Khristian mante in Jehovah tawh a kizopna uh bangmah le kuamah hanga siasak lo dingin khensat uh hi. Nangh zong tua bangin khensat ding hi teh. Na cihtakna Jehovah in manphasa hi. (1 Khang Tangthu 28:9 sim in.) Bang dinmunte-ah Pasian tunga i citak ding haksa thei a hiam? I cihtak nadingin bang in hong huh thei ding a hiam?

1. Mi pawlkhat in Jehovah tunga i cihtakna koi bangin ze-et thei uh a hiam?

Mi pawlkhat in Jehovah na biak nawn loh nadingin hong kham ding uh hi. Kuate in tua bangin hong kham ding a hiam? Thuman a nusia pawlkhat in i upna a siat nadingin Pasian’ pawlpi tungtang thu man lo gen uh hi. Amaute pen pawlpi langpang mite kici hi. Tua tham lo-in biakna makai pawlkhat in zong pilvang taka a om lote thuman pan a paikhiat nadingun i tungtang thuman lo gen uh hi. A langpangte tawh kinialna, amau laibu, website-a thute simna ahih kei leh amau video-te etna in ei adingin lauhuai hi. Cihtakna tawh Jehovah a bia mite lam a pialsakte tawh kisai-in Jesuh in, “Hih mite lunghihmawh ngaihsut kei un. Amaute pen mittaw makai ahi uh hi. Mittaw khat in mittaw dang khat makaih leh a nihun hawkguam sungah kiakhawm ding uh hi,” ci-in gen hi.​—Matthai 15:14.

I theih mi khat in Jehovah Teci hi nawn lo dingin khensat leh bang i cih tam? I it le i maingap khat ahih leh khasia mahmah ding hi hang. Amah le Jehovah kikalah deih teel dingin zong hong ci thei hi. Pasian tung bekah citaksuak dinga i khensat ding thupi pen hi. (Matthai 10:37) Tua ahih manin, tua bang mite tawh kikhawl lo dinga Pasian hong piak thukham i zui hi.​—1 Korin 5:11 sim in.

2. Mimal khensatnate in Jehovah tunga i cihtaklam koi bangin lak thei a hiam?

Jehovah i itna in biakna man lo tawh kipawl lo dingin hong hanthawn hi. I nasep, kipawlnate le i sep i bawlna khempeuh pen a manlo biakna tawh a kizop loh ding thupi hi. Jehovah in: ‘Keima mite aw, [A Lian Babylon] panin hong paikhia un,’ ci-in i kidop theih nadingin hong hilh hi.​—Maangmuhna 18:2, 4.

 ZON BEH INLA, MUH BEH IN

3. A man lo siate lakah kidawm in

Jehovah’ pawlpi gensiatna thute i zak ciangin bangci thukkik ding i hiam? Paunak 14:15 sim in. Tua khit teh hih dotna kikum un:

• I zak khempeuh um lo dingin bang hang kidawm i hiam?

Johan Nihna 10 sim in. Tua khit teh hih dotnate kikum un:

• Pawlpi langpangte tungah koici bawl ding i hiam?

• Pawlpi langpangte tawh i kizop lian loh hang, amau thuhilhnate tawh koici kizom khathei i hiam?

• Jehovah le a pawlpi gensiatna thute ngai leng, a lungsim bangci om dingin ngaihsun na hiam?

4. Unaute khat in mawhna a bawl ciang Pasian tungah citaksuak in

Pawlpi sungah mi khat in mawhna lian a bawl lam thei lehang bang tavuan nei i hiam? Tanglai Israel-te tunga Pasian piak thukham sunga om thubul khat ngaihsun in. Siampi Laibu 5:1 sim in.

Hih Lai Siangtho muna a gen mah bangin, mi khat in mawhna lian a bawl lam i theih leh pawlpi upate kiangah i gen ding kisam hi. Ahih hang, i gen ma-a pawlpi upate kiangah a mawhna pulak dinga mawhna a bawlpa i hanthot pen amah i itlam i lahna hi. A pulak kei leh Jehovah tunga i cihtakna hangin pawlpi upate i theihsak ding kisam hi. Tua banga i sepna in a nuai-ate itna kip tawh i itlam koici lakkhia a hiam?

• Jehovah Pasian

• mawhna a bawlpa

• pawlpi sunga om midangte

 5. A Lian Babylon tawh kipawl kei in

 TOMLAKNA

Jehovah tungah i cihtaksuak theih nadingin Pasian tunga a citak lote tawh i kikholh loh ding kisam hi. Biakna man lo pan i paikhiat ding zong kisam hi.

Kikupkikna

• Pawlpi langpangte’ thuhilhnate etna, simna le ngaihna pen bang hang pelh ding kisam a hiam?

• Jehovah Teci a suak nuam nawn lote tungah koici bawl ding i hiam?

• Biakna man lo pana paikhiat ding thuhilhna pen koi bangin mang thei ding i hiam?