Piangsakpa pen ei sang pil zaw hi. Itna nei Pa mah bangin, ei hong don hi. Eima thu suangin ki-uk dingin hong bawl lo hi. (Jeremiah 10:23) Nau pang khat in a nu leh a pate lamlahna a kisap mah bangin, i vekpi-in Pasian lamlahna kisam hi hang. (Isaiah 48:17, 18) Lai Siangtho thubulte in Pasian kiang pan letsong hi a, lamlahna hong pia hi.—2 Timoti 3:16 na sim in.

Jehovah thukham leh thubulte’n tu hun ah ahoih pen nuntak zia leh mailamah tawntung nuntakna i ngah na’ng lampi zong hong hilh hi. Pasian hong bawl i hih teh, ama lamlahnate i zuih ding a thupi pen ahi hi.—Late 19:7, 11; Maangmuhna 4:11 na sim in.

Lai Siangtho thubulte in thuman bulpite hi. A thu tawh kizui-in thukham kikhung zong na om hi. (Thu Hilhkikna 22:8) Thubulte pen a thu tawh kizui-in, i tel theih na’ng eima ngaihsut siamna i zat kul hi. (Paunak 2:10-12) Gentehna ah nuntakna in Pasian kiang pan letsong hi, ci-in Lai Siangtho in hong hilh hi. Hih thubul in nasepna, inn sung leh khual i zin sungin zong lam hong lak thei ahih man in tuahsiatnate pan kidaalna hong pia hi.—Sawltak 17:28 na sim in.

Jesuh in a thupi thubul nih na gen hi. Akhatna ah mihingte nuntakna pen Pasian thei-a it in citaka a na i sep ding ahi hi. Tua thubul masa in thu i khensatna  khempeuhah thu hong ngaihsunsak hi. (Paunak 3:6) Hih thubul tawh kituaka a nungta te in Pasian tawh kilawmta-in, lungnopna leh mailamhunah tawntung nuntakna ngah ding uh hi.—Matthai 22:36-38 na sim in.

A thubul nihna in mi dangte tawh kilem theih nading lam hong lak hi. (1 Korin 13:4-7) Hih thubul nihna na zuih leh Pasian in mite tung, a bawl dan a etteh na suak hi.—Matthai 7:12; 22:39, 40 na sim in.

Lai Siangtho thubulte in itna tawh innkuan kithutuah nading hong hilh hi. (Kolose 3:12-14) Lai Siangtho in kiteenna pen khan tawntung hi ding, cih tua thubul tawh innkuan kipsak hi.—Marka 10:7-9 na sim in.

Lai Siangtho thu hilhte zui le hang neihzah tawh lungkim a, lungdaihna ngah ding hi hang. Gentehna in, mihau te’n a na sem dingin Lai Siangtho thubul a zui, a diktat, nasep a hahkatte a deih uh hi. (Paunak 10:4, 26; Hebru 13:18) Pasian’ kammal in i neihzah tawh lungkimin, neih le lam saangin Pasian tawh kilawmtatna thupi i sak zawk ding hong hilh hi.—Matthai 6:24, 25, 33; 1 Timoti 6:8-10 na sim in.

Lai Siangtho thubulte zuihna-in hong cidamsak thei hi. (Paunak 14:30; 22:24, 25) Gentehna in, Pasian’ thukhamah zu kham ken, cih a gen pen zui le hang tuahsiatna leh natnapite pan hong dal hi. (Paunak 23:20) Jehovah in a khomkhat dawn ding a phal hi. (Late 104:15; 1 Korin 6:10) Pasian’ thubulte in i gamtatna bek hi lo, i ngaihsutnate na ngawnah zong thu hong hilh hi. (Late 119:97-100) Tua i cih hang, Khristian mante in angsungbek khual in Pasian a bia uh hi lo a, Jehovah a pahtawi nopna tawh a sem uh hi.—Matthai 5:14-16 na sim in.