Daizezebara jõma akʉseabʉ akʉza iya baduta oseabʉ badumae (Proverbios 15:3; Hebreos 4:13). Mamina Daizeze Bedʼeabara jara ẽ iyira badumae bʉta, awuarabʉrʉ iyira de barachuta.

•   ¿Sãwũãchu Daizezera? Iyira jaurede bʉ (Juan 4:​24). Maʉ̃ba mia abaʉba ũdudaka (Juan 1:18). Daizeze Bedʼeadera ẽbẽrarãbawara bedʼeasidera iyi sãwũãchu ʉ̃rʉ jara ẽ basi iyira badumae bʉta, awuarabʉrʉ de barabʉta (Isaías 6:1, 2; Apocalipsis 4:2, 3, 8).

•   ¿Samachu Daizezera? Daizeze Bedʼeabara jarabʉ Daizezera de barachuta ʉ̃tʉ, maʉ̃bara jarakĩrãbʉ Daizezera bʉ ẽãta chĩdauranʉmʉmae, mawũã ẽ bʉrʉ nama egorode, awuarabʉrʉ ʉ̃tʉ bajãne (1 Reyes 8:30). Daizeze Bedʼeabara jarabʉ angelerãra wãsidata Daizeze chuidu,  a maʉ̃bara jarakĩrãbʉ Daizezera de barachuta (Job 1:6).

¿Daizezebara kʼarebaseabʉka mʉ̃ra, iyira badumae bʉ ẽ bʉrʉ?

 Kʼarebaseabʉ, Daizezera miõba ũdudakamae bʉmina iyara ẽbẽrarã krĩchabʉ, iyara krĩchabʉ ẽbẽrarã iya jarabʉta opanʉ ʉ̃rʉra, maʉ̃ba kʼarebakĩrãbʉ (1 Reyes 8:39; 2 Crónicas 16:9). ¿Sãwũã ũdubibʉ iya dayirã ʉ̃rʉ krĩchabʉta akʉza kʼarebakĩrãbʉta?

•   Dayirã yiwidʼibʉde: Jeowabara aramaʉ̃ta ũrĩbʉ dayirã iyaʼa yiwidʼibʉrʉdera (2 Crónicas 18:31).

•   Dayirã kãbãẽã sopʉabʉde: «Jeowara bʉ yi jipa sopʉapanʉra kʼawa; kʼarebabʉ yi jipa kʼãrẽ ẽ kĩrãkʼa krĩchapanʉrãra» (Salmo 34:18).

•   Daya kʼawua ẽãne kʼãrẽta oita: Iyi Bedʼeadeba Jeowabara dayirã jaradiabʉ kʼãrẽta odaibarata akʉza jaradiabʉ «kʼãrẽ ode wãita» (Salmo 32:8).

Ẽbẽrarãba aña krĩchapanʉta Daizezera badumae bʉ ʉ̃rʉ

 Ʉ̃kʉrʉba krĩchapanʉta: Salmo 139:8bara jarabʉ Daizezera badumae bʉta, jarabʉ baera: «Mʉ̃ta bajãena wãrezera bʉsida mainʉ bayi, akʉza mʉ̃ta zobeade eda wuagadara mainʉbida bayi bʉra».

 Wãrĩnuta: Naʉ̃ testobara jarakĩrãbʉ Daizezebara dayirarã kʼarebaseabʉta krĩcha ẽã samapanʉta.