SIN DING THU 55
Tualsung Pawlpi Na Panpih In
Leitung bupa mi tampite in tualsung pawlpi-ah lungdam takin Jehovah biakhawm uh hi. Amaute in a ngah uh thuhilhna le lamlahnate tungah lungdamin, lam tampi tawh lawptakin pawlpi panpih uh hi. Na omna pawlpi-ah tua bang ahi hiam?
1. Hun le thatang zangin pawlpi koi bangin panpih thei na hiam?
Eite khempeuh in pawlpi panpih thei hi hang. Pawlpi sungah a khangham ahih kei leh a damlo a om hiam? Amau a kikhop theih nadingin na huh thei ding hiam? Inn sung nasepah huh ahih kei leh vante na leisak thei ding hiam? (James 1:27 sim in.) Biakinn hahsiang hun le puahphat hun ciangin zong kihuh thei hi. Tuate a sem dingin kuamah kisawl hamtang lo hi. Pasian le unaute i itna in ‘utna lungsim tawh hong kipiakhiasak’ hi.—Late 110:3.
Tui kiphum khin Tecite in lampi dang tawh pawlpi panpih thei uh hi. Pasian thu lamah picinna a nei unaupate in pawlpi nasem le a nung ciangin pawlpi upa bangin sem thei uh hi. Unaupate le unaunute in pioneer semin taangko nasepna thalawp takin panpih thei uh hi. Unau pawlkhat in biakinn lamna-ah zong huh thei-in, huhna a kisam pawlpi-ah kisuanin Pasian’ na sem thei uh hi.
2. Sumlepai le neihlelamte zangin pawlpi koi bangin panpih thei i hiam?
‘I neihsate tawh TOPA i pahtawi thei hi.’ (Paunak 3:9, ZSV) Tualsung pawlpi le leitung bup taangko nasepna panpih nadingin sumlepai le neihlelamte i piakhiat ciangin i lungdam hi. (2 Korin 9:7 sim in.) I sumpite pen siatna lian a tuakte huh nadingin zong kizang hi. Mi tampite in sumpi pen ‘tuam koihin’ manmanin pia uh hi. (1 Korin 16:2 sim in.) Biakinn a om sumpi bung sungah a kikhiat theih mah bangin, donate.pr418.com online panin zong kipia thei hi. Jehovah in i neihlelamte zangin amah i itlam lah theihna hunpha hong pia hi.
ZON BEH INLA, MUH BEH IN
Pawlpi na panpih theih dan ding ngaihsun in.
3. I neihlelamte kizang thei hi
Piaknopna lungsim tawh a pia mite pen Jehovah le Jesuh in it hi. Gentehna-in, Jesuh in a zawng meigongnu’ sumpi khiat pen na phat hi. Luka 21:1-4 sim in. Tua khit teh hih dotnate kikum un:
-
Jehovah lungkim nadingin sumpi tampi khiat ding a kisam hiam?
-
Piaknopna lungsim tawh i piak ciangin Jehovah le Jesuh lungsim bangci om a hiam?
Sumpi zat dan na theih nadingin VIDEO hong in. Tua khit teh a nuai-a dotna kikum un.
-
Sumpite pen leitung bupa pawlpite adingin koi bangin kizang a hiam?
4. I thatang tawh kihuh thei hi
Lai Siangtho hun lai-in Jehovah a biate in biakinn puahphatna-ah thalawp takin kipiakhia uh hi. Sumpi a khiat uh thamloh huhna dang zong na pia uh hi. Khang Tangthu Nihna 34:9-11 sim in. Tua khit teh hih dotna kikum un:
-
Jehovah’ inn ahih kei leh biakpiakna mun pen Israel-te in koi bangin na kemcing uh a hiam?
Jehovah Tecite in tua lim hoih a etteh dan uh na theih nadingin VIDEO hong in. Tua khit teh a nuai-a dotnate kikum un.
-
Biakinn pen hahsiang ding le puahphat ding bang hang thupi a hiam?
-
Koi bang dante tawh huh thei na hiam?
5. Pawlpi tavuante la thei dingin unaupate khangto thei uh hi
Pawlpi pen ahi thei zah a panpih dingin Khristian pasalte pen Lai Siangtho in hanthawn hi. Ettehna adingin VIDEO hong in. Tua khit teh a nuai-a dotna kikum un.
-
Video-ah, kicing taka pawlpi a panpih theih nadingin Ryan koici khangto a hiam?
Pawlpi nasemte le upate’ neih ding kicinnate Lai Siangtho in hilhcian hi. Timoti Masa 3:1-13 sim in. Tua khit teh hih dotnate kikum un:
MI PAWLKHATTE’ DOTNA: “Jehovah Tecite in a nasepna adingin koi pan sum ngah uh a hia?”
-
Nangh bangci dawng ding?
TOMLAKNA
I hun, thatang le neihlelamte zanga pawlpi i panpih pen Jehovah in manphasa mahmah hi.
Kikupkikna
-
I hun le thatang zangin pawlpi koi bangin panpih thei i hiam?
-
I neihlelamte zangin pawlpi koi bangin panpih thei i hiam?
-
Pawlpi pen koi bang danin panpih nuam na hiam?
THEIH BEH NADING
Sawm-ah-khat piak ding pen Pasian in a nget nawn lohna a hang kan in.
“Sawm-ah-khat Thu Lai Siangtho In Bang Gen A Hiam?” (Website-a thu)
Lai Siangtho in pawlpi tavuan pawlkhatte pen a kituiphum khin pasalte sep dingin koih hi. A kituiphum khin numei khatin tua tavuante a sep ding kisam ahih leh bang a cih tam?
“Pawlpi Sunga Lutang Hihna Geelna” (Vilnatausang February 2021)
Haksatnate kawmkalah unaute kianga laibute a puak Tecite’ thu en in.
Pasian nasep nadinga sumlepai ka ngah dan uh pen biakna dangte tawh a kibat loh dan sim in.
“Jehovah Tecite’ Nasep Nading Sumlepai Koi Pan Kingah A Hiam?” (Website-a thu)
