Nekayiruara jarakĩrãbʉ oita akʉza krĩchaita, Jeowaba kãga ẽãta (1 Juan 3:4; 5:17). Adewara Daizeze Bedʼeaba jarabʉ: «Mawũẽra abaʉba kʼawuabʉbʉrʉ kʼãrẽ nebiata mawũãsidu oẽ bʉrʉ, nekayiruata obʉ» (Santiago 4:17).

 Daizeze Bedʼeara bʉkata bʉsidera, bʉsida ebreo bedʼeade akʉza griego bedʼeade, maʉ̃ra bedʼeadera bedʼea «nekayiruara» jarakĩrãbʉ batabʉrʉde aripe oẽãta. Bari jaradaita, Israel pʉwʉrʉdera ʉ̃kʉrʉ gorogororaba bia bata kʼawuabasi kaucherãra, maʉ̃ba bʉdama batabasidera aripe batabasi, maʉ̃ bedʼeabida jarakĩrãbʉ: «nekayirua oẽãta» (Jueces 20:16). Maʉ̃ba bedʼea nekayiruara jarakĩrãbʉ: aripe oẽãta Daizezeba jarabʉta.

 Daizezeba dayirãta parãsi baera iya jaradiaseabʉ, kʼãrẽta oseabʉta akʉza kʼãrẽta obe ẽãta (Apocalipsis 4:11). Daizezebara akʉyi dayirãba nekʼãrẽ obadara bia osi kʼawuaita, mawũã ẽ bʉrʉ aña osi kʼawuaita (Romanos 14:12).

¿Bʉka ẽbẽra jipa nekayirua okara?

 Mawũã ẽ. Nama Daizeze Bedʼeaba jarabʉ: «Jõmaʉ̃ta nekayirua omia baera Daizeze kʼawa babe ẽ kĩrãkʼabʉ» (Romanos 3:​23; 1 Reyes 8:​46; Eclesiastés 7:​20; 1 Juan 1:8). ¿Kʼãrẽa maʉ̃ta berabaribʉ?

 Daizezeba Adán Evaʉ̃me parãsidera parãsi iyi kĩrãkʼa, maʉ̃ba nekayirua okabasi (Génesis 1:​27). Mamina Daizeze Bedʼea wua ũrĩ ẽ basidera ãyara nekayiruata ojʉ̃drʉsi (Génesis 3:​5, 6, 17-​19). Maʉ̃ kʼarea ãyi wũãwũã barasidera yi wũãwũãrasida abarika nekayiruabara ʉ̃tʉ zesi. Bari jaraita yibari abaʉdebemata kayabʉbʉrʉ yi wũãwũã tobʉdasida abarikʼa kaya ʉ̃tʉ zeyi, maʉ̃ kĩrãkʼa berabarisi Adán Evaʉ̃me wũãwũã barasidade (Romanos 5:​12). Nokʼo Davidba jarada kĩrãkʼa: «Mʉ̃ papaba mʉ̃ra nemitia obarita tosi» (Salmo 51:5).

¿Chʉka nekayirua audre nemitiara?

 Chʉ. Daizeze Bedʼeaba jarabʉ yumakẽrãra Sodomanebemarãra jipa kayirua omiabasi akʉza ãya nemitiata mejãcha opanasi (Génesis 13:13; 18:20). ¿Sãwũã kʼawuaseapanʉ nekayiruara jipa nekayirua zromata? Maʉ̃ ʉ̃rʉ kʼawuadrʉ.

1.   Kʼãrẽaba kayirua osi. Daizeze Bedʼeaba jarabʉ nekayirua zromara naʉ̃rata: ãba kʼãĩta juwa jida ẽ nãã, daizeze zeri ẽã yiwidʼita, nezrʉgaita, jipa kĩrãpʉrra bʼaita beita, mia beaita, jaibanaena wãita akʉza wuabemara nekʼãrẽ widita mawũã ãyi nekayirua oẽ baita, maʉ̃ kʼarea maʉ̃ nekayirua zromara oẽ baibara (1 Corintios 6:​9-​11; Apocalipsis 21:8). Mamina Daizeze Bedʼeaba jarabʉ bʉta nekayirua daya kʼawua ẽ nãã oseabʉta. Bari jaradaita daya ẽbẽra abaʉta daya kʼawua ẽ nãã sopʉabiseabʉ daya jarabʉdeba, mawũã ẽ bʉrʉ daya obʉdeba, mamina naʉ̃ra nekayiruamina jipa nekayirua zroma ẽ, nawedabema bedʼea jaradaira (Proverbios 12:18; Efesios 4:​31, 32). Mamina dayirãba nekayirua zaketa kʼãrẽ ẽ kĩrãkʼa akʉpanʉbʉrʉ mawũãra nekayirua zromasida ozeseabʉ, maʉ̃ kʼarea zarea odaibara nekʼayirua zromata akʉza nekayirua zaketa oẽ baita (Mateo 5:​27, 28).

2.   ¿Kʼãrẽa obʉ? Ʉ̃kʉrʉ nekayiruara opanʉ ẽbẽrarãbara kʼawua ẽ baera Daizezeba oẽ bamarẽã zokʼabʉta (Hechos 17:30; 1 Timoteo 1:​13). Daizeze Bedʼeabara jarabʉ ẽbẽra abaʉba iya kʼawua ẽ nãã nekayiruata osibʉrʉ, awuarabʉta iya kʼawuachʉde nekayirua odaira. Mamina Daizeze Bedʼeabara jarabʉ ẽbẽra abaʉba kʼawua ẽ mina iya nekayirua obʉta, maʉ̃ nekayiruara Daizezebara kʼãrẽ ẽ kĩrãkʼa akʉ ẽ (Números 15:30, 31). Daizeze Bedʼeaba jarabʉ ẽbẽra abaʉba kʼau chʉde kriña nemitiata obʉbʉrʉ, maʉ̃ ẽbẽrarã jipa so kayiruata (Jeremías 16:12).

3.   ¿Badua obʉka mawũã ẽ bʉrʉ edaʉde obʉka? Daizeze Bedʼeaba jarabʉ ẽbẽra abaʉba ewari aba nekayiruata ora awuarabʉta ẽbẽra abaʉba badua nekayirua obʉmera (1 Juan 3:​4-8). Ẽbẽra abaʉba kʼau chʉde iya obʉra nekayiruata maʉ̃ne ariya obʉbʉrʉ, maʉ̃ra Daizezebara makenañi (Hebreos 10:26, 27).

 Ẽbẽrarã ãya naweda nekayirua obada kʼarea mejãcha sopʉabʉbaibara. Bari jaradaita, nokʼo Davidba naʉ̃ta bʉsi: «Mʉ̃ã aña odara waidide mʉ̃ burudebʉ, mʉ̃itara nezʉgʉa kĩrãkʼabʉ, zʉgʉ jipa» (Salmo 38:4). Mawũãsidu Daizeze Bedʼeaba naʉ̃ bedʼeata jarabʉ, jari ẽbẽrarã sopʉabʉ kʼarea ãya naweda nekayirua oda kʼarea: «Ẽbẽra kayiruabara idubʉibara iyi ora akʉza ẽbẽra kayiruabara idubʉibara krĩcha kayiruara, jẽda zeibara Jeowama, iya so zʉbʉria akʉi baera akʉza iya biode kĩrãduabʉ baera iyi kayiruara» (Isaías 55:7).