Mawũã ẽ. Daizeze Bedʼeabara jarabʉ naʉ̃ drʉade jõma parãbʉra Jeowaba odata, ẽbẽrata, nedʉwʉrʉrata akʉza bakururata (Génesis 1:12, 21, 25, 27; Apocalipsis 4:11). Akʉza jarabʉ ẽbẽrarã jõma naʉ̃ drʉadebʉra Adán akʉza Evadeba zedata (Génesis 3:20; 4:1). Mamina Daizeze Bedʼeabara jara ẽ Daizezebara ebolusionta zokʼasita jõma naʉ̃ drʉadebʉta parãita. Akʉza Daizeze Bedʼeabara jara ẽ ewari berabari wãne naʉ̃ drʉade jõma panãbʉra wĩña wĩñane awuara wãseabʉta. a

• ¿Kʼãrẽta krĩchapanʉ ʉ̃kʉrʉ ẽbẽrarãbara?

• ¿Daizeze Bedʼeabara naʉ̃ drʉade jõma parãbʉra, doba zedata jarabʉka?

• ¿Jõma naʉ̃ drʉa parãbʉta ewari berabari wãne wiña wiñane awuara wãbʉrʉ, maʉ̃ba jarakĩrãkʉka ebolusioneba zedata?

 «Ebolusion teística» bedʼeabara nekʼãrẽ bio jarabʉ. Encyclopædia Britannica libroba jarabʉ: «Daizezebara jõma naʉ̃ drʉade parãbʉ oira ebolusionta zokʼasita».

 Ʉ̃kʉrʉba krĩchapanʉta ebolusion teística ʉ̃rʉ:

•   Jõma nama zokʼaipanʉrãra iabaʉdeba zedata.

•   Nedʉwʉrʉrata, ẽbẽrarãta akʉza bakururata ewari berabari wãne, wiña wiñane jipa awuara totobʉta. Maʉ̃ta jarapanʉ makroebolusion.

•   Kʼawuada ẽ mina sãwũã zedata, Daizezeba maʉ̃ta jõma zokʼabʉta.

 Ebolusion teística wãrĩnu basibʉrʉ, Génesisba jarabʉra sewanẽbʉra bakasi. Mamina Jesu nama egoroeda zeside, Génesisde jarabʉra jarasi jipa wãrĩnuta (Génesis 1:26, 27; 2:18-24; Mateo 19:4-6). Akʉza Daizeze Bedʼeabara jarabʉ Jesu ʉ̃tʉ yi Zezeʉ̃me basidera nejõma parãita kʼarebasita (Juan 1:3). Maʉ̃ kʼarea, naʉ̃ drʉade jõma parãbʉta doba zesida apanʉira Daizeze Bedʼeabara jipa awuara jarabʉ.

 Daizeze Bedʼeabara jara ẽ nedʉwʉrʉrata, bakururata naʉ̃ drʉa jõma parãbʉta wiña wiñane awuarabaita akʉza jara ẽ maʉ̃ra berabari ẽãta. Naʉ̃ drʉa jõma parãbʉra wiña wiñane awuara baseabʉmina jarakĩrãku ẽ ebolusioneba zesita, nedʉwʉrʉra awuru nedʉwʉrʉ kĩrãkʼa batoto ẽ baera.