Pasian in mite leitungah nuamsa taka nungtasak nuam hi. Leitunga kipan na khempeuh a piansakna in, mite hong it man hi. A sawtlo-in mihingte a’ding a hoihpen lametna hong bawlsak tading hi. Haksatna hong piankhiatna a hangte hong hepkhiatsak tading hi.—Jeremiah 29:11 na sim in.

Mihing kumpite in hiamtatna, natna leh sihnate hemkhia zolo hi. A hih hangin lungdamhuai thu na om hi. A sawt lo-in Pasian in mihingte ukna khempeuh pen ama ukna tawh laihkhia tading hi. Tua in, kilemna leh cidam takin nopsakna hong pia ding hi.—Isaiah 25:8; 33:24; Daniel 2:44 na sim in.

Leitung pan migilote Pasian in a hepkhiat ciangbekin, gimnate beizo pan ding hi. (Zefaniah 2:3) Cikciang a bei tam maw? Tu-in mite a lausak thute tawh kisai Lai Siangtho-ah na genkhol khin hi. Tu’n leitunga thupiangte’n Pasian in a sawt lo-in a hepkhiat ding hun naita, cih na lak hi.—2 Timoti 3:1-5 na sim in.

Lai Siangtho sunga om Pasian thu sinding kilawm hi. Lai Siangtho pen itna tawh a kidim Pa in, a piak laikhak tawh kibang hi. Tu-in, a hoih zawa nuntakna leh mailamah zong tawntung nuntakna nuam bangci ngahding cihte na lak hi. Lai Siangtho tel nadinga na sin pen mipawlkhat te’n deih lo mai kha ding hi. Hih mahtaleh, mailama nuntakna pen hoih lualiang ahih manin sin lo-in om kha kei in.—Paunak 29:25; Maangmuhna 14:6, 7 na sim in.