¿Sãwũã Jesubara iyi beidadeba ẽbẽrarã mejãchaʉta ẽdrʉbisi?

Bed’eabira

Daizeze Bedʼeaba panʉbʉ

Jesús beidaba Daizezebara dayirãra ẽdrʉbibʉ nekayiruadeba akʉza beideba. Daizeze Bedʼeaba jarabʉ Jesús kʼãwũã dayirã kʼarea wua zarradaba ũdubibʉta dayirã ẽdrʉbibʉta (Efesios 1:7; 1 Pedro 1:18, 19). Jesúsba jarasi naʉ̃ta iyi ʉ̃rʉ: «Zesi wuabemara akʉita akʉza iyi bebʉ diaita wuabemara ẽdrʉbita» (Mateo 20:28).

¿Kʼãrẽa nesidapanasi ẽbẽrarã mejãchaʉta ẽdrʉdamarẽã?

Yumakẽrã nããra parãnapeadara Adánʼra jipa nekayirua okabasi, iyira ewari jõmaʉ̃nẽ baseabasi, mamina Daizeze bedʼeata ũrĩ ẽ basi baera beibarita besi (Génesis 3:17-19). Iyi wũãwũã baraside yi wũãwũãrasida nekayiruabara zesi abarika (Romanos 5:12). Daizeze Bedʼeaba jarabʉ Adánbara yi wũãwũãrãra nekayiruabara amaesita (Romanos 7:14). Mawũẽra jõmaʉ̃ta nekayirua omiabasi baera Adánba aduadara miõba ara obe ẽ basi (Salmo 49:7, 8).

Daizezebara so borekea akʉsi ẽbẽrarã Adánʼneba zedarãra, kʼaiba ẽdrʉbita neẽ basi baera (Juan 3:16). Jeowabara jõma aripe obʉ baera, Adánba kʼãwũã odara bari kʼãrẽ ẽ kĩrãkʼa akʉ ẽ basi (Salmo 89:14; Romanos 3:23-26). Jeowaba ẽbẽrarãta kãga baera iyara osi maʉ̃ nekayirua ẽbẽrarãba erbʉta neẽ bamarẽã akʉza jipa kĩrãduadamarẽã (Romanos 5:6-8). Jeowaba ẽbẽrarã kʼãwũã ẽdrʉbidadeba ũdubibʉ iyara jõma aripe obʉta.

¿Kʼãrẽta jarakĩrãbʉ dayirã ẽdrʉbibara?

Daizeze Bedʼeaba maʉ̃ ʉ̃rʉ jaraita nekʼãrẽ ũbea zokʼabʉ:

Daya plata debe pagai kĩrãkʼabʉ (Números 3:46, 47).
Ẽdrʉbita (Éxodo 21:30).
Abarika dauchabʉta diaibara. a

Atia akʉdayi kʼãwũã Jesús beidaba naʉ̃ra ũbea jarabʉta.

Daya plata debe pagai kĩrãkʼabʉ. Daizeze Bedʼeaba jarabʉ dayirãra edasidata ẽbẽra abaʉba iya plata diai kĩrãkʼa edabʉrʉde (1 Corintios 6:20; 7:23). Jesús wara maʉ̃ plata pagai kĩrãkʼabasi. Mawũã Jeowaba pʉwʉrʉ awuara awuarakadebemata, tribu awuara awuarakadebemata akʉza bedʼea awuara awuarakadebemata ẽdrʉbisi (Apocalipsis 5:8, 9).
Ẽdrʉbita. Jesús beidaba dayirãra ẽdrʉbibʉ nekayiruadeba (1 Corintios 1:30; Colosenses 1:14; Hebreos 9:15).
Abarika dauchabʉta diaibara. Jesús beidara abarikabasi Adánba aduadata, ¿kʼãrẽta aduasi Adánbara? Iyara aduasi ewari jõmaʉ̃nẽ bʼaita (1 Corintios 15:21, 22, 45, 46). Daizeze Bedʼeaba jarabʉ: «Yumakẽrã abaʉba ũrĩ ẽ basi baera ẽbẽra jõmaʉ̃ta nekayirua omia, maʉ̃ kĩrãkʼa yumakẽrã abaʉba ũrĩsi baera jõmaʉ̃ta ẽbẽra biabayi» (Romanos 5:19). Naʉ̃ba ũdubibʉ kʼãrẽa ẽbẽra abaʉdeba ẽbẽrarã mejãchaʉta ẽdrʉbiseabʉta. Jesús beidaba dayirã mejãcha kʼarebabʉ nekʼãrẽ bia obʉbʉrʉ maʉ̃ nebiata ũduita (1 Timoteo 2:5, 6).

a Daizeze Bedʼeade ẽdrʉbi bedʼeabara jarakĩrãbʉ plata pagai kĩrãkʼa. Hebreo bedʼeaderabʉ bedʼea ka·pharʹ, maʉ̃ bedʼea jarakĩrãbʉ anaita (Génesis 6:14). Naʉ̃bara jarakĩrãbʉ nekayiruaba dayirã anabʉ kĩrãkʼabʉ (Salmo 65:3). Bʉ awuru bedʼea koʹpher, maʉ̃bara jarakĩrãbʉ plata pagaita mawũã ẽdrʉbita (Éxodo 21:30). Akʉza griego bedʼeadebʉ bedʼea lyʹtron, maʉ̃bara jarakĩrãbʉ ẽdrʉbita akʉza jarakĩrãbʉ nekʼãrẽ pagaita mawũã ẽdrʉbita (Mateo 20:28). Ẽbẽrarã bʉbari griegora kʼawuapanʉraba zokʼabasi naʉ̃ bedʼeata jaraita pagaibarabasita, mawũã nezokʼa ẽdrʉbita.