Dai Jeowa ʉ̃rʉ Kʼawuabipanʉrãbara zokʼa zebʉrʉ Daizeze Bedʼea tradusionta awuara awuaraka. Mamina audre akʉkĩrãpanʉ Traducción del Nuevo Mundo, bedʼea awuara awuarakadebʉta. Maʉ̃ba Daizeze trʉ̃arata abʉ baera akʉza aripe jara ũrĩbibʉ baera adewara ẽza jara ũrĩbibʉ baera.

•   Daizeze trʉ̃arata abʉ. Ʉ̃kʉrʉ ẽbẽrarã Daizeze Bedʼea opanʉrabara wawiada ẽ Daizeze trʉ̃ra. Bari jaraita, tradusion Daizeze Bedʼea abaʉde ẽbẽrarã 70 trʉ̃ Daizeze Bedʼea kʼareba odata eda abʉ, mamina neẽ Daizeze trʉ̃arãra: Jeowa.

   Traducción del Nuevo Mundo,naʉ̃ Daizeze Bedʼeadera Daizeze trʉ̃ta eda abʉ naweda iyi Daizeze Bedʼea nããrabema abada kĩrãkʼa adewara kʼairaba oda trʉ̃ra eda neẽ.

•   Aripe jara ũrĩbibʉ. Ʉ̃kʉrʉ tradusion Daizeze Bedʼeaba aripe jara ũrĩbi ẽ Daizeze Bedʼea nããrabemaba jarabada kĩrãkʼa. Bari jaraita, tradusion abaʉde Mateo 5:22ba jarabʉ: «Iabʼaʉba zhi mebeata ikʼazhirua jarabʉrʉra wãbidʼaya tebʉ pureadʼe». Mamina, Daizeze Bedʼea nããrabemaba jara ẽ basi «tebʉ pʉreade», awuarabʉrʉ jarasi «Gehena». Ʉ̃kʉrʉ Daizeze Bedʼea tradusipananabara ĩjãpanasi ẽbẽra kayiruarãra tʉbʉ pʉreade ewari jõmaʉ̃nẽ wãita, maʉ̃ kʼarea mawũã bʉsida. Mamina Daizeze Bedʼeaba maʉ̃ra jara ẽ. Maʉ̃ kʼarea Traducción del Nuevo Mundo, naʉ̃ Daizeze Bedʼeadera jarabʉ «Gehena» Daizeze Bedʼea nããrabemane jarabada kĩrãkʼa.

•   Ẽza jara ũrĩbibʉ. Wãrĩnu bʼaita tradusion biabara aripe jara ũrĩbibara mamina maʉ̃ awa ẽ, ẽza jara ũrĩbibara akʉza. Yiza aba jaradaya. Ʉ̃kʉrʉ tradusionbara Mateo 5:3de jarabʉ: «Sobiaudua Daizezedʼebemata kʼawuai kʼarea zuburia bʼera». Maʉ̃ bedʼea ũrĩta zare. Mamina Traducción del Nuevo Mundo, naʉ̃ Daizeze Bedʼeaba jarabʉ: «Sobiapanʉ Daizezedebema audre kʼawuakĩrãpanʉta».

 Traducción del Nuevo Mundo biga Daizeze trʉ̃arata abʉ baera akʉza aripe jarabʉ, ẽza jara ũrĩbibʉ adewara bari dedekapanʉ. Maʉ̃ta arigʉ yibia badu ẽbẽraba plata neẽ mina iyi bedʼeade kʼawuaseabʉ baera.