SIN DING THU 50
Na Innkuan A Lungnop Theih Dan—Khen 2
Tate pen Jehovah’ hong piak letsong hi. Hih letsong pen nu le pate in a kepcing ding uh Pasian in deih hi. Tua ahih manin koi bangin kemcing ding cih tawh kisai a pilhuai lamlahna pia hi. A lamlahna-ah innkuan lungnop nadinga tate’ sep theih dingte zong kihel hi.
1. Nu le pate tungah Jehovah in bang lamlahna pia a hiam?
Nu le pate in tate it a, ahih theihzah a hun a piak ding uh Jehovah in deih hi. A lauhuai nate pan kemin Lai Siangtho thubulte bangin pantah dingin zong deih hi. (Paunak 1:8) Amah in pate tungah, “Khristian ngeina tawh kituakin [na tate uh] taai-in hilhin pantah un,” ci-in gen hi. (Efesa 6:4 sim in.) Nu le pate in tate pattah ding vaipuak pen midang tungah ngat lo-a, Jehovah’ lamlahna banga a sep uh ciangin Jehovah a lungdam hi.
2. Tate tungah Jehovah in bang thu hilh a hiam?
Jehovah in: ‘Tate aw, na nu na pate uh thu mang tawntung un,’ ci-in gen hi. (Kolose 3:20 sim in.) Tate in nu le pate zahtaka thu a man uh ciangin Jehovah le nu le pate a lungdamsak uh hi. (Paunak 23:22-25) Jesuh in tate adingin lim hoih na lak hi. A cingtaak mi ahih hang, a nu le pate zahtakin a thu uh mang hi.—Luka 2:51, 52.
3. Innkuan bupin Pasian tawh koi bangin kinai thei ding na hi uh hiam?
Nu le pa na hih leh, na tate uh pen Jehovah na it mah bangun itsak nuam ding hi uh teh. Koi bangin itsak thei ding na hi uh hiam? ‘[Jehovah’ piak thute] na tate uh tungah limtakin na hilh ding uh a, na innsung uhah na tut uh ciang, lampi-ah na pai uh ciang na gengen ding uh hi,’ cih Lai Siangtho’ genna mang in. (Thu Hilhkikna 6:7) ‘Limtaka hilh’ cih pen gen kikkik a thu hilh cih nopna ahi hi. Tate in a phawk den nadingin thu khat pen gen kikkik ding a kisaplam thei ding hi teh. Hih Lai Siangtho gen nop in hun i ngah simin i tate pen Jehovah’ thu manmanin i hilh ding kisam cihna hi. Kalsimin innkuan bupa Lai Siangtho sin nadinga hun i piak pen hoih hi. Ta na neih kei uh leh zong hun pia-a kalsima Lai Siangtho sin pen na hamphatpih ding uh hi.
ZON BEH INLA, MUH BEH IN
Innkuan kilemna le lungnopna a pia thei sep theih dingte ngaihsun in.
4. Na tate pen itna tawh pantah in
Tate pattah pen haksa thei hi. Lai Siangtho in koi bangin hong huh thei a hiam? James 1:19, 20 sim in. Tua khit teh hih dotnate kikum un:
-
Nu le pate in tate thu a hilh uh ciangin koi bangin itna lak thei uh a hiam?
-
Bang hangin nu le pate in hehsuah lai-a tate thu a hilh loh ding uh kisam a hiam? a
5. Na tate kem in
Tate na kep nadingin nulepa vai na genpih ding thupi mahmah hi. Genpih haksa thei hi. VIDEO hong in. Tua khit teh a nuai-a dotnate kikum un.
-
Tate kiangah nulepa vai gen pen nu le pa pawlkhat in bang hangin haksa sa uh a hiam?
-
Nu le pa pawlkhat in koi bang danin nulepa vai tate genpih uh a hiam?
Lai Siangtho’ genkholh mah bangin Satan’ leitung pen hong sia semsem hi. Timoti Nihna 3:1, 13 sim in. Tua khit teh hih dotna kikum un:
-
A neu 13-a a gen migilo pawlkhat in naupangte khoihsia uh hi. Tua ahih manin tate kiangah nulepa vai tawh kisai thu hilh ding le naupang a khoihsia theite gal pana a kikep theih nadinga thu hilh ding bang hang thupi a hiam?
A lungluthuai thu
Tate kiangah nulepa vai tawh kisai hilh ding le naupang a khoihsia theite gal pan a kikep theih nadinga thuhilh theih nadingin Jehovah Tecite in zat theih a tuamtuam thohkhia uh hi.
-
Na Tate Kem In (video)
-
“Na Tate Nulepa Vai Hilh In” (Khanghlo In! No. 5 2016)
6. Na nu le pate uh zahtak un
Naupangte le kum sawm a val tate in a nu le pate a hopih uh ciangin zahtakna lak thei uh hi. VIDEO hong in. Tua khit teh a nuai-a dotnate kikum un.
-
Nu le pate zahtak taka hopihna in bang hangin hamphatna om a hiam?
-
Nu le pate na hopih ciangin zahtakna koici lak thei na hiam?
Paunak 1:8 sim in. Tua khit teh hih dotna kikum un:
-
Nu le pate in thu hong hilh ciangin koici thukkik ding kisam a hiam?
7. Innkuan bupin Jehovah bia un
Jehovah Tecite in innkuan bupa Pasian biak nadingin hun pia uh hi. Innkuan kikhopna koici bawl uh a hiam? VIDEO hong in. Tua khit teh a nuai-a dotnate kikum un.
-
Innkuan kikhopna pen koi bangin manmanin kibawl thei a hiam?
-
Innkuan kikhopna pen a nuam mahmah ding le a baih mahmah dingin koi bangin kibawl thei a hiam?—Hih sin ding thu ii a kipatna-a lim pen en in.
-
Innkuan bupa Lai Siangtho sinkhop ding bang hangin haksa thei a hiam?
Tanglai-a Israel innkuante pen Pasian’ thu kikumkhawm dingin Jehovah in lamen hi. Thu Hilhkikna 6:6, 7 sim in. Tua khit teh hih dotna kikum un:
-
Hih Lai Siangtho thubul pen koici zui thei ding na hiam?
Innkuan kikhopna adinga lamlahnate:
-
Pawlpi kikhopna adingin kithawikhol in.
-
Na innkuanpihte ii deih Lai Siangtho thupiang khat simin kikum un.
-
Naupangno na neih leh jw.org sunga naupangte ading septheihte cih pen na download ahih kei leh print khia-in zang in.
-
Kum sawm a val khangnote a om leh jw.org sunga kum sawm valkhinte adinga ki-at thu khat kikum un.
-
Naupangte tawh Lai Siangtho tangthu khat kineihkhawm un.
-
JW.ORG sunga video khat enin kikumkhawm un.
MI PAWLKHATTE’ GEN: “Lai Siangtho pen naupangte ading tel haksa lua.”
-
Nangh bangci ngaihsut na hiam?
TOMLAKNA
Jehovah in nu le pate’n a tate uh it ding, pattah ding le kem ding; tate in zong nu le pate tungah zahtakin a thu uh mang ding; innkuante in zong innkuan bupa amah biakhawm dingin deih hi.
Kikupkikna
-
Nu le pate in a tate koici pattahin kem thei ding uh a hiam?
-
Tate in nu le pate tungah zahtakna koici lak thei ding a hiam?
-
Kalsim innkuan kikhopna adingin hun tuam koih leng, bang hamphatna om ding a hiam?
THEIH BEH NADING
Naupangte a upat hun adingin bang thute in kithawikholsak thei a hiam?
“Naupangte’ Sin Dinga A Kisam Thu Guk” (Khanghlo In! No. 2 2019)
A kumham nu le pa a kemte adinga Lai Siangtho piak thuhilhna kan in.
“Khangham Nu le Pate Kepna Tawh Kisai Lai Siangtho In Bang Gen A Hiam?” (Website-a thu)
Naupang kep dan a thei lo pasal khat, pa hoih a suah dan thu en in.
Pate in a tapate uh tawh kizopna hoih a neih theih dan ngaihsun in.
“Pate In A Tapate Tawh Koi Bangin Kimaingap Thei Ding Uh A Hiam?” (Vilnatausang, November 1, 2011)
a Lai Siangtho sunga, ‘thuhilhna’ cih kammal in hilh, lamlak, le khialhnate puahpha cihna hi. Hehpihna nei lo-a satgawp cihna hi ngei lo hi.—Paunak 4:1.
