 sim in.) Zileta a nei lote pen koi bangin “hoihzaw” a hiam? Zileta a nei lo Khristiante in hun awl tam nei zaw uh hi. Gentehna-in, zileta nei lo pawlkhat in Pasian nasepna-ah hun tam pia theizaw uh a, gam dangah pai-in lungdamna thu taangko thei uh hi. A thupipen in Jehovah tawh kinai nadingin hun tampi pia theizaw uh hi.
2. Upadi tawh kituaka kiten a hamphatna in bang a hiam?
Zileta neih lohna mah bangin, zileta neihna-ah zong hamphatna om hi. “Mi khat sangin mi nih hoihzaw hi,” ci-in Lai Siangtho in gen hi. (Thuhilhna 4:9) Lai Siangtho thubulte a zui Khristian nupate adingin hih thu man mahmah hi. Upadi tawh kituaka a kiteng nupate in khatlekhat ki-it a, kizahtak dingin kamciam kipia uh hi. Tua ahih manin kiteng lo-a a omkhawm nupate sangin lungmuanna neizaw uh a, a tate in zong lungmuanna neizaw uh hi.
3. Kitenna pen Jehovah in koici muh a hiam?
Jehovah in kitenna masapen a bawl lai-in: ‘Pasal in a nu le a pa nusia-in a zi tawh kigawm ding hi,’ ci-in gen hi. (Piancilna 2:24) Zi le pasal a ki-it ding uh le khantawna a kiten ding uh Jehovah in deih hi. Angkawmna hang bek tawh nupa a kikhen uh phal hi. Tua bang hun ciangin Jehovah in mawhna a nei lo a zi ahih kei leh a pasal tungah nupa kikhen nadingin thu khensat theihna pia hi. a (Matthai 19:9) Khristiante in zi a neihthuah, pasal a neihthuah ding uh pen Jehovah in phal lo hi.—1 Timoti 3:2.
ZON BEH INLA, MUH BEH IN
Zileta na nei a, na nei kei zongin na lungdam theih dan le Jehovah na lungdamsak theih dan thu kan in.
4. Zileta neih lohna letsong pen hoih takin zang in
Jesuh in zileta neih loh pen letsong khatin ngaihsun hi. (Matthai 19:11, 12) Matthai 4:23 sim in. Tua khit teh hih dotna kikum un:
-
Jesuh in zileta nei lo-a omna pen a Pa’ nasep nading le midangte huh nadingin bangci zat a hiam?
Khristiante in Jesuh mah bangin zileta nei lo-a omna pen nuam takin zang thei uh hi. VIDEO hong in. Tua khit teh a nuai-a dotnate kikum un.
-
Zileta nei lo-a omna pen Khristiante in koi bangin hamphatna ngah nadingin zang thei uh a hiam?
A lungluthuai thu
Zileta neih theih ding hun Lai Siangtho in ciangtan lo hi. Ahih hangin, ‘khangdawn hun a kheng khit’ ahih kei leh nulepa lunggulhna a nasiat hun a kheng khit ciang dong ngak dingin hong hanthawn hi. Nulepa lunggulhna a nasiat hun ahi, khangno lai-in thu kikhensat khial thei ahih man hi.—1 Korin 7:36, NWT.
5. Na zi ding, na pasal ding pilvang takin teel in
Zi ding, pasal ding teel pen nuntak sunga a thupipen thu khensatna ahi hi. Matthai 19:4-6, 9 sim in. Tua khit teh hih dotna kikum un:
-
Khristian khat in bang hangin limtaka ngaihsun masa lo-a zi neih, pasal neih ding hi lo a hiam?
Zi hoih, pasal hoihte’ neih ding pianziate Lai Siangtho in gen hi. A thupipen in Jehovah a it mi i teel ding kisam hi. b 1 Korin 7:39 le 2 Korin 6:14 sim in. Tua khit teh hih dotnate kikum un:
-
Khristian unaute bek bang hangin tenpih ding ihi hiam?
-
Jehovah a it lo mi tawh kiteng lecin Ama lungsim bangci om dingin um na hiam?
A nam kibang lo gan nih pen kol puakhawmsak leng haksatna om ding hi. Tua mah bangin thu um lo mite tawh kitenna in buaina tampi omsak ding hi
6. Kipi Kitenna pen Jehovah muh dan bangin mu in
Tanglai Israel pasal pawlkhat in amau angsung a khual manun a zite ma uh hi. Malakhi 2:13, 14, 16 sim in. Tua khit teh hih dotna kikum un:
-
Lai Siangtho tawh a kituak lo kimakna pen Jehovah in bang hangin mudah a hiam?
Angkawmna le kikhenna in mawhna nei lo zaw le a tate nakpi takin haksatna thuaksak hi
VIDEO hong in. Tua khit teh a nuai-a dotna kikum un.
-
Thu um lo mi tawh a kiteng na hih leh na innkuan a nop nadingin bang hih thei na hiam?
7. Kipi kitenna tawh kisai Jehovah’ tehnate zui in
Kipi kitenna tawh kisai Jehovah’ tehnate zuih nadingin hanciamna kisam hi. c Ahih hangin hih banga a hanciam mite in Jehovah thupha sang uh hi. VIDEO hong in.
Hebru 13:4 sim in. Tua khit teh hih dotnate kikum un:
-
Kipi kitenna tawh kisai Jehovah’ tehnate pen sanhuai na sa hiam? Bang hang hiam?
Jehovah in Khristiante a kiten uh ciang le a kikhen uh ciangin upadi tawh kituaka bawl (register) dingin deih hi. Gam a tamzaw a kumpi thuneite in zong tua bang mahin na kalh uh hi. Titus 3:1 sim in. Tua khit teh hih dotna kikum un:
-
Zi nei, pasal nei na hih leh na kitenna uh pen upadi tawh a kituak kitenna ahi hiam?
MI PAWLKHATTE’ DOTNA: “Bang hang kiten kul a hia? Kiteng lo-in ki-omkhawm thei lo maw?”
-
Nangh bangci dawng ding?
TOMLAKNA
Zileta neihna le neih lohna pen Jehovah hong piak letsong ahi hi. Jehovah’ deihna tawh kituakin zang leng lungnopna le lungkimna hong ngahsak hi.
Kikupkikna
-
Zileta nei lo-a omna pen hamphatpih dingin koi bangin zang thei i hiam?
-
Khristian unaute bek tenpih dingin Lai Siangtho in bang hangin hong hanthawn a hiam?
-
Lai Siangtho thu panin kikhen theihna a hang khat bek in bang a hiam?
THEIH BEH NADING
“Thu um mi bek” tawh kiteng cih a khiatna in bang a hiam?
Nungak, tangval kiheelna le kitenna tawh kisai-in thu khensatna hoih na bawl theih nadingin video thum en in.
A nusiatte sanga a manphazaw Jehovah in pia ahih mana unaupa khat lungsim om dan en in.
Kikhen ding ahih kei leh tuam om ding ngaihsut ma-in bang thute ngaihsut ding kisam a hiam?
“‘Pasian’ Gawmsa’ Innkuan Pen Thupi Ngaihsut In” (Vilnatausang, December 2018)
a Angkawmna hang hi lo-a tuam omna thu Hilhcianna 4 ah en in.
b Ngeina pawlkhatte-ah nu le pate in a tate’ zi ding, pasal ding pen teelsak uh hi. Tua bang hun ciangin, itna a nei nu le pate in mo ding le maakpa ding a teel uh ciangin sumlepai le dinmunte en lo-in, Jehovah a it leh it loh ngaihsun masapen uh hi.
c Na kitenpih loh mi khat tawh nupa banga omkhawm na hih leh nusia ding maw, kitenpih ding cih pen nangma khensat ding thu ahi hi.
