Daizeze Bedʼeaba panʉbʉ

 Buru kʼoeibara jarakĩrãbʉ jõma joaedaita doeda. a Daizeze Bedʼeadera mejãchabʉ buru kʼoeda ʉ̃rʉ (Hechos 2:41). Maʉ̃rane edabʉ Jesúsdeta, iyira joaedasida do Jordánʼne (Mateo 3:13, 16). Poaga bio berabarida tẽã yumakẽrã Etiopíadebemasi, buru kʼoesi bania iyi wã ode badamae (Hechos 8:36-40).

 Jesúsba jaradiasi ẽbẽra aba iyi kʼaidubema bakĩrãbasibʉrʉ buru kʼoeibarata (Mateo 28:19, 20). Pedroba jarasi maʉ̃ra wãrĩnuta (1 Pedro 3:21).

Naʉ̃ artikulode naʉ̃ta akʉdayi:

•  ¿Kʼãrẽta jarakĩrãbʉ buru kʼoeibara?

•  ¿Daizeze Bedʼeabara jaradiabʉka wũãwũã zakerãra buru kʼoeibarata?

•  ¿Kʼãrẽta jarakĩrãbʉ buru kʼoeita Daizeze trʉ̃ne, yi warra trʉ̃ne akʉza jaure bia trʉ̃ne?

•  ¿Nekayiruaka jẽda buru kʼoeira?

•  Daizeze Bedʼeade jarabʉ ʉ̃kʉrʉ buru kʼoeda ʉ̃rʉ

•  Ẽbẽrarãba aña krĩchabʉta buru kʼoei ʉ̃rʉ

 ¿Kʼãrẽta jarakĩrãbʉ buru kʼoeibara?

 Buru kʼoebʉrʉba ũdubibʉ ẽbẽra abaʉba iya kayirua obadara idubʉsita, mawũã Jeowaba jarabʉde bʼaita. Maʉ̃ba jarakĩrãbʉ oibarata Jeowaba kãgabʉta akʉza Jesúsba kãgabʉta iyi bebʉde. Ẽbẽrarãta ewari jõmaʉ̃nẽ bakĩrãbʉbʉrʉ, nãã buru kʼoeibara.

 Baniane joaedaira jarakĩrãbʉ kĩrãkʼabʉ yi ẽbẽra bebʉ awuara bʼaita. Daizeze Bedʼeaba jarabʉ buru kʼoebʉrʉdera, joubʉda kĩrãkʼabʉta (Romanos 6:4; Colosenses 2:12). Baniane joaedabʉdadera maʉ̃ ẽbẽrarã beibʉ kĩrãkʼabʉ ũdubi baera iya nãã obadara jõma idubʉita. Banianeba ãĩ wãbʉdadera maʉ̃ ẽbẽrarã jẽda bida kĩrãkʼabʉ iya oi baera Daizezeba jarabʉtrʉ.

 ¿Daizeze Bedʼeabara jaradiabʉka wũãwũã zakerãra buru kʼoeibarata?

 Daizeze Bedʼeaba jarabʉ wũãwũã zakerãra buru kʼoebe ẽãta. b Awuarabʉrʉ jaradiabʉ buru kʼoei nãã nekʼãrẽ oibarata. Nããra kʼawuaibara Daizeze Bedʼeaba jarabʉta akʉza oibara. Akʉza jẽda krĩchaibara wua nekayirua oẽ baita, adewara Daizezeʼa jaraibara dayi bebʉ iyaʼa diakĩrãbʉta (Hechos 2:38, 41; 8:12). Wũãwũãraba akʉza wũãwũã zakeraba, maʉ̃ra obe ẽ wikakide baera.

 ¿Kʼãrẽta jarakĩrãbʉ buru kʼoeita Daizeze trʉ̃ne, yi warra trʉ̃ne akʉza jaure bia trʉ̃ne?

 Jesúsba iyi kʼaidubemara maʉ̃ta omarẽã jarasi: .«Mʉ̃nebemata ĩjãnamarẽã jaraidua [...]. Buru kʼoeidua Daizeze trʉ̃ne, yi Warra trʉ̃ne, jaure bia trʉ̃ne. Jaradiaidua jõma odamarẽã mʉ̃a zokʼadata» (Mateo 28:19, 20). Buru kʼoeita trʉ̃neba jarakĩrãbʉ kʼawuabʉta Jeowaba zokʼabʉta akʉza Jesúsʼra yi warrata, adewara kʼawuabʉta saʉ̃ta jaure biara. Apostol Pedroba iya bebiside yumakẽrã nʉ̃kadrʉ badata, iya maʉ̃ne jarasi: trʉ̃neba. Iya jarasi: «Jesucristo Nazaredʼebema trʉ̃neba piradrʉpe nimibarua» (Hechos 3:6). ¿Kʼãrẽa Pedrobara naʉ̃ bedʼeata zokʼasi? Iyara kʼawuabasi kʼaita Jesústa akʉza kʼawuabasi Jesúsʼra zarea barachuta, adewara iya kʼawuabasi maʉ̃ra iya osita Jesús kʼarebadeba.

•   Zezera Jeowa. c Iya parãsi dayirãra, mawũã bebʉta diasi dayirã. Iyira nejõma oseabʉ. Maʉ̃ba iyabʉrʉ jõma zokʼaseabʉ (Génesis 17:1; Apocalipsis 4:11).

•   Yi Warra Jesús, dayirãbari beida (Romanos 6:23). Dayirã ẽdrʉita biʼia kʼawuaibara Jesúsba sãwũã kʼarebabʉta Jeowaba kãgabʉ berabarimarẽã (Juan 14:6; 20:31; Hechos 4:8-12).

•   Jaure bia. Maʉ̃bara jarakĩrãbʉ Daizeze zareata. Iya maʉ̃ zareara zokʼabʉ nekʼãrẽ obʉde. d Daizezeba jaure biara zokʼasi bebʉ babita, bedʼeaita propetarabawara akʉza awurura ẽbẽrarãbawara, adewara diasi ʉ̃kʉrʉ ẽbẽra jaure biata iya kãgabʉta omarẽã (Génesis 1:2; Job 33:4; Romanos 15:18, 19). Adewara iya zokʼasi jaure biara ʉ̃kʉrʉ yumakẽrãraba iyi bedʼeata bʉdamarẽã (2 Pedro 1:21).

 ¿Nekayiruaka jẽda buru kʼoeira?

 Ẽbẽrarã mejãchaʉba edaʉde awuru religionta jʉrʉpanʉ. Mamina iyita buru kʼoebarisibʉrʉ maʉ̃ religione, iyi awuru religionʼena wãbʉrʉdera, ¿jẽda buru kʼoeseabʉka? Mawũã ẽ bʉrʉ, ¿maʉ̃ oira kayiruaka? Ʉ̃kʉrʉba jaraseapanʉ maʉ̃ra kayiruata Efesios 4:5ba jarabʉta aña ũrĩpanʉ baera, nama jarabʉ: «Señor aba, ĩjã aba, buru kʼoema aba». Naʉ̃ bersikuloba jarabʉdera jarakĩrãbʉ ẽ ẽbẽrarãra jẽda buru kʼoe ẽãta, ¿kʼãrẽa maʉ̃ta jarapanʉ?

 Bedʼea nãã akʉza maʉ̃arebʉta. Efesios 4:5de bedʼea nãã testoba jarabʉ: Pablora bedʼeabasita ãba bʼai ʉ̃rʉ. Kristianora wãrĩnuarabara iyabaʉta ĩjãbaibarata (Efesios 4:1-3, 16). Jõma ãba bʼaira nesidapanʉ. Jesús kʼaidu babari bʼaita akʉza iyabaʉta ĩjãita (maʉ̃ba jarakĩrãbʉ ũrĩnaibarata Daizeze Bedʼeaba jarabʉra) akʉza Daizeze Bedʼeaba jarabʉta oibara buru kʼoe zeita.

 Maʉ̃ne akʉza Pablobara jarabarisi ʉ̃kʉrʉ ẽbẽrarã jẽda buru kʼoe zedamarẽã. Ãya naweda ũrĩna ẽ basi baera bia Daizeze Bedʼeata (Hechos 19:1-5).

 Daizezeba buru kʼoeda bia akʉbʉta. Daizezeba ẽbẽra buru kʼoedata bia akʉmarẽãra, biʼia ũdukʼawuabaibara Daizeze Bedʼeata (1 Timoteo 2:3, 4). Religion abaʉba Daizeze Bedʼea ʉ̃rʉ jaradiabʉta aña jaradiabasibʉrʉ, maʉ̃ne ẽbẽrata buru kʼoe zesibʉrʉ, maʉ̃ buru kʼoedara Daizezebara bia akʉ ẽ basi (Juan 4:23, 24). Maʉ̃ ẽbẽra soiduba buru kʼoe zesimina, iyara bia kʼawua ẽ basi Daizeze Bedʼea ʉ̃rʉra (Romanos 10:2). Daizezeba maʉ̃ ẽbẽra buru kʼoeda bia akʉmarẽãra, nebiata jẽda kʼawuaibara Daizeze Bedʼea ʉ̃rʉ akʉza oũdubibara iya nekʼãrẽ obʉde, adewara iyi bebʉ diaibara Daizezeʼa akʉza jẽda buru kʼoe zeibara. Maʉ̃ne iyita jẽda buru kʼoe zera nekayirua ẽ, awuarabʉrʉ bigabayi jẽda maʉ̃ta ora.

 Daizeze Bedʼeade jarabʉ ʉ̃kʉrʉ buru kʼoeda ʉ̃rʉ

 Daizeze Bedʼeabara jarabʉ Jesús kʼaidubemaraba ẽbẽrarã buru kʼoesida doeda jõma joaedasidade akʉza jarabʉ awurura buru kʼoedarasida. Maʉ̃rãra, ¿kʼãrẽne awuarabasi? Maʉ̃ta akʉdaya:

 Juanba buru kʼoebibadata. e Judiorata akʉza judiora ba zedata, wãpanasi Juanʼinʉ buru kʼoebimarẽã. Maʉ̃ra opanasi ãyira sopʉabasi ley Daizezeba Moisésʼa diadata oẽbasi baera. Juanba kʼãwũã buru kʼoebidaba kʼarebasi ẽbẽrarãba kʼawuadamarẽã Jesúsʼra Dayirã ẽdrʉbibarita (Lucas 1:13-17; 3:2, 3; Hechos 19:4).

 Jesús buru kʼoedata. Juanba Jesús buru kʼoebisi, mamina naʉ̃ buru kʼoedara wuabemaraneira jipa awuarabasi, ¿kʼãrẽa? Jesúsʼra nekayiruata okabasi (1 Pedro 2:21, 22). Mawũã iyira buru kʼoe ẽ basi sopʉabasi baera nekayirua oda kʼarea (1 Pedro 3:21). Awuarabʉrʉ iyira buru kʼoesi Jeowaba kãgabʉ ozeita. Jeowabara kãgabasi Jesúsʼra Dayirã ẽdrʉbibari bamarẽã, maʉ̃ oita beibarabasi dayirãbari (Hebreos 10:7-10).

 Buru kʼoeita jaure zareaba. Juan buru kʼoebibadata Jesúsʼʉ̃mera bedʼeasida buru kʼoeita jaure zareaba (Mateo 3:11; Lucas 3:16; Hechos 1:1-5). Buru kʼoeita jaure zareaba iyabaʉ ẽ buru kʼoeita jaure bia trʉ̃neba (Mateo 28:19). ¿Kʼãrẽa mawũãbʉ?

 Jesús kʼaidupanʉra wikabʉta buru kʼoema jaure zareaba, maʉ̃ba jarakĩrãbʉ Daizezebara maʉ̃ra ẽbẽrarã wikapanʉra ʉ̃rʉ zebibʉ iyi jaure zareata, mawũã ʉ̃ta wãnamarẽã akʉza Jesúsʼʉ̃meba zokʼamarẽã, adewara saserdotera bamarẽã naʉ̃ drʉa ʉ̃rʉ f (1 Pedro 1:3, 4; Apocalipsis 5:9, 10). Akʉza, ¿kʼairata zokʼai maʉ̃ra ʉ̃ta wãirabara? Maʉ̃rabara zokʼayi ẽbẽrarã nama ẽjũã kĩrãwãreãnẽ bʼairata. Maʉ̃rasida Jesús kʼaidubemara (Mateo 5:5; Lucas 23:43).

 Buru kʼoedata Kristo Jesúsde akʉza buru kʼoedata iyi beibʉde. Jaure zareadeba maʉ̃sida Jesúsdeba buru kʼoeda (Romanos 6:3). Yi ẽbẽrarã Jesús kʼaidu ʉ̃tʉ zokʼairatrʉ, buru kʼoebʉ Jesúsdeba. Maʉ̃ra ʉ̃ta wãita jidasida baera atiara Jesús iyi buru akʉza yi ʉ̃ta wãirata yi kakua (1 Corintios 12:12, 13, 27; Colosenses 1:18).

 Yi ʉ̃ta wãirãra buru kʼoesi Jesús beibʉde (Romanos 6:3, 4). Abarika Jesúsde kĩrãkʼa ãyabida zarea obʉ Daizezeba jarabʉ ũrĩta, adewara krĩcha ẽ naʉ̃ drʉade ewari jõmaʉ̃nẽ bʼaita. Ãyi beibʉrʉde akʉza jẽda piradrʉbʉrʉde jaurede ʉ̃ta wãita, maʉ̃ra jipabʉ buru kʼoeda kĩrãkʼa Jesús beibʉde (Romanos 6:5; 1 Corintios 15:42-44).

 Buru kʼoeita tʉbʉba. Juan buru kʼoebibadaba jarasi Jesúsbara buru kʼoebibasita iyi kʼaidupanʉrãra jaure zareaba akʉza tʉbʉ pʉreaba, adewara jarasi: «Trigo ezoabarira izhi juwuadʼe erubʼʉa, trigora ezoape zhi tara zhi wuagʼabari maẽ wuagʼaya, mawũãmina zhi kʼãbʉra baya tebʉ kikʼata nʉmʉne» (Mateo 3:11, 12). Naʉ̃ bedʼeaba ũdubibʉ tʉbʉ pʉreaba buru kʼoeita akʉza jaure zareaba buru kʼoeira, awuarabʉta. Maʉ̃bara Juanbara, ¿kʼãrẽta jarakĩrãbasi?

 Trigobara jarakĩrãbʉ ẽbẽrarã Jesús bedʼea ũrĩbʉrata, naʉ̃rãra buru kʼoepanʉ jaure zareaba, waya yi jobara jarakĩrãbʉ Jesús bedʼea ũrĩ ẽã bʉrata. Maʉ̃rãra buru kʼoeita tʉbʉ pʉreaba maʉ̃ra jarakĩrãbʉ ãyira makenanañi (Mateo 3:7-12; Lucas 3:16, 17).