Jehovah in nuntak nuam hong neisak nuam a, khat veivei ciang gualnop nadinga pawi i bawl ding zong deih hi. Ahih hang, pawi bawlna khempeuh pen Pasian in sang lo hi. Hih thu-ah Jehovah i itlam koici lak thei ding i hiam?

1. Pawi bawlna tampite Jehovah in bang hangin sang lo a hiam?

Pawi bawlna tampite pen Lai Siangtho hilhna tawh a kituak lohlam le lawki ngeina pana hong pai ahihlam na theih ciangin lamdangsa khathei hi teh. Tua pawi bawlnate pen biakna man lo tawh kizom khathei hi. Dawisiamna, mi a sih ciangin a kha si lo cih upna, kaam thu upna, le tanglai pi le pute thuciin upnate a bulphuh pawi bawlnate zong om hi. (Isaiah 65:11) Tua ahih manin Jehovah in a mite kiangah: “Amaute tawh kikhenin amaute kiang panin paikhia unla, a sianglo peuhmah sukha kei un,” ci-in vauna pia hi.​—2 Korin 6:17. a

2. Jehovah in mihingte nakpi taka pahtawina pawite bangci muh a hiam?

‘Mi bek muanna’ thangah i awk loh nadingin Jehovah in vauna hong pia hi. (Jeremiah 17:5 sim in.) Pawi pawlkhatte in kumpite ahih kei leh galkapte pahtawi hi. Pawi dangte in gam le nam ciaptehna pahtawi ahih kei leh suaktakna ni pahtawi hi. (1 Johan 5:21) Gamvai kipawlna ahih kei leh nopna dahna vai-a kipawlnate pahtawina pawite zong om hi. Mi khat ahih kei leh kipawlna khat pahtawiluatna pawi, le a diak diakin Pasian’ ngimna tawh a kituak lo san dan a thupisak pawi bawlnate-ah kihel leng, Jehovah’ lungsim bangci om ding a hiam?

3. Bang gamtatnate in pawi bawlnate sanhuai lo hisak a hiam?

‘Zukhamna, gualnop pawibawlna, le zunek pawikhamna’ pen Lai Siangtho in kham hi. (1 Peter 4:3, ZSV) Pawlkhat pawi bawlnate-ah mite pen ki-uk zawhna nei lo-in thangtat gawp uh hi. Jehovah’ lawm i hihsuak nop leh gamtatna siangtho lote i pelh ding kisam hi.

 ZON BEH INLA, MUH BEH IN

 5. Na upna a zahtak nadingun midangte huh in

6. Jehovah in eite hong lungdamsak nuam hi

Jehovah in i innkuanpihte le i lawmte tawh hun nuam tak hong zangsak nuam hi. Thuhilhna 8:15 sim in. Tua khit teh hih dotna kikum un:

• Jehovah in eite hong lungdamsak nuam ahihlam hih Lai Siangtho mun pan bangci theih i hiam?

Eite in kimukhawm a, hun nuam tak i zatkhop ding Jehovah in deih hi. Tua pen international kikhoppite-ah kimu thei hi. VIDEO hong in.

Galati 6:10 sim in. Tua khit teh hih dotna kikum un:

• Midangte tungah ‘a hoihin i gamtat’ theih nadingin a minthang pawite i bawl ding a kisam hiam?

• Koi bang piakkhiatna in hong lungdamsak zaw ding a hiam? Pawi ni ahih mana piak loh phamawha piak maw? Ahih kei leh piaknopna lungsim tawh piak?

• Teci tampite in a tate’n nuam a sak nadingun hun nuam tak vaihawmsak thei zel uh a, lamet lohpi-in zong letsong khawng pia uh hi. Ta nei na hih leh bang vaihawmsak thei ding na hiam?

 TOMLAKNA

Jehovah in i innkuanpihte le i lawmte tawh hun nuam i zatkhop ding hong deihsak hi. Ahih hangin, ama’ san loh pawi bawlnate hong pelhsak nuam hi.

Kikupkikna

• Jehovah in a san loh pawi bawlna ahihlam i theih nadingin bang dotnate dong thei i hiam?

• Pawite tawh kisai i thu khensatna pen i innkuanpihte le i lawmte’n a telsiam nadingun koici hilhcian ding i hiam?

• Jehovah in lungnuam taka hong omsak nuam ahihlam koici theih i hiam?