Hih Lai Siangtho kikupkhopna pan Jehovah’ thu tampi na theita hi. Tua ahih manin Pasian na it semsem a, ama kiangah nang le nang ki-apin tui a kiphum khinta zong hi thei ni teh. Ahih kei leh, a sawt lo-in tui a kiphum sawm zong hi thei ni teh. Ahih hang, tui kiphum khit ciangin khantoh ding kisam nawn lo cihna hi lo hi. A tawntungin Jehovah naih semsem thei hi teh. Koi bang danin naih thei na hiam?

1. Jehovah tawh na kilawmtatna bang hang kipsuaksak ding na hiam?

Jehovah tawh i kilawmtatna a kipsuak nadingin i hanciam ding kisam hi. Bang hang hiam? Jehovah kiangpan ‘i tolhmang khakloh’ nadingin ahi hi. (Hebru 2:1, ZSV) Cihtakna tawh Jehovah biasuak dingin bang in hong huh thei a hiam? Taangko nasepna-a kihelna le lungsim khempeuh tawh Pasian’ na i sep theih dan lampite zonna in hong huh thei ding hi. (Filippi 3:16 sim in.) Jehovah’ nasep in a hoihpen nuntakna ahi hi!​—Late 84:10.

2. Adang bangte na sepsuak ding kisam a hiam?

Hih Lai Siangtho kikupkhopna na zawhkhit hang, Khristian nuntakna lampi na totsuak ding kisam hi. Lai Siangtho in: “Na ngeina thak uh bangin na nungta un,” ci-in gen hi. (Efesa 4:23, 24) Lai Siangtho sin suakin pawlpi kikhopnate-ah kihel lecin Jehovah le ama’ pianziate thei beh ding hi teh. Pasian’ pianziate ahi thei zah a etteh dingin hanciam in. Jehovah a lungkim nadingin a kisam bangbangin kikhel in.

3. Khangtosuak dingin Jehovah in koi bangin hong huh ding a hiam?

Lai Siangtho in: “Pasian in note a cingtaakin hong bawl ding a, kipna, thahatna, bulkip kician hong pia ding hi,” ci-in gen hi. (1 Peter 5:10) I vekpi-in ze-etnate thuakkha ciat hi hang. Ahih hang, Jehovah in ze-etna i do zawh nadinga a kisam huhna hong pia hi. (Late 139:23, 24) Cihtakna tawh Jehovah biak nopna lungsim le biak zawhna hong pia dingin hong kamciam hi.​—Filippi 2:13 sim in.

 ZON BEH INLA, MUH BEH IN

4. Na lawm hoihpen tawh kiho-in kizom den in

Thungetna le Lai Siangtho sinna in Jehovah’ lawm a suak dingin nang hong huh khinta hi. Tuate in Jehovah tawh na kinaih semsem nadingin koi bangin hong huh a hiam?

Late 62:8 sim in. Tua khit teh hih dotna kikum un:

• Jehovah tawh na kilawmtatna a kip semsem theih nadingin na thunget dan pen koi bangin khangtosak thei ding na hiam?

Late 1:2 sim in. Tua khit teh hih dotna kikum un:

• Jehovah tawh na kilawmtatna a kip semsem theih nadingin Lai Siangtho na sim dan pen koi bangin khangtosak thei na hiam?

Mimala Lai Siangtho sinna pan hamphatna tampi na ngah theih nadingin bang hih thei na hiam? Na theih nadingin VIDEO hong in. Tua khit teh hih dotnate kikum un.

• Hih video sunga bang lamlahnate zui thei ding na hiam?

• Bang thu sin beh nuam na hiam?

 TOMLAKNA

Jehovah tawh na kilawmtatna a kip semsem theih nadingin hanciam in. Pasian nasepna-ah ngimnate nei in. Tua hileh nuntak nuam nei den ding hi teh!

Kikupkikna

• Jehovah in cihtakna tawh amah na biak theih nadingin hong huh ding cih bang hang muang thei na hiam?

• Jehovah tawh na kilawmtatna pen koi bangin kipsak semsem thei na hiam?

• Pasian nasepna-ah ngimnate na neihna in khangtosuak dingin koici hong huh thei a hiam?