Pasian in amah tawh kinaih theih nading thungen un, ci-in minam khempeuh sungpan mite a sam hi. (Late 65:2) Ahih hang thungetna khempeuh a ngai hi tuan lo hi. Gentehna in, a zi tungah a gilo pasalte’ thungetna ngailo ding hi. (1 Peter 3:7) Gamtat hoihlo a bawlzel Israel mite’ a thungette uh Pasian in na ngailo hi. Mawhna lian a bawlkhak hangin a kisik takpite’ thungetnate na ngaihsak ding hi.—Isaiah 1:15; 55:7 na sim in.

Thungetna khempeuh Pasian in a ngai naa? cih video en in

Thu ngetna pen biakpiakna khat hi. Tua ahih manin ei hong Piangsakpa Jehovah kiang bekah thu i nget ding kilawm hi. (Matthai 4:10; 6:9) Eite kicingtaak lo i hih manin, ih mawhna taangin a hong si Jesuh min tawh thunget ding a kul hi. (Johan 14:6) Lotngahsa khat ahihkeileh a kigelhsa khat leh lawh kikkik a, thungette Jehovah in a deih kei hi. I lungsim pana thungetna bek a deih hi.—Matthai 6:7; Filippi 4:6, 7 na sim in.

Jehovah in awging lo-in, thungetnate zong na za hi. (1 Samuel 1:12, 13) Hun sim in thu i nget ding Pasian in hong zawn a, zingsang nitaak, annek huna kipan haksatnate i tuah ciang zong kingen thei hi.—Late 55:22; Matthai 15:36 na sim in.

Pasian tawh i kinaih ding ol lo hi. A hang pen Pasian a umlote leh leitungah kilemna om ding cih Pasian’ kamciam a zahbawlte lakah i nungta hi. (2 Timoti 3:1, 4; 2 Peter 3:3, 13) Tua ahih ciang thu uppihte tawh kituah in, khat le khat tha kipiak ding kisam hi.—Hebru 10:24, 25 na sim in.

 Pasian a it mite tawh kikhawl leng Pasian tawh i kinai ding hi. Jehovah Tecite’ kikhopnate ah mite’ upna i muhna pan hamphatna hong ngahsak hi.—Rom 1:11, 12 na sim in.

Ama thu na sinte thuuk tak in ngaihsun le cin Jehovah tawh kinai thei hi teh. Pasian’ septe, thuhilhnate leh a ciamsate nakpitakin ngaihsun in. Thungetna tawh thuuk taka ngaihsun le hang i lungsimah Pasian itna le pilna te hong khangto ding hi.—Joshua 1:8; Late 1:1-3 na sim in.

Pasian pen umin na muang le bek Pasian tawh kinai thei ding hi teh. Ahih hang upna pen ekleiza piak zel ding a kisam singno tawh kibang hi. Tua mah bangin na upsate ngaihsunkik zel le cin, na upnate hong khauh ding hi.—Matthai 4:4; Hebru 11:1, 6 na sim in.

Jehovah in amah a it mite a don hi. Amau upna leh a tawntunga nuntak nading lametna, a nawngkaaisak khat peuhpeuh panin Pasian in dalsak thei hi. (Late 91:1, 2, 7-10) I cidamna leh lungnopna hong kisiasak gamtat dante zuih loh ding Pasian in vauna hong pia hi. A hoih peenin nuntaak zia zong hong hilh hi.—Late 73:27, 28; James 4:4, 8 na sim in.