Biakna khempeuhah migi tampi om hi. Amaute Pasian in mu a, don ahih manin a lungdamhuai thu hi. A dahhuai khatah biakna zangin thusia kibawl mawk hi. (2 Korin 4:3, 4; 11:13-15) Biakna pawlkhat in bawlsiatna, a lom a tanga mi thahna, gal le naupang na ngawn zawhthawh bawlna- cihte-ah a kihel lam uh kiza hi. Tua in, lungsim takpi tawh Pasian a biate khasiasak hi!—Matthai 24:3-5, 11, 12 na sim in.

Biakna man in Pasian a pahtawi hang, biakna man lo-in Pasian dahsak hi. Biakna man lo in Lai Siangtho sunga om lo upnate, Pasian leh misite tawh kisai a man lopi-in hilh uh hi. Ahih hang, Jehovah in amah tawh kisai thuman, mite’n a theihtel ding a deih hi.—Ezekiel 18:4; 1 Timoti 2:3-5 na sim in.

Pasian ka it uh ci napi a lang ah Satan’ leitung a it zaw ngiat biaknate’n Pasian na kheem zolo ding uh hi. (James 4:4) Pasian kammal in biakna man lo khempeuh “A Lian Babylon” na ci hi. Babylon pen tanglai khuapi khat hi a, Noah hun lai Tuiciinpi a tung khit ciang biakna man lo a kipatna mun hi. A sawt lo-in mite kheem a, a bawlsia biaknate, Pasian in thakhat thu-in susia tading hi.—Maangmuhna 17:1, 2, 5, 16, 17; 18:8 na sim in.

A lungdamhuai thu a dang na om lai hi. Jehovah in leitungbupa biakna man lote-ah, a om migi-te na mangngilh lo hi. Amaute thuman hilhna tawh kaikhawm hi.—Mikah 4:2, 5 na sinm in.

Thumanna le thuhoih a itte Jehovah in dik a sa hi. Biakna man lo pan a paikhiat na’ng un Pasian in a kun hi. Pasian a it a kuamapeuh in Pasian deihna bangin kikhel ding a ut uh hi.—Maangmuhna 18:4 na sim in.

Kumzalom masa lai-in, sawltakte kiangpan a lungdamhuai thu migite’n a zak uh ciangin lungdam takin na saang uh hi. Amaute’n Jehovah kiang pan nuntaak zia ding lampi thak sin uh a, a nuntakna uh khiatna nei in lametna zong neisak ahih man in lungnuam uh hi. Lungdamhuai thu ngai in Jehovah pen a mau nuntaakna-ah a masapen in koih uh ahih manin tu hun a’ding etteh huai uh hi.—1 Thesalonika 1:8, 9; 2:13 na sim in.

Jehovah in biakna man lo pan a paikhiate ama innkuan sungah na muak hi. Jehovah’ muakna na sang leh amah tawh na kilawmta ding a, itna tawh a kidim a innkuanpih na suak ding a, tawntung nuntakna zong na ngah ding hi.—Marka 10:29, 30; 2 Korin 6:17, 18 na sim in.

Biakna man lote thu kikhen tading cih pen a lungdamhuai thu hi. Mite netniamna pan suakta ding uh hi. Biakna man lote’n mite kheemin kikhenthaangsak zo nawn lo ding hi. Mi khempeuh in a man Pasian khat bek kipumkhat takin bia tading uh hi.—Maangmuhna 18:20, 21; 21:3, 4 na sim in.