SIN DING THU 46
Bang Hangin Ki-ap Ding le Tui Kiphum Ding Kisam A Hiam?
Jehovah kiangah, amah bek bia dingin le na nuntakna-ah ama deihna a masa pena koih dingin thungetna tawh kamciam pia-in na ki-ap hi. (Late 40:8) Tua khit ciangin tui na kiphum hi. Tua bangin ki-ap khin na hihlam mite mai-ah na lakkhia hi. Thu khensatna i bawl theih khempeuh laka a thupi pen in Jehovah kianga ki-ap dinga khensatna ahi hi. Nuntakna hong kikhelsak hih a thupi mahmah thu khensatna bawl dingin bang in hong hanthawn thei a hiam?
1. Ki-ap nadingin bang in hong hanthawn a hiam?
Jehovah i itna in ki-ap dingin hong hanthawn hi. (1 Johan 4:10, 19) Lai Siangtho in, “Na Topa Pasian uh, na lungsim khempeuh, na nuntakna khempeuh, na pilna khempeuh, le na thahatna khempeuh uh tawh na it un,” ci-in hong hanthawn hi. (Marka 12:30) Pasian i itlam kampau le sepna tawh i lak hi. Numei khat le pasal khat a ki-it mahmah mana a kiten mah bangun, eite in zong Jehovah i it manin ama kiangah ki-apin tui i kiphum hi.
2. Jehovah in tui a kiphum khinsa a Tecite adingin bang thuphate pia a hiam?
Tui na kiphum ciangin Jehovah’ innkuanpih khat na suak ding hi. Jehovah’ itna pen nam tuamtuam tawh na ngah ding a, Pasian tawh zong na kinai semsem ding hi. (Malakhi 3:16-18 sim in.) Jehovah pen Pa banga na neih tham lo-in, Pasian le nang a hong it leitung bupa unaute tawh zong innkuan khat na suak ding hi. (Marka 10:29, 30 sim in.) Ahih hangin tui na kiphumma-in sep ding pawlkhat om hi. Jehovah na it nadingin le a Tapa na up nadingin na sinkul hi. Tua khit ciangin na nuntakna pen Jehovah kiangah na ap ding kisam hi. Tuate sem a, tui na kiphum leh nuntak nuam nei den theihna lampi tungah a tung na hita hi. Lai Siangtho in: “Tuiphumna . . . in note hong honkhia ahi hi,” ci-in gen hi.—1 Peter 3:21.
ZON BEH INLA, MUH BEH IN
Jehovah kiangah ki-apna nei a, kituiphum a thupina a hang kantel in.
3. I biak ding i teel kul hi
Tanglai Israel mi pawlkhat in Jehovah le a man lo Baal pasian bia khawm thei-in kingaihsun uh hi. Ahih hang, Jehovah in a ngaihsutna uh khelsak dingin kamsang Elijah na sawl hi. Kumpi Masate 18:21 sim in. Tua khit teh hih dotna kikum un:
-
Israel mite in bang teel ding nei uh hiam?
Israel mite mah bangin eite in zong i biak ding i teel kul hi. Luka 16:13 sim in. Tua khit teh hih dotnate kikum un:
-
Jehovah i biak kawmin midang ahih kei leh na dang bang hangin kibia thei lo a hiam?
-
Jehovah bia dinga i teellam koici lak i hiam?
4. Jehovah’ hong itna limtakin ngaihsun in
Jehovah in a manpha letsong tampi hong pia hi. Bang piakik thei i hiam? VIDEO hong in.
Na tungah Jehovah in itna koi bangin hong lak a hiam? Late 104:14, 15 le 1 Johan 4:9, 10 sim in. Tua khit teh hih dotnate kikum un:
-
Jehovah hong piak bang letsongte hangin lungdam phadiak na hiam?
-
Tua letsongte hangin Jehovah tungah na lungsim bangci om a hiam?
I deih mahmah na khat pen letsongin ngah leng, a hong piapa tungah i lungdamna i lak nuam hi. Thu Hilhkikna 16:17 sim in. Tua khit teh hih dotna kikum un:
-
Jehovah hong piak thuphate na ngaihsut ciangin bang piakik nuam na hiam?
5. Ki-apna in thupha tampi hong ngahsak
Mi tampite in minthanna, nasep hoih, ahih kei leh sum tampi neihna in lungnopna pia dingin ngaihsun uh hi. Tua pen a man hiam? VIDEO hong in. Tua khit teh a nuai-a dotnate kikum un.
-
Hih video sunga bawlung suipa in bawlung suih a uuk mahmah hang, bang hangin nusia a hiam?
-
Bawlung adinga a nuntakna pia lo-in, Jehovah adinga pia dingin khensat hi. A thu khensatna man na sa hiam? Bang hang hiam?
Sawltak Paul in Khristian khat a suah ma-in mite’ thupi muh mahmah nasep nei hi. A minthang sia khat kiangah Jew upadi tawh kisai pilna na sin hi. Ahih hang, Khristian khat a suah nadingin tuate khempeuh nusia hi. Tua hangin a kisik hiam? Filippi 3:8 sim in. Tua khit teh hih dotnate kikum un:
-
Paul in Khristian khat suak dinga a nusiatte pen bang hangin “ninneng” ci a hiam?
-
Bangteng ngahkik a hiam?
-
Jehovah nasep le na dang sep nadinga nuntakna zat pen koici tehkak ding na hiam?
Paul in Khristian khat a suah ciangin a nusiatte sangin tampi ngah hi
MI PAWLKHATTE’ GEN: “Pasian kiangah i ki-ap ding kisam kei.”
-
Jehovah kiangah i ki-ap ding kisam cih bang hangin um na hiam?
TOMLAKNA
Jehovah kianga ki-ap a, tui kiphum dingin itna in hong hanthawn hi.
Kikupkikna
-
Jehovah pen bang hangin lungsim khempeuh tawh itin i biak ding kilawm a hiam?
-
Jehovah in tui kiphum khinsa Tecite koi bangin thaman pia a hiam?
-
Jehovah kiangah na ki-ap nuam hiam?
TEIH BEH NADING
Music a siam khat le kimawl a siam khat Jehovah kiangah a ki-apna uh a hang en in.
Khangnote’ Dotna—Ka Nuntakna Pen Bangci Zat Ding Ka Hiam?—Nungthu Sutkikna (6:54)
Ki-ap ding a kisapna a hang dangte ngaihsun in.
“Bang Hangin Jehovah Kiangah Ki-ap Na Hiam?” (Vilnatausang, January 15, 2010)
Jehovah kianga a ki-apte ii lungdamna pen hih music video-ah en in.
“‘Bang Hangin Hih Leitungah Nungta I Hiam?’ Cih Ka Theihnop Zawh Sawtta” cih thulu-ah a masa pena a koihte a sittelkik numei khat’ thu sim in.
“Lai Siangtho In Nuntakna Kikhelsak” (Vilnatausang, November 1, 2012)
