Mihingte leitungah a tawntunga nungta ding cih a lungdamhuai thu Lai Siangtho sungah kigelh hi. (Late 37:29) Lai Siangtho pen bu neu 66 a kigawm ahi hi. Pasian in a citak pasal 40 kiim zangin a gelhsak hi. Bu masa 5 te Moses in tuma kum 3,500 pawl in na gelh hi. Bu tawpna pen tuma kum 1,900 val lai in Johan gelh ahi hi. Lai Siangtho a gelhte in kua deihna tawh at uh ai’tam? Pasian in a kha siangtho zangin a gelh sak hi. (2 Samuel 23:2) Amau ngaihsutnate at lo-in Pasian ngaihsutna tawh at uh hi. Tua ahih manin Lai Siangtho Thuneipa in Jehovah ahi hi.—2 Timoti 3:16; 2 Peter 1:20, 21 na sim in.

Lai Siangtho Thuneipa in kua a hiam? cih video en in

Lai Siangtho in thupiang dingte a kician taka a genkholhna en leng, Pasian kiang pan hi cih kithei hi. Kua mah in mailamthu a kician in genkhol thei lo hi.(Joshua 23:14) Vanglian Pasian bekin mihingte’ mailam thu a kicianin mamuh thei hi.—Isaiah 42:9; 46:10 na sim in.

Pasian kiangpan hongpai laibu ahih teh, a lamdang dingin i lam en hi. Zong lamdang mah hi. Lai Siangtho pen kampau tampi le bu awn tampi-in kihawm khia khin hi. Tangtawng laibu ahih hang science tawh kituak hi. A at mi 40 a phak hang kitukalhna om lo hi. * Tua bek tham loh, Lai Siangtho in Pasian’ itna kician takin honglak a, mite’ nuntaakna a hoih zawin tu ciang dong kikhelsak zo lai hi. Tua hang in Lai Siangtho pen Pasian’ kammal hi cih mi awn tampi te’n thukim hi.—1 Thesalonika 2:13 na sim in.

Lai Siangtho thuman hi, cih bangci theih ding? cih video en in

Lai Siangtho’ thupaipi pen mite a’ding Pasian in it na tawh a ngim a lungdamhuai thu ahi hi. Mihing tangthu a kipata kipan a iplahhuai leitung paradais ah mihingte’n nuntakna thupha bangci mansuah uha, tua pen bangci ngahkik theih ding cihte Lai Siangtho in hong hilhcian hi.—Maangmuhna 21:4, 5 na sim in.

Pasian’ kammal sungah thukhaamte, thubulte leh thuhilhnate kihel hi. Pasian in ama mite tawh bangci kizopna nei cihte zong kihel hi. Hih te’n koi bang Pasian hiam, cih hong thei sak hi. Tua ahih ciangin Lai Siangtho in Pasian na theih na’ng hong huh thei hi. Pasian’ lawm na suah theih na’ng zong hong gencian ding hi.—Late 19:7, 11; James 2:23; 4:8 na sim in.

Hih laibu in Jesuh’ hilh dan mah zang ahi teh, Lai Siangtho na tel na’ng hong huh ding hi. Jesuh in Lai Siangtho munkhat a simkhit ta ciang, “a khiatna” a hilhcian pah hi.—Luka 24:27, 45 na sim in.

Pasian kiangpan hong pai a lungdamhuai thu saang, a zahtaak huai thu om khol lo ding hi. Ahih hang, mi pawlkhat in lungluut khol lo uha, pawlkhat ahih leh nawngkaai sazaw sop uh hi. Amaute hangin lungkia kei in. Nangh ii nuntak tawntung lametna pen Pasian thu bangzaha thei cih tungah kinga hi.—Johan 17:3 na sim in.