SIN DING THU 53
Jehovah’ Lungsim Tawh A Kituak Gualnopna Teel In
Jehovah pen “a lungdam Pasian,” ahi hi. (1 Timoti 1:11, NWT) Eite hong lungdamsak nuamin nuntak nuam zong hong neisak nuam hi. Gualnop nadinga hun i piak ciangin a lungdam hi. Ei mahmah in lungdamna i ngah theih banah Jehovah’ lungsim tawh zong a kituak gualnopna i teel theih dan thu hih sin ding thu-ah kikum ding hi hang.
1. Gualnopna i teel ciangin bang thu i ngaihsut ding kisam a hiam?
Hun awl na ngah ciangin bang sem nuam na hiam? Mi pawlkhatte in innah om khinkhianin lai sim, la ngai, video en ahih kei leh internet zang nuam uh hi. Pawlkhatte in lawmte tawh khualzin, tuipeek ahih kei leh kimawl cihte nuamsa uh hi. Bangbang hitaleh i teel gualnopna in, ‘Topa a lungkimsak’ ding kisam hi. (Efesa 5:10) Bang hang hiam cih leh mi a tamzawte’ deih gualnopnate-ah Jehovah’ muhdah ngongtatna, nulepa paktatna le dawi siamnate kihel ahih man hi. (Late 11:5 sim in.) Pilvangtaka gualnopna i teel theih nadingin bang in hong huh ding a hiam?
I lawm dingin Jehovah a it mite teel lehang, i hamphatpih theih banah, gualnopna i teelna-ah hong huh thei ding uh hi. I zawhkhit sin ding thu-ah i kikup mah bangin, “mipil tawh kikhawl lecin na pil ding a,” Pasian tehna a zui lote tawh kikhawl den lecin “gimna na thuak ding hi.”—Paunak 13:20.
2. Gualnop nadinga i hun zat zah ciangtan ding bang hangin thupi a hiam?
Gualnopna hoih ahi phial zongin hun tampi zang lo dinga i kidop ding kisam hi. Tua hi kei leh a thupizaw nasepte adingin hun kicing thei nawn lo ding hi. Lai Siangtho in, “Na hun neih khempeuh uh a hoih lamin zang un,” ci-in hong hanthawn hi.—Efesa 5:15, 16 sim in.
ZON BEH INLA, MUH BEH IN
Gualnopna tawh kisai khensatna hoih na bawl theih dan kan in.
3. Gualnopna hoih lote pelh in
Gualnopna hoihtaka i teel ding bang hang kisam a hiam? VIDEO hong in. Tua khit teh a nuai-a dotnate kikum un.
-
Tanglai-a Rom mite’ kilaina pawite pen tu huna gualnopna pawlkhat tawh koici kibang a hiam?
-
Hih video-ah gualnopna tawh kisai Danny in bang theikhia a hiam?
Rom 12:9 sim in. Tua khit teh hih dotna kikum un:
-
Gualnopna na teelna-ah hih Lai Siangtho mun in koi bangin hong huh thei a hiam?
Jehovah’ muhdah thu pawlkhatte in bangte a hiam? Paunak 6:16, 17 le Galati 5:19-21 sim in. Lai Siangtho mun khat ta sim khit ciangin hih dotna kikum un:
-
Hih Lai Siangtho munte sunga bang gamtatziate pen tu hun gualnopnate-ah kimu a hiam?
Pilvang taka gualnopna na teel theih dan
Nang le nang kidong in:
-
Bangteng kihel ding? Hih gualnopna-ah Jehovah’ muhdah thute a kihel hiam?
-
Hun bangzah bei ding? Hih gualnopna in a thupizaw nasepte adingin hun nei nawn lo zah dongin a hisak hiam?
-
Kuateng kihel ding? Hih gualnopna in Jehovah a it lo mite tawh hong kikhawlsak hiam?
A lauhuai nate pen a gamla theithei-a pelh hoih zaw hi. Tua ahih manin ei adinga a hoih lo-a i ngaihsut gualnopnate i pelh ding kisam hi
4. Na hun neihte pilvang takin zang in
VIDEO hong in. Tua khit teh a nuai-a dotna kikum un.
-
Video sunga unaupa in et dinga a kilawm lote a et loh hang, gualnopna adinga a hun awl zat dan pen bang hang lauhuai a hiam?
Filippi 1:9, 10 sim in. Tua khit teh hih dotna kikum un:
-
Gualnopna adinga i hun zat zah khensat dingin hih Lai Siangtho mun in koi bangin hong huh thei a hiam?
5. Nang adinga gualnopna hoih teel in
Jehovah’ deih loh gualnopna pawlkhat a om hang, a deihna tawh a kituak gualnopna tampi om hi. Thuhilhna 8:15 le Filippi 4:8 sim in. Tua khit teh hih dotna kikum un:
-
Koi bang gualnopna hoihte deih na hiam?
Gualnopna hoih na nei thei hi
MI PAWLKHATTE’ GEN: “Ka sep khiat kei nak a leh ngongtatna, nulepa paktatna le dawi siamna a kihel gualnopnate et pen khial kei ee.”
-
Nangh bangci ngaihsut na hiam?
TOMLAKNA
Jehovah in gualnopna hoihte hong teelsak nuam hi.
Kikupkikna
-
Khristiante in koi bang gualnopnate a pelh ding uh kisam a hiam?
-
Gualnopna adinga hun tampi i piak loh ding bang hangin thupi a hiam?
-
Jehovah’ lungsim tawh a kituak gualnopna pen bang hangin teel nuam na hiam?
THEIH BEH NADING
Gualnopna na teelna tunga tavuan a nei pen ngaihsun in.
“Jehovah Tecite In Video, Laibu le La Kham A Nei Uh Hiam?” (Website-a thu)
Gualnopna hoih na teel theih dan thu sim in.
“Na Gualnopna Na Hamphatpih Hiam?” (Vilnatausang, October 15, 2011)
“Kimuhdahna Lungsim Na Paikhia Zo Ing,” cih thulu-ah mi khat in a gualnopna teel a khelna a hang sim in.
“Lai Siangtho In Nuntakna Kikhelsak” (Vilnatausang, February 1, 2010)
Dawite’ thu a kihel gualnopna tawh kiasai-in nupi khat in khensatna hoih a bawl dan en in.
